1 Dxe ne rzelo xman, rsildoogue wa Mli Matlen ruxbaa Jesus, wii men ne le gye ne zemzëë rubaa che zu tebkoo. 2 Orguin noze rzhoon men wa men lo Simon-Bëd no le lo ste xpoxter Jesus ne kesentyent ryaan Ne, re men:

―Weey mén Jesus lenbaa; txu nan gan pazh walu mén men.

3 Lex wruu Simon-Bëd za Simon-Bëd ruxbaa Ne yrup Simon-Bëd ste poxter guin. 4 Noze rzhoon men za men yrup men; per ntozdee rzhoon ste men guin ke lo Simon-Bëd, kwlodee men wdxiin ruxbaa Ne. 5 Lex wgyixlo men lenbaa wii men le lër ne wrël Ne zhoob nga, per wdeedet men lenbaa. 6 Zhich guin wdxiin Simon-Bëd, wdee Simon-Bëd lenbaa no Simon-Bëd wii zhoob lër guin nga 7 no wii ke men lër ne wrël xtoo Ne ndeebo zhoobo tebkoo, zhoobdeto tese yrupo lër ne wrël Ne. 8 Lex wdee ste poxter guin, men ne wdxiin kwlodee; wii men neguin ne wak, wlaleedx men ne wban Ne. 9 Per gardet ydee men kwent ne re lo xgyiich Dëdyuzh ne rap Jesus degne yban Ne. 10 Orguin wberee ke men ruyuu yrup men.

11 Per le Mli wyan guex rubaa roon men; orguin ne kayoon men, wgyixlo men lenbaa, 12 wii men zob txup angel ne nak lërngyich ledne waa Jesus, te ne zob ledne waa xtoo Ne, le ste ne zob ledne waa nii Ne. 13 Lex wnabdiiz angel guin lo Mli, re ne:

―Wnaae, ¿penak roon de?

Wke men re men:

―Porke weey mén Jesus, no nandet noo gan pazh walu mén men.

14 Nonchee wluzh re Mli zenga, wcheree lo Mli wii men le Jesus zu nga, per wnebeeydetgue men Ne. 15 Lex re Ne lo men:

―Wnaae, ¿penak roon de? ¿Txu rye de?

Nuu lextoo Mli pazer men ne rapkwent yagnex guin ne, lex re Mli:

―Dechey, belne laa de weey men, guzëët gan pazh walu de men, chen tsaxii noo men.

16 Lex re Ne:

―¡Mli!

Wcheree lo Mli, re men lo Ne kon diz-hebreo:

―¡Raboni! (Raboni rna Maxter.)

17 Orguin re Ne lo men:

―Ygaldet de noo, porke gardet gya noo lo Xuz noo. Gutsa gue de lo yra xpén noo ne le noo gya lo Dëdyuzh Xuz noo ne nak ke Xuz de yra de, lo XDëdyuzh noo ne nak ke XDëdyuzh de yra de.

18 Lex waluu Mli Matlen diiz lo yra xpén Ne, re Mli Matlen: “Wii noo Jesus no wuu noo diiz yrup noo Jesus.”

19 Chene wnit lyu dxe ke guin ne wzelo xman, ndxin yra xpén Jesus, zemzëë yuu nuu men por ne rdxe men xtis-Israel. Lex wlalo Ne, wzu Ne gwrooltee lad men, re Ne:

―Dëdyuzh yseleedx gyelendxi lo de yra de.

20 Wluzhse re Ne zenga, wluu Ne nya Ne no wluu Ne koo Ne lo men. Kesentyent wzhiilen men ne wii men Ne. 21 Orguin re Ne lo men ste:

―Dëdyuzh yseleedx gyelendxi lo de yra de. Zegne wxaal Dëdyuzh Xuz noo noo ne zëëd noo, zenga ke yxaal noo de yra de.

22 Wluzh re Ne zenga, lex wleb Ne led men yra men, re Ne lo men:

―Gukakwent Espíritu Sant. 23 Belne gun de mén perdon, che wak men perdon; per belne gundet de men perdon, gakdet men perdon.

24 Chene wlalo Jesus lo yra xpén Ne, yët Tmazh ne rnii men Mzhoz, te ke men ne nak xpén Ne chibtxup nak Tmazh. 25 Lex re stebëd xpén Ne lo Tmazh:

―Wii noo Jesus.

Wke Tmazh, re Tmazh:

―Belne kwiidet noo xbeey klab nya Ne no belne yseedet xkwen noo ledne wgyiich klab no belne yseedet nya noo koo Ne ledne wleedx lans* Lans nak tebla yag ne nluts punt., ylaleedxdet noo we.

26 Chene wluzh xun gbiz, ndxin yra xpén Ne ste, cheguin si no Tmazh zu lad men; mase zemzëë yuu nuu men, per wlalo Ne, wzu Ne gwrooltee lad men yra men, re Ne lo men:

―Dëdyuzh yseleedx gyelendxi lo de yra de.

27 Orguin re Ne lo Tmazh:

―Gukwii ledxnya noo, gusee xkwen do, no gubig gusee nya de koo noo. Tsutxupdetre lextoo de, gulaleedxo.

28 Lex wke Tmazh, re Tmazh lo Ne:

―Dechey, laa de nak XDëdyuzh noo.

29 Re Ne lo Tmazh:

―Rlaleedx de noo porke che wii de noo; nzoon men ne rlaleedx noo mase rwiidet men noo.

30 Ndal gyelmilaguer ne wlaa Jesus nes lo yra xpén Ne wkaadet lo liberree. 31 Per wkaa yra neree chen ylaleedx de yra de ne Jesus nak Crist XPee Dëdyuzh no chen chene ylaleedx de Ne, gap de gyelembán ne nunk luzhdet.