2
Ne wal Jesus
(Mt. 1:18-25)
1 Cheguin ke wkyeen rrey-Augusto wdop la mén ne nuu ydendxee gyëzlyu. 2 Laa ne primer wdop la mén nga, chene nak Cirenio gobernador Siria, cheguin wdopo. 3 Yrandxee mén rap men degne tsa men laz men chen ykagyiich la men. 4 Por neguin wruu Xeb Nazaret ne nak lo lyu ne la Galilea, wa men Belén gyëz ne nak lo lyu ne la Judea ledne wal rrey-David, porke xnëz rrey-David zëëd men. 5 Wa men nga yrup men Mli chen ykagyiich la men; che nuu men ne ytsëlnya men no nakzhiin Mli. 6 Nga ka men chene wdxiin dxe ne gap xpëëd Mli. 7 Nga wap xpëëd Mli mëdprimer, lex wtxël men ne lër, wgyix men ne ledne ruu ne ru maa, porke wzëldetre yuu nbë́z men.
Angel no le men ne rapkwent mëkzhiil
8 Guex Belén ka tebëd mén den; nga rzëën men rapkwent xpëkzhiil men gyëël. 9 Tebegue wlalo te xangel Dëdyuzh lo men, lex wkaa xebtsa Dëdyuzh kbii ledne ndxin men; kesentyent wdxe men. 10 Per re angel guin lo men:
―Ydxedet de, porke te dizwen zëdzëët noo lo de, diizree kesentyent ynexiileno yrandxee mén. 11 Laz rrey-David wal te mëëd negyëëlree; laa ne yselaa yrandxee mén lo dol; laa ne nga nak CRIST ne rnebééy. 12 Por ne ynebeey de ne: Tsël ne lo de nrël ne lër, nex ne ledne ruu ne ru maa.
13 Tebegue wlalo ndal xangel Dëdyuzh koo angel guin; rzaknon ne Dëdyuzh, re ne:
14 ¡Nzoon Dëdyuzh axtegue gyeybaa,
no zuu gyelendxi gyëzlyu lad yra mén ne rlaa ne rlaan Ne!
15 Chene le yra angel guin sya gyeybaa, wzelo mén guin ne rapkwent mëkzhiil rulsaa men diiz, re men:
―Yoo tsa be Belén kwii be negwa ne wak ne wzëët Dëdyuzh lo be.
16 Orguin noze ryob rdxiintee za men, wzël Mli lo men yrup Mli Xeb no le mëëd guin, nex ne ledne ruu ne ru maa. 17 Chene wii men ne, wuu men yra xdiiz ne ne re angel guin lo men. 18 Yra mén ne won ne re mén guin, kesentyent wzee wzak men. 19 Per le Mli noze lextoo men wuu yra diiz guin no kanzaleedx meno. 20 Lex wberee ke yra mén guin ne rapkwent mëkzhiil, kesentyent rzaknzoon men Dëdyuzh, rdee men dexkyizhtee lo Ne por yra ne won men no por yra ne wii men, porke wak zegne re angel lo men.
Wano men Jesus lenxeydoo Dëdyuzh
21 Chene wluzh mëëd guin xun gbiz, wguu men ne beey ne ruu men-Israel no wnesela men ne JESUS zegne re angel lo Mli antes ne gakzhiin Mli.
22 Chene wzaa dxe ne rap Mli degne tsa Mli gakndaa Mli zegne zëëd lo ley ne wdee Dëdyuzh lo Moises, wano men mëëd guin nes lo Dëdyuzh lenydo-Jerusalén. 23 Wlaa men neree, porke re lo xley Dëdyuzh: “Yrandxee mëdbee ne ral primer, por Dëdyuzh nak ne.” 24 Lex wa men waron xgoon men zegne re lo xley Dëdyuzh: tsasan men txup ngug o txup mëër.
25 Cheguin ke wuu te mén ne la Simeon gyëz-Jerusalén. Xnëz wbán men, kesentyent wzaknon men Dëdyuzh; kambë́z men kwii men men ne yselaa men-Israel lo dol. Laa Espíritu Sant raknonen men, 26 por laa Ne waknan men ne guetetgue men axtegue ne kwii men XeCrist Dëdyuzh. 27 Laa Espíritu Sant wguu lextoo men ne wa men lenxeydoo Dëdyuzh chene wano ke xegwzan Jesus Jesus lenydoo chen ylaa xegwzan Jesus zegne zëëd lo ley. 28 Lex wnëëz Simeon ne, wlen men ne, wzelo men rdee men dexkyizhtee lo Dëdyuzh, re men:
29 Dëde, orree si betre tsadet lextoo noo, che zak ydee de si guet noo,
porke che wlaa de ne na de lo noo ne nak noo men ne rlaa xdxiin de.
30 Porke le noo che wii zhan ne yselaa mén lo dol,
31 zhan ne wxaal de lo yrandxee mén ne nuu ydendxee gyëzlyu.
32 Laa zhaa nak bnii ne yzenii lo yrandxee mén ne nakdet men-Israel,
no laa zhaa nak gyelenzoon por men-Israel ne nak xpén de.
33 Wzee wzak Xeb yrup Xeb xnaa Jesus por yra ne re Simeon por laa ne. 34 Lex wsan Simeon men ledxnya Dëdyuzh yra men mëëd guin, re Simeon lo Mli xnaa ne:
―Mëëdree che nunla ne ne ndal men-Israel ylaleedxdet ne, per ndal ke men ylaleedx ne. Zëëd ne zëdzëët ne ne rlaan Dëdyuzh, per ndal mén ylaandet ne yzëët ne. 35 Zenga gyakbeey pezee rlebleedx te te mén. Per le laa de sak de zegnak chene raaz te spad lextoo mén chene le yra neree gak.
36 Nga lenydoo guin zu te wnaa ne che kesentyent gol ne nak profet. Ana la men, xsaap Fanuel nak men, xnëz Aser zëëd men. Menyundxee men chene wtsëlnya men; guedxegue iz wbán men yrup men xemgyeey men. 37 Che wzaa taplalno-tap iz wet xemgyeey men, no axtegue rruudet men lenydoo, dxe gyëëltee rnab men lo Dëdyuzh, rkwan men rudet men. 38 Laatee orguin wbig men wdee men dexkyizhtee lo Dëdyuzh. Wluzh nga wzelo men wzëët men xkwent mëëd guin lo yra mén ne kambë́z ne yláá men-Jerusalén.
Le Xeb wberee ke Nazaret
39 Chene wluzhse wlaa Xeb yrup Xeb Mli yra ne zëëd lo xley Dëdyuzh, wberee ke men Nazaret ne nak laz men no ne nak lo lyu ne la Galilea. 40 Le mëëd guin zayaknzhoo no zayakngyedx ne no zayur xgyeryen ne, no kesentyent raknonen Dëdyuzh ne.
Le Jesus zu lenxeydoo Dëdyuzh
41 Yrandxee iz ra xegwzan Jesus Jerusalén chene rak lni pask. 42 Chene wluzh Jesus chibtxup iz, wano men Ne lni pask zegnak xkoxtumber men. 43 Ne wdee lni ne wberee men, wyenden men wyan Jesus Jerusalén. 44 Nuu lextoo men pazer lad mén nga sya Ne, wzaa men tebdxe, per chene wye men Ne lad men ne nak xparyent men no lad men ne rnebeey men, 45 wzëldet Ne. Lex wberee men wa men Jerusalén ste waye men Ne.
46 Ne wyon gbiz, le Ne wzël lenxeydoo Dëdyuzh; zob Ne lad maxter ley rkagyedyag Ne yra ne rnii men, lex rnabdiiz Ne lo men. 47 Yrandxee mén ne ron ne rnii Ne, rzee rzak men por yra ne rke Ne no ne kesentyent nal xgyeryen Ne. 48 Chene wii Xeb Ne yrup Xeb Mli xnaa Ne, wzee wzak men, lex re xnaa Ne lo Ne:
―Zhiina, ¿penak rlaa de zegwa? Le noo yrup noo xuz de ka kaye de, axtegue nandet noo pe nuu lextoo noo.
49 Wke Jesus, re Ne:
―¿Penak rye de noo? ¿Pe nandet de ne rap noo degne ylaa noo xdxiin Xuz noo?
50 Per wdeedet men kwent gan pe rna ne re Ne zenga.
51 Lex wberenal ke Ne men Nazaret. Yrandxee xdiiz men ron Ne. Per noze wguu xnaa Ne yra neree lextoo men. 52 Le Jesus zayaknzhoo no zayur xgyeryen Ne, no rzhiilen Dëdyuzh Ne no rzhiilen ke mén Ne.