1 Lex wdxiin Jesus stebkoo nis lo xelyu men-Gadara yra Ne xpén Ne. 2 Zegne wruu Ne lenbark, lad baa wruu te mgyeey ne nuu menzab lextoo, za men zatsëlo men Ne. 3 Lad baa ka men, no rut rundet gan yliib men, ni kon kaden. 4 Che ndal tir rlaan mén yliib mén nii nyatee men kon kaden, per nunegue rtxugyaa men kaden, noze byu rlaa meno; rut rundet gan lo men. 5 Dxe gyëëltee, rkayobtsaa men gyeey den no le rubaa, noze wraa led men rziib men gye we. 6 Per axtegue natre za Jesus, le men che wii Ne; orguin noze rzhoon men wa men wzuzhib men lo Ne. 7 Lex ndípse wnii menzab ne nuu lextoo mgyeey guin, re menzab lo Ne:

―¿Penak rgal de noo, Jesus XPee Dëdyuzhnzoon? Ynab noo lo de por la Ne ne yzakzidet de noo.

8 Re men zenga porke re Jesus lo men:

―¡Menzab, guruu lextoo ménree!

9 Lex wnabdiiz Jesus lo men, re Ne:

―¿Txu la de?

Wke men re men:

―Le noo la Legión, porke ndal nak noo.

10 Orguin kesentyent wnab men lo Jesus ne yxaaldet Ne men stebkoo. 11 Kom ndal kuch ka gwdu guex gyeey guin ledne zu Jesus, 12 lex wnab menzab guin lo Ne, re men:

―Lextoo kuchro guxaal noo; gudee si tee noo lextoo maa.

13 Orguin wdee Jesus si. Lex wruu menzab lextoo mgyeey guin, watee menzab lextoo yra kuch guin. Zeg txupmil nak ma yra ma. Zegne wdee menzab lextoo maa, wzelo ma wzhoon maa wxenxtoo ma te ruyúú, wyab ma axtegue lo nis. Nga wobkyiky ma nis, wet maa.

14 Orguin wzhoon yra mén ne rapkwent kuch guin, lex wa men waluu men diiz lenlgyëz no le ledne ka mén den. Lex wruu mén za men wii neguin ne wak. 15 Chene wdxiin men lo Jesus, wii men le mgyeey guin ne wuu menzab lextoo che zobchee lo Jesus, che nak men xab men no che nde bnii xgyeryen men. Ne wii yra mén guin neguin, wdxe men. 16 Yra mén ne wii neguin ne wak, laa men wuu diiz gan pezee wzak mgyeey guin ne nuu menzab lextoo no gan pezee wzak yra kuch guin. 17 Orguin wzelo yra mén guin wnab men lo Ne ne yruu Ne xden men.

18 Chene le Jesus wdee lenbark, wzelo mgyeey guin ne wruu menzab lextoo wnab men lo Jesus ne ydee Ne si tsanal men Ne. 19 Per wdeedet Ne si, sinke re Ne lo men:

―Gugya ruxyuu de, gu de diiz lo yra xparyent de yra ne wlaa Dëdyuzh de no gan pezee wles lextoo Ne de.

20 Lex sya mgyeey guin wzelo men wuu men diiz lo mén yra gyëz ne ngab Decápolis ne nzoon guin ne wlaa Jesus men. Yrandxee mén wzee wzak.

21 Chene wberee Jesus kon bark ke stebkoo nis ste, kesentyent ndal mén wdop lo Ne. Nga runis guin wzu Ne. 22 Zhich guin wdxiin te men ne la Jairo ne rnebééy lenydoo. Zegne wii men Ne, wzuzhib men lo Ne. 23 Kesentyent wnab men lo Ne, re men:

―Le xsaap noo che kaluzhlo. Yoo tsa be yxob nya de led nzeb chen gyaken nzeb no chen ybánre nzeb.

24 Orguin zanal Jesus men. Ndalyaa mén zanal Ne, noze reen men Ne. 25 Nga zu te wnaa ne rzhuun, che wzaa chibtxup iz ryab men ren. 26 Che kesentyent wak men sufrir porke noze ndal lo doctor wa men, no che wdenya yra xmed men, per bat wkyiindeto, lel mazre wak xgyelgyiz men. 27 Chene won men ne ruu mén xdiiz Jesus, noze lad yra mén guin wdee men, wbig men nes zhich Ne, wtee nya men led xab Ne. 28 Porke nuu lextoo men: “Naal pezee maske nonchee ytee nya noo led xab mén gwa, laa ne gyaken noo nga.” 29 No orgueguin wyaag men ren, wyenengue men ne le men che wyaken. 30 Orgueguin wyenen Jesus ne wneseyaken Ne te mén kon xpoder Ne. Wcheree lo Ne wii Ne lo yra mén ne zanal zhich Ne, lex wnabdiiz Ne lo men, re Ne:

―¿Txuzh wtee nya led xab noo?

31 Orguin re yra xpén Ne lo Ne:

―Rwii de noze reen mén de, no le de rnabdiiz gan txuzh wtee nya led xab de.

32 Per zazëëdtee lo Ne noze kbii Ne chen kwii Ne gan txuzh wtee nya led xab Ne. 33 Orguin noze rzhiz wnaa guin tant rdxe men kom nan men ne laa men wtee nya led xab Ne. Wa men wzuzhib men lo Ne, lex wzëët meno zegne nak nakendxoo. 34 Orguin re Jesus lo men:

―Zhiina, por ne wlaleedx de noo, wyaken de. Zhaas gugya, che wbë́z xgyelgyiz de.

35 Benak kanii Jesus, chene wdxiin tebëd mén ne wruu ruxyuu mén guin ne rnebééy lenydoo, re men lo men guin:

―Le xsaap de che wet. Gunendetre de lo Maxter.

36 Per wukasdet Jesus neguin ne re men, lex re Ne lo mén guin ne rnebééy lenydoo:

―Ydxedet de; noze gulaleedx noo.

37 No wdeedet Ne si nyanal ndal mén Ne, nonchee Bëd no le Jacob no le Xwa bech Jacob. 38 Chene wdxiin Ne ruxyuu mén guin ne rnebééy lenydoo, wii Ne le yra mén ndxin roon robtsaatee. 39 Orguin wdee Ne, re Ne lo men:

―¿Penak noze rakrëz de no penak roon de? Wetet xsaap ménree, noze nexguees nzeb.

40 Per lel wzhidxno men Ne. Orguin wboo Ne men yrandxee men fwer. Lex wzano Ne xnaa nzaap guin no le xuz nzeb no le men ne zano Ne, wdee Ne ledne nex nzeb. 41 Wnëëz Ne nya nzeb, re Ne lo nzeb:

―Talita, cumi ―diizree rna: Nzaape, yna noo lo de, gutsaxee.

42 Orgueguin waxee nzaap guin, wzelo nzeb wzaa nzeb. Kesentyent wzee wzak yrandxee mén. Chibtxup iz rap nzeb. 43 Lex re Jesus lo men ne rutlel lo guedet meno, no wkyeen Ne men ne ydee men ne gu nzeb.