1 Chi gudëd gojc zian, balüüloj Jesús loj ree xbejnman zatijb, roꞌ nijs na̱j gajxh guiedx Tiberias. Ze balüülojman: 2 Chi nadxag lasaꞌ ree Simón Bëd con Tumajs bén rniee reeman Cwajch, në Natanael bén za Caná guiedx rigaꞌ niz Galilea, con ree xiꞌn Zebedeo, nëtëë zatioꞌp xbejn Jesús, 3 dxel rëb Bëd loj reeman:

―Gan chignaazan bëjl.

Badxiꞌ reeman laan rëb reeman:

―Në dunujn yadxoo.

Abiꞌ wëꞌp reeman loj barcw zë reeman, per guxhin zii achutczi bëjl gunaaz reeman. 4 Chi ma cayreguiaal, bidxin Jesús roꞌ nijs guin, per ad bayünbeet reeman laaman. 5 Dxel gunabdiidxaman loj reeman rëbaman:

―Xiꞌn, ¿nid chu bëjl wanaazidi ya?

Badxiꞌ reeman laan rëb reeman:

―Achutczi.

6 Abiꞌ rëb Jesús loj reeman:

―Gol bazaal xguijxhidi xladbee barcw guin din guiniaazidi bëjl.

Zian been reeman, abiꞌ ad rajctri rabëë reeman guijxh guin, guial dád zien bëjl yuꞌ lojn. 7 Dxel xbejn Jesús, bén rën daꞌtaman, rëbaman loj Bëd:

―¡Dad Jesúsan!

Biguiejnzi Simón Bëd zian, laa got gajc xabaman ni gulëëman, abiꞌ gutiajsaman lojnijs guin. 8 Guiáad zaxhoꞌp xbejn Jesús loj barcw guin badxin reeman roꞌ nijs guin, coobyuj reeman guijxh guin, guidxan bëjl, guial ziꞌctzi tibgayuu mejtr ryaadx yadxin reeman roꞌ nijs guin. 9 Chi baguiajt reeman, baguiaa reeman laa guij ma rigaꞌ, dxiib tijb bëjl lojn, në guiadxtil rigaꞌ yagaj. 10 Dxel rëb Jesús loj reeman:

―Gol tanë tioꞌp choon bëjl gunaaz nejzidi.

11 Dxel wëꞌp Bëd loj barcw guin, guxoobyujman guijxh guin guidxan bëjl naroob ree, xt roꞌ nijs guin. Tibgayuu tüꞌpchiibichoon bëjl yuꞌ lojn. Abiꞌ majsi zienb, per ad goxyaꞌtan. 12 Zianz rëb Jesús loj reeman:

―Gol guda din gawidi rsiil.

Abiꞌ niꞌqui tijb reeman ad rayaxt guiniabdiidx chu bénan, guial ragbee reeman Dad Jesúsan. 13 Dxel gubigaman cwaꞌman guiadxtil badëëman loj reeman, ziangajc beenman con bëjl guin. 14 Ni ne bayon volt balüüloj Jesús loj ree xbejnman chi babanman loj ree bengüt.

15 Chi gulox gudaw Jesús con ree xbejnman, gunabdiidxaman loj Simón Bëd, rëbaman:

―Simón, xiꞌn Waj, ¿walil ya rënl naj mazri guial loj ree bén guie?

Badxiꞌ Bëdan rëbaman:

―Dad, ragbeequil rënan lüj.

Zeel rëb Jesús:

―Gunaj ree da xiildoon.

16 Abiꞌ rëb Jesús zatijb:

―Simón, xiꞌn Waj, ¿walil ya rënl naj?

Badxiꞌ Bëdan rëbaman:

―Dad, ragbeequil rënan lüj.

Zeel rëb Jesús:

―Gunaj ree da xiilan.

17 Bayon volt gunabdiidx Jesús rëbaman:

―Simón, xiꞌn Waj, ¿rënl naj ya?

Dád guyunaya Bëd, guial ma gojc choon volt gunabdiidx Jesús bal rënman laaman. Zianz rëb Bëd:

―Dad, lüj ragbee graczi, ragbeel rënan lüj.

Zeel rëb Jesús:

―Gunaj ree da xiilan. 18 Diidxliczi ganin, chi goquil xinguiag, rajcw xabil persi rejl lod rënl. Per chi ma najl bengol, gusli xuꞌquil din guscajcw ben ren xabil din chinë reeman lüj lod ad rëntil chel.

19 Rëb Jesús zian guial basigniaꞌman xhienaag guiët Bëd, din güünbee ree bejn Dios. Dxel rëb Jesús:

―Tanal naj.

20 Chi badxiꞌ loj Bëd, baguiaaman laa bén rën daꞌt Jesús zinal laa reeman. Laaman gure cwëꞌ Jesús chi gudaw reeman xche, gunabdiidx tëëman loj Jesús rëbaman: “Dad, ¿chu yayü lüj?” 21 Chi baguiaa Bëd laaman, gunabdiidxaman loj Jesús rëbaman:

―Dad, laadxza xin guin, ¿xhie saquix?

22 Badxiꞌ Jesúsan rëbaman:

―Bal rënan guibanx xt yaguialan, ¿xhie güünl? Lüj tanal naj.

23 Zianan zeel bireꞌch diidx loj ree xbejnman guial ad zëjtt bén guin. Per ad ziantan rëb Jesús, rëbaman: “Bal rënan guibanx xt yaguialan, ¿xhie güünl?”

24 Bén guin gajcan rü diidx xcwent ree nine, laa tëëman bacaa laan, rayagbee tëë ree rüman diidxli. 25 Dád zien ree ni been Jesús, bal nitia tijb gajn, wed ad zadaant loj guidxliuj niu ree libr ni niajc.