1 Rëb tëë Jesús loj reeman:

―Diidxliczi ganin, yuꞌ ree bén zaꞌ guie, ad zëjtt xt guguiaa reeman guiꞌt xguialrniabee Dios.

2 Chi goc xhoꞌp dxej, wej Jesús tijb ruguiaꞌya, binëman Bëd, Jacob con Waj. Yagaj bidxaa Jesús niz loj reeman. 3 Balaa xabaman bachaꞌ, gojcan naquichbëj, achutczi rguiib lajd zian loj guidxliuj guie. 4 Dxel baguiaa reeman Elías në Moisejs cayünë reeman Jesús diidx. 5 Abiꞌ rëb Bëd lojman:

―Mextr, ¡zagdxen nadxuꞌn guie! Yaguieenan choon ranch, tijban par lüj, tijban par Moisejs, zatijban par Elías.

6 Per ad ragbeet Bëd xhienin caneeman guial dád bidxeb reeman. 7 Loj hor guin biguiajt tijb za̱j beenan bala guijc reeman, abiꞌ loj za̱j guin biguien chaꞌ bejn rëbaman:

―Bén guie na̱j da Xiꞌnan, bén rën daꞌtan, gol bazoob xtiidxaman.

8 Abiꞌ chi baguiaa reeman gadëd lod zaꞌ reeman achutri zaꞌnë Jesús, tijbzi laaman zaꞌ yagaj. 9 Laꞌtgaj cayguiajt reeman ruguiaꞌ guin, rëb Jesús loj reeman chitëë chu loj guiëb reeman ni baguiaa reeman, xt yaban Bén guxhaal Dios. 10 Abiꞌ laaz reeman ragbee ni baguiaa reeman, rniabdiidx tëë loj lasaꞌ reeman xhie rën guiëb guial yabanman loj ree bengüt. 11 Dxel gunabdiidx reeman loj Jesús, rëb reeman:

―¿Chexc zeel rëb ree mextr rajc ley guial yaloj Elías guiꞌt?

12 Badxiꞌman laan rëbaman:

―Walican yaloj Elías guiꞌt, laaman guzuxnejz gra. Per, ¿chexc zeel ca loj xtiidx Dios guial Bén guxhaal Dios sagdiaj daꞌtaman ad zën tëët reeman laaman? 13 Naj rni lojdi guial mal biꞌt Elías, abiꞌ beennë reeman laaman ni guyëntzi reeman ziꞌc ca loj xtiidx Dios ni rayal sacaman.

14 Chi badxin Jesús lod zaꞌ staꞌn ree xbejnman, baguiaaman dád zien bejn rigaꞌ, në ree mextr rajc ley zaꞌ yagaj cadildiidx reeman con ree xbejnman. 15 Chi baguiaa reeman zëëd Jesús, dád badxa loj reeman abiꞌ baxüün reeman bicajpdioz reeman laaman. 16 Dxel gunabdiidxaman loj reeman rëbaman:

―¿Chexc zeel cadildiidxidi?

17 Abiꞌ rëb tijb bén zaꞌ yagaj:

―Mextr, zidnëꞌ da xiꞌnan lojl guial yuꞌ xindxab luxdoox abiꞌ nusaꞌnx laax gop. 18 Bantëëz guin zaꞌx, chi ru xindxab guin luxdoox rureeyujx laax, abiꞌ rbëëx bichijn roꞌx, raw tëë ree layix, dxel ratiaguix. Ma gunaaban loj ree xbejnl din nabëë reeman xindxab guin, per ad gojct reeman.

19 Zeel rëb Jesús:

―¡Bén ad rliladxt! ¿Xt goc gazunëꞌn lëjt gadaan tëën lëjt? Gol tanë xinzii guie.

20 Dxel binë reeman laax lojman. Per chi baguiaa xindxab guin laaman, laa bagüjtyaꞌgajquix xin guin, bareeyujx laax abiꞌ rbixtüjpix ririi tëë bichijn roꞌx. 21 Dxel gunabdiidx Jesús loj xdadix rëbaman:

―¿Goc guzuloj rajquix zian?

Badxiꞌman laan rëbaman:

―Diizd xindobëzix. 22 Dád zien volt ruzaalix laax loj guij në loj nijs din guiëtix. Zeel bal zajc güünl xhienin por dunujn, gognë dunujn, baya dunujn.

23 Dxel rëb Jesús lojman:

―¿Chexc zeel nal, “bal zajcan”? Graczan zajc bal chu rliladx naj.

24 Dxel gurixdiaj xdadix rëbaman:

―¡Rliladxan lüj, gognë naj din chililadxan mazri!

25 Chi baguiaa Jesús cadoꞌp zien bejn dxel gudilëman xindxab yuꞌ luxdoo xin guin, rëbaman:

―Xindxab gop nacwaꞌt tëë, rniabeen lüj din yariil luxdoo xin guin. Ad bal yayejcril luxdoox zatijb.

26 Dxel gurixdiaj xindxab guin, abiꞌ bagüjtyaꞌx laax zatijb abiꞌ bariix luxdoox, basaꞌnx laax ziꞌc xingüt zeel rëb ree bejn guial ma güjtix. 27 Per gunaaz Jesús yaax gulesaman laax, dxel guzulix.

28 Dxel bayu Jesús lënü con ree xbejnman, abiꞌ gunabdiidx reeman lojman, rëb reeman:

―¿Chexc zeel ad gojct nalëën xindxab guin luxdoo xin guin?

29 Badxiꞌ Jesúsan rëbaman:

―Par yarii lasaꞌ ree xindxab guin, rayal cwedx guiniabidi Dios guibaꞌn tëëdi.

30 Chi baza reeman yagaj, gudëd reeman niz Galilea, per ad guyënt Jesús chu niagbee guial cadëdaman niz yagaj, 31 guial culüü ree xbejnman, rëbaman:

―Yayü reeman Bén guxhaal Dios loj ree bén gugüjt laaman, per ni gac choon dxej yabanman.

32 Per laa reeman ad bigniaꞌt reeman ni rëbaman, abiꞌ bidxeb reeman niniabdiidx reeman lojman.

33 Dxel badxin Jesús Capernaum con ree xbejnman, abiꞌ badxin reeman yu lod zojb reeman. Dxel gunabdiidxaman loj reeman rëbaman:

―¿Xhie diidxan rüdi lunejz chi zioꞌp ree?

34 Per achet rëb reeman guial cadildiidx reeman lunejz chu reeman mazri zojbloj. 35 Dxel gurej Jesús, gurejdxaman guidxiptioꞌp reeman, rëbaman:

―Bal chu bén rën gac mazri bén zojbloj lojdi, rayal güün laagajcaman ziꞌc tijb bén ad zojblojt güün tëëman sirv loj gradi.

36 Dxel cwaꞌman tijb xindoo, bazujman laax galay reeman, zianz gudiidxaman laax, rëbaman:

37 ―Bén ridxgaꞌ tijb xindoo por naj, najn ridxgaꞌman, guiáad bén ridxgaꞌ naj, bén guxhaal najn ridxgaꞌman.

38 Rëb Waj loj Jesús:

―Mextr, baguiaan tijb bejn rabëëman xindxab luxdoo ree bejn por xguialrniabeel. Per badxoonan guial ad najtaman dux bejn ree.

39 Badxiꞌ Jesúsan rëbaman:

―Ad rudxoondi, din bén rüjn milagr por da guialrniabeen, ad zileꞌt guinieeguijdxaman naj. 40 Bén ad zaꞌt contr dunuj ree, zaꞌman con dunuj ree. 41 Chutëëz bén gunee majsi tibxijgzi nijs lojdi guial najdi xbejn Cristo, diidxli rnin guial ziangajc yuꞌ ni gudëëd Dios lojman.

42 ’Chutëëz bén guzaalguiiw tijb bén qui rliladxri naj din güünman dol, par laaman zagdxeli na̱j guixhii reeman tijb guiaj mulin yëjnman guzaal reeman laaman loj nijsdoo. 43 Bal laagajc yaal rusajb lüj loj dol, zagdxeli gutüꞌn. Mazri zagdxe chuꞌ con tibladzi yaal xanyabaa, guial che con grop yaal gabijl loj bajl ni ad yuꞌt dxej yayüꞌ, 44 lod ad rëjtt ree bizog lod ad rayüꞌ tëët bajl. 45 Abiꞌ bal laagajc guiaꞌl rusajb lüj loj dol, zagdxeli gutüꞌn. Mazri zagdxe chuꞌ con tibladzi guiaꞌl xanyabaa guial che con groplad guiaꞌl gabijl lod yuꞌ bajl ni ad yuꞌt dxej yayüꞌ, 46 lod ad rëjtt ree bizog lod ad rayüꞌ tëët bajl. 47 Bal laagajc guiaalojl rusajb lüj loj dol, zagdxeli gulëën. Mazri zagdxe chuꞌ con tibladzi guiaalojl xanyabaa guial che con groplad guiaalojl gabijl lod yuꞌ bajl ni ad yuꞌt dxej yayüꞌ, 48 lod ad rëjtt ree bizog lod ad rayüꞌ tëët bajl.

49 ’Ziꞌc ru zëd guijc guialraw, ziangajc ree bén rliladx naj sagdiaj reeman din gac reeman naya.

50 ’Ni zagdxe na̱j zëd, per bal id zajcran naxij, ¿xhieza naag yayajcan naxij zatijb? Gol been ziꞌc rayal chitëë saquidi ziꞌc zëd ni ad rüjnt sirv, gol gubajnnë tëë lasaꞌdi zagdxe.