1 Naꞌa, ca nac dza naꞌ o rël naꞌ catiꞌ lac lë ni, cutu run bayúdx uzujaꞌ queëliꞌ lu guich, böchiꞌ lzaꞌtuꞌ. 2 Lbiꞌiliꞌ chnö́ziczliꞌ dxiꞌa ca gac dza catiꞌ huödëꞌ Xanruꞌ. Gdxinëꞌ tu tsalz ca rdxinëꞌ gban chdzöꞌl. 3 Catiꞌ laꞌná bunách: “Rac dxiꞌa queëruꞌ len cutu bi gac queëruꞌ”, niꞌr laꞌ gdxintë le usnít lequëꞌ, lë naꞌ gdxin quequëꞌ ca naꞌ rdxin le rzacaꞌ rguiꞌnu ngul chzoa soabiꞌ biꞌidauꞌ queënu, atiꞌ nutu nu nutsaꞌ ladj bunách yödzlyú ni nu ulá catiꞌ gac lë naꞌ ral‑laꞌ gac. 4 Naꞌa, böchiꞌ lzaꞌtuꞌ, cutu zoaliꞌ chul nit, len qui lë ni naꞌ cutu gdxin queëliꞌ bagachiꞌz dza niꞌ ca rdxinëꞌ gban. 5 Yúguꞌtëliꞌ nacliꞌ bunách qui yeníꞌ len qui lahuiꞌ dza. Cutu nacruꞌ bunách qui chdzöꞌl len clëg qui le nac chul. 6 Qui lë ni naꞌ, cutu ral‑laꞌ töd yël lauruꞌ ca rac quegac nup cunababgac rëꞌu, san ral‑laꞌ uspán ládxiꞌruꞌ len cözruꞌ baꞌa ládxiꞌdauꞌ. 7 Nup tas, chdzöꞌl tas, len nup taꞌzudxi, chdzöꞌl caꞌ taꞌzudxi. 8 Naꞌa, rëꞌu ni, nacruꞌ qui lahuiꞌ dza len ral‑laꞌ cözruꞌ baꞌa ládxiꞌdauꞌ, le chnácuruꞌ zxaruꞌ le run chiꞌi rëꞌu, le nac yöl‑laꞌ rejlëꞌ queëruꞌ Dios len yöl‑laꞌ nadxíꞌi, atiꞌ le runruꞌ löz ularuꞌ nac ca luꞌu guia le run chiꞌi icjruꞌ. 9 Cni nac, le nuzóëꞌ rëꞌu ni Dios, clëg quië gdxinruꞌ ga gchuguëꞌ queëruꞌ, san quië ularuꞌ le runruꞌ löz Xanruꞌ Jesucristo, 10 le gutiëꞌ uláz queëruꞌ Jesús quië soaruꞌ gbanruꞌ tsazxö́n len Lëꞌ catiꞌ huödëꞌ, zal‑laꞌ chnatruꞌ o soaruꞌ gbanruꞌ dza niꞌ. 11 Qui lë ni naꞌ ral‑laꞌ utipliꞌ ládxiꞌliꞌ tuliꞌ yetuliꞌ len gunliꞌ tsutsu tuliꞌ yetuliꞌ ca naꞌ chrunliꞌ.

12 Rátaꞌyutuꞌ lauliꞌ, böchiꞌ lzaꞌtuꞌ, gúnbëꞌliꞌ nup tun xchinëꞌ Xanruꞌ ga zoaliꞌ, nup naꞌ taꞌná beꞌi lbiꞌiliꞌ uláz queëꞌ Xanruꞌ, len tuꞌsáꞌ ládxiꞌliꞌ. 13 Rátaꞌyutuꞌ lauliꞌ caꞌ, gunliꞌ lequëꞌ ba laꞌn lu yöl‑laꞌ nadxíꞌi queëliꞌ, le tunëꞌ dxin naꞌ. Gul‑cö́z dxíꞌadauꞌ tuliꞌ len yetuliꞌ.

14 Lëzcaꞌ cni ruchiztuꞌ icj nagliꞌ, böchiꞌ lzaꞌtuꞌ, quië usaꞌliꞌ ládxiꞌgac nup cutún dxin, len utipliꞌ ládxiꞌgac nup tuꞌhuö́a ládxiꞌgac, len gáclenliꞌ nup cunác tsutsu ca taꞌyejlëꞌ Cristo, len gacliꞌ nöxj ladxiꞌ laugac yúguꞌtë bunách.

15 Gul‑gún chiꞌi cuinliꞌ cui uzíꞌ la lzaꞌliꞌ, cui guaꞌliꞌ döꞌ qui nu ruaꞌ döꞌ queëliꞌ, san gul‑güíꞌ ládxiꞌliꞌ gúnteczliꞌ le nac dxiꞌa qui lzaꞌliꞌ tuliꞌ yetuliꞌ len quegac yúguꞌtë bunách.

16 Gul‑dzíjitecz 17 len gul‑lídzteczëꞌ Dios 18 len gul‑guië́ꞌ Lëꞌ: “Xclenuꞌ.” Cni ral‑laꞌ gunliꞌ ca nac yúguꞌtë le rac queëliꞌ, le nacgac lë ni le rëꞌnnëꞌ Dios gunliꞌ le nacliꞌ queëꞌ Jesucristo.

19 Cutu guzóa dxiliꞌ le rulidzëꞌ lbiꞌiliꞌ Dios Böꞌ Laꞌy 20 len cutu guzoaliꞌ tslaꞌl xtidzëꞌë bönniꞌ ruꞌë didzaꞌ uláz queëꞌ Dios 21 san gul‑síꞌ bëꞌ yúguꞌtë. Gul‑síꞌ lu naꞌliꞌ le nac dxiꞌa 22 len cutu bi gútsaꞌliꞌ le cunác.

23 Lëczëꞌ Dios, Nu run ga zoa dxi icj ládxiꞌdauꞌruꞌ, gunëꞌ ga gacliꞌ gdu dxiꞌa, atiꞌ gun chiꞌë böꞌ nacczliꞌ, len icj ládxiꞌdauꞌliꞌ len gdu ca nayáꞌ nabinliꞌ, atiꞌ nutu nu gac bi gnë queëliꞌ dza niꞌ huödëꞌ Xanruꞌ Jesucristo. 24 Runëꞌ ca rnëꞌ Dios, Nu bulídz lbiꞌiliꞌ. Lëczëꞌ gunëꞌ yuguꞌ lë ni.

25 Böchiꞌ lzaꞌtuꞌ, gul‑lidzëꞌ Dios gnábiliꞌ‑nëꞌ gáclenëꞌ netuꞌ.

26 Gul‑gáp Dios yúguꞌtë böchiꞌ lzaꞌruꞌ, unídaꞌliꞌ lequëꞌ lu yöl‑laꞌ nadxíꞌi queëliꞌ.

27 Niꞌa queëꞌ Xanruꞌ Dios rna béꞌidaꞌ lbiꞌiliꞌ ulabliꞌ guich ni laugac yúguꞌtë böchiꞌ lzaꞌruꞌ nababquëꞌ Cristo.

28 Rnabaꞌ lahuëꞌ Xanruꞌ Jesucristo uzáꞌ ladxëꞌë queëliꞌ le nacgac dxiꞌa queëꞌ. Caꞌ gac.