1 Tu dza, catiꞌ niꞌ rusëdnëꞌ bunách Jesús ga nac nchil gdauꞌ, len rguíxjöꞌë didzaꞌ dxiꞌa, guladxinëꞌ ga naꞌ zoëꞌ yuguꞌ bxuz uná bëꞌ len bönniꞌ gdauꞌ tuꞌsëdi, len bönniꞌ gul tuꞌzejniꞌi, 2 atiꞌ tëꞌ Jesús:

―Gdixjöiꞌ netuꞌ. ¿Bizxa yöl‑laꞌ uná bëꞌ dë lu naꞌu runuꞌ cni? ¿Nuzxa caz budö́d lu naꞌu yöl‑laꞌ uná bëꞌ ni?

3 Bubiꞌë didzaꞌ Jesús, rëꞌ lequëꞌ:

―Huanabdaꞌ caꞌ lbiꞌiliꞌ tu didzaꞌ, atiꞌ ubiꞌiliꞌ gnaliꞌ. 4 ¿Nuzxa bsölaꞌ Juan buquilëꞌ bunách nis? ¿Naruꞌ Dios, o bunách?

5 Glun xtídzaꞌquëꞌ laꞌ légaczëꞌ bönniꞌ gdauꞌ naꞌ, taꞌnë́ꞌ:

―Chquiꞌ gnaruꞌ: Bsölëꞌë lëꞌ Dios, guiëꞌ rëꞌu: “¿Bizx quië cutu gyéjlëꞌliꞌ‑nëꞌ?” 6 Chquiꞌ guiëruꞌ‑nëꞌ: Gulasölëꞌë lëꞌ bönniꞌ, luladxiꞌ rëꞌu guiöj bunách lu yödz ni, le nö́zgaccznëꞌ bëꞌë didzaꞌ uláz queëꞌ Dios Juan naꞌ.

7 Niꞌr gulubiꞌë didzaꞌ, taꞌnë́ꞌ:

―Cutu nö́zituꞌ nuzxa naꞌ bsölaꞌ Juan.

8 Niꞌr Jesús rëꞌ lequëꞌ:

―Nedaꞌ caꞌ cutu gyëpaꞌ lbiꞌiliꞌ bi yöl‑laꞌ uná bëꞌ rúnidaꞌ cni.

9 Niꞌr laꞌ gzu lautëꞌ Jesús ruíꞌlenëꞌ bunách nacuáꞌ niꞌ didzaꞌ, runëꞌ lsaquiꞌ, rnëꞌ:

―Zoëꞌ bönniꞌ bdëꞌë laꞌ yël queëꞌ yuguꞌ lba uva, atiꞌ budödëꞌ laꞌ yël naꞌ lu naꞌquëꞌ bönniꞌ huen dxin lun gatsjëꞌ len lëꞌ le luziꞌë, atiꞌ gyijëꞌ ziꞌtuꞌ ga niꞌ bugaꞌnëꞌ xtsey. 10 Catiꞌ bdxin dza luchibëꞌ laꞌ yël naꞌ, bsölëꞌë tuëꞌ bönniꞌ gbaz queëꞌ ga naꞌ nacuꞌë huen dxin naꞌ quië siꞌë uláz queëꞌ qui le luziꞌë, san glundëꞌ lëꞌ ziꞌ huen dxin naꞌ, len gulusölëꞌë lëꞌ caꞌz. 11 Leyúbl bsölëꞌë yetúëꞌ gbaz queëꞌ, atiꞌ lequëꞌ glundëꞌ lëꞌ caꞌ ziꞌ, len gluꞌë döꞌ queëꞌ, atiꞌ gulusölëꞌë lëꞌ caꞌz. 12 Leyúbl bsölëꞌë quequëꞌ bönniꞌ bunn gbaz queëꞌ, atiꞌ guludxíëꞌ caꞌ lëꞌ huëꞌ, len gulubijëꞌ lëꞌ niꞌl laꞌ yël naꞌ.

13 ’Niꞌr gzaꞌ ladxëꞌë xani laꞌ yël naꞌ, gnëꞌ: “¿Nacx guntsaꞌ? Gsölaꞌa quequëꞌ zxiꞌnczaꞌ nadxiꞌidaꞌ‑biꞌ. Catiꞌ laꞌléꞌinëꞌ‑biꞌ, nazx caꞌ lunëꞌ‑biꞌ ba laꞌn.” 14 Niꞌr, catiꞌ gulaléꞌinëꞌ‑biꞌ huen dxin naꞌ, glun xtídzaꞌquëꞌ laꞌ légaczëꞌ, taꞌnë́ꞌ: “Biꞌi ni gaqui queëbiꞌ laꞌ yël ni. Gul‑dá, gdö́diruꞌ‑biꞌ, quië gaqui queëruꞌ le ral‑laꞌ gaqui queëbiꞌ.” 15 Gulubijëꞌ‑biꞌ niꞌl laꞌ yël naꞌ, guludöddëꞌ‑biꞌ.

’Naꞌa, ¿nacxcz gunëꞌ quequëꞌ xani laꞌ yël naꞌ? 16 Guidëꞌ len gdöddëꞌ yuguꞌ huen dxin naꞌ, atiꞌ udödëꞌ laꞌ yël queëꞌ lu naꞌgac bunách yubl.

Catiꞌ gulayöni lë ni bunách nacuáꞌ niꞌ, gulanë́ꞌ:

―Dios cugnë́ꞌ gac cni.

17 Niꞌr buyúëꞌ lequëꞌ Jesús, rnëꞌ:

―¿Bizxa rëꞌni gna lë naꞌ nayúj lu guich laꞌy, rna:

19 Laꞌ dza niꞌz, gulazú gulaböꞌë laꞌzönëꞌ Jesús yuguꞌ bxuz uná bëꞌ len bönniꞌ gdauꞌ tuꞌsëdi, le táquibeꞌinëꞌ gnëꞌ quequëꞌ lë naꞌ benëꞌ lsaquiꞌ, san gládxinëꞌ bunách zian nacuáꞌ niꞌ. 20 Niꞌr guluyutsquëꞌ Jesús, len gulasölëꞌë bönniꞌ lubijëꞌ Lëꞌ didzaꞌ, luluíꞌ cuinquëꞌ ca bönniꞌ tsahuiꞌ, quië lunëꞌ ga bi gnëꞌ Jesús, quië gac ludödëꞌ Lëꞌ lu nëꞌë bönniꞌ rna béꞌinëꞌ lequëꞌ. 21 Quië lunëꞌ cni, gulanabnëꞌ Jesús, taꞌnë́ꞌ:

―Bönniꞌ Usëdi, nö́zituꞌ le nacz rnauꞌ, len le nacz rusëdnuꞌ, len cutu rbequi xbeynuꞌ ca nac le tuꞌluíꞌz lahui bunách, san gdutë li nac ca rusëdnuꞌ zxba queëꞌ Dios. 22 Gdixjöiꞌ netuꞌ. ¿Naruꞌ run bayúdx quizxj laztuꞌ queëꞌ César, bönniꞌ Roma rna bëꞌë, o cutu?

23 Ráquibeꞌinëꞌ Jesús le tëꞌnnëꞌ lunëꞌ queëꞌ, atiꞌ rëꞌ lequëꞌ:

―¿Bizx quië rziꞌ bëꞌliꞌ nedaꞌ? 24 Gul‑luiꞌitsquiꞌ nedaꞌ tu dumí rda. ¿Nuzxa lahui daꞌ lëꞌi ni, len nuzxa lei nayúj ni?

Gulubiꞌë didzaꞌ, taꞌnë́ꞌ:

―Queëꞌ César naꞌ.

25 Niꞌr Jesús rëꞌ lequëꞌ:

―Gul‑nö́dzj queëꞌ César le naqui queëꞌ César, atiꞌ queëꞌ Dios le naqui queëꞌ Dios.

26 Cutu guc lunëꞌ bi gnëꞌ Jesús quië gac luquíëꞌ Lëꞌ laugac bunách zian naꞌ, san gulubannëꞌ ca nac didzaꞌ bubiꞌë, atiꞌ guluséyj rúꞌaquëꞌ.

27 Niꞌr guladxinëꞌ bönniꞌ gdauꞌ saduceo, nup naꞌ taꞌná cutu lubán nup chnatgac, atiꞌ gulanabnëꞌ Jesús, 28 taꞌnë́ꞌ:

―Bönniꞌ Usëdi, Moisés buzujëꞌ queëruꞌ lu guich, le rna: “Chquiꞌ gatiëꞌ bönniꞌ, atiꞌ ugaꞌnnu ngul queëꞌ, len chquiꞌ nutu nu zoa biꞌi queëꞌ, niꞌr ral‑laꞌ siꞌbiꞌ‑nu ngul queëꞌ naꞌ biꞌi böchëꞌë, quië uzoabiꞌ biꞌi queëꞌ bönniꞌ bö́chiꞌbiꞌ naꞌ gutiëꞌ.” 29 Gulacuaꞌbiꞌ gadx biꞌi bönniꞌ naccbiꞌ bö́chiꞌbiꞌ, atiꞌ biꞌi ziꞌal naꞌ butság náꞌlenbiꞌ biꞌi ngul, len gutbiꞌ, cuzoabiꞌ biꞌi queëbiꞌ. 30 Niꞌr butság náꞌlenbiꞌ‑nu ngul naꞌ biꞌi buróp naꞌ, atiꞌ gutbiꞌ caꞌ biꞌi ni, cuzoabiꞌ biꞌi queëbiꞌ. 31 Butság náꞌlenbiꞌ‑nu biꞌi bunn naꞌ, atiꞌ laꞌ tuz ca glunbiꞌ igádxtëbiꞌ, len glatbiꞌ, cuzoabiꞌ biꞌi quecbiꞌ. 32 Ga budxtë, gutnu caꞌ ngul naꞌ. 33 Naꞌa, catiꞌ lubán nup chnatgac, ¿núzxalbiꞌ gáquinu queëbiꞌ ngul naꞌ, le gulutság náꞌlenbiꞌ‑nu igádxtëbiꞌ?

34 Niꞌr bubiꞌë didzaꞌ Jesús, rëꞌ lequëꞌ:

―Tuꞌtság naꞌgac bunách dza ni zoaruꞌ naꞌa, len tuꞌnödzjëꞌ‑biꞌ zxiꞌnquëꞌ quië lutság naꞌcbiꞌ. 35 Naꞌa, nup nacgac lsacaꞌ lubán lu yöl‑laꞌ gut len tsajcuáꞌ yödzlyú ziꞌa gataꞌ, cutu lunëꞌ yöl‑laꞌ rzoalen ngul len cutu lutság naꞌquëꞌ. 36 Cni gac, le cutur latiëꞌ, san lacquëꞌ ca nacquëꞌ gbaz laꞌy queëꞌ Dios, len lacquëꞌ zxiꞌnëꞌ Dios, nup naꞌ lubán lu yöl‑laꞌ gut. 37 Ca naꞌ ral‑laꞌ lubán nup chnatgac, ruluiꞌinëꞌ rëꞌu Moiséscz ga naꞌ nayúj lu guich ca nac qui yag yötsiꞌ regui, ga niꞌ ruꞌë didzaꞌ Xanruꞌ, rnëꞌ naquëꞌ Dios queëꞌ Abraham, len Dios queëꞌ Isaac, len Dios queëꞌ Jacob. 38 Dios naquëꞌ Dios, clëg quegac nup natgac tsaz, san quegac nup nabangac, le nabangac lahuëꞌ Lëꞌ yúguꞌtë bunách, zal‑laꞌ glat luyú ni.

39 Niꞌr gulubiꞌë didzaꞌ laꞌquëꞌ bönniꞌ gdauꞌ usëdi, taꞌnë́ꞌ:

―Bönniꞌ Usëdi, dxíꞌadauꞌ gnauꞌ.

40 Cutur gulurúguinëꞌ laꞌnabnëꞌ Lëꞌ didzaꞌ.

41 Niꞌr Jesús rëꞌ lequëꞌ:

―¿Nacxcz naꞌ taꞌnë́ꞌ: “Cristo naquëꞌ zxiꞌnëꞌ David.”? 42 Davidcz bëꞌë didzaꞌ le nayúj lu guich laꞌy ga nayujgac salmo, rna:

45 Tsal niꞌ tuꞌzë́ naggac Jesús yúguꞌtë bunách nacuáꞌ niꞌ, rëꞌ yuguꞌ bönniꞌ usë́d queëꞌ:

46 ―Gul‑gún chiꞌi cuinliꞌ quequëꞌ bönniꞌ gdauꞌ tuꞌsëdi, le taꞌdzág ládxiꞌquëꞌ taꞌdë́ꞌ nácuquëꞌ lariꞌ tunn, len tëꞌnnëꞌ lulídz lequëꞌ zxön bunách gap nac lu yëꞌy, len taꞌdzág ládxiꞌquëꞌ caꞌ taꞌböꞌë latj blau gap tuꞌdubëꞌ tuꞌsëdëꞌ queëꞌ Dios, len gap taꞌböꞌë tahuëꞌ. 47 Taꞌgǘëꞌ lidxcnu ngul uzëbdauꞌ, len quië luluíꞌ tsahuiꞌ cuinquëꞌ, xtsey tuꞌlidzëꞌ Dios. Yuguꞌ bönniꞌ ni, szxö́nitër gunëꞌ Dios ga laꞌzacaꞌ laꞌguiꞌë.