1 Niꞌr guladxinëꞌ ga zoëꞌ Jesús yuguꞌ bönniꞌ gdauꞌ fariseo len yuguꞌ bönniꞌ gdauꞌ saduceo quië laꞌzíꞌ bëꞌë Jesús, atiꞌ gulanabnëꞌ Lëꞌ gunëꞌ tu le gac bëꞌ ga zaꞌ yöl‑laꞌ uná bëꞌ queëꞌ. 2 Bubiꞌë didzaꞌ Jesús, rëꞌ lequëꞌ:

―Catiꞌ rdzöꞌ, rnaliꞌ cni: “Gun dxiꞌa cxö, le röꞌ böaj xna luzxbá.” 3 Catiꞌ nac zildauꞌ, rnaliꞌ cni: “Cutu gun dxiꞌa naꞌa dza le röꞌ böaj xna len ruchúl luzxbá.” Lbiꞌiliꞌ, bönniꞌ ruluíꞌz tsahuiꞌ cuinliꞌ. Rac gnë yaꞌaliꞌ nac gun luzxbá, san cutu gac tséjniꞌliꞌ le rusëdi le tac dza ni zoaruꞌ naꞌa. 4 Bunách tuaꞌdöꞌ cuzóa gdu ládxiꞌgac taꞌnabi nedaꞌ gunaꞌ tu le gac bëꞌ nu nacaꞌ, san cutu bi le gac bëꞌ laꞌléꞌinëꞌ. Tuz lë naꞌ guc bëꞌ ca guc queëꞌ Jonás, bönniꞌ bëꞌë didzaꞌ uláz queëꞌ Dios laꞌléꞌinëꞌ.

Niꞌr bucaꞌnëꞌ lequëꞌ Jesús, zhuöjëꞌ.

5 Catiꞌ guladxinëꞌ yetsláꞌa nis zxön niꞌ, gláquibeꞌinëꞌ bönniꞌ usë́d queëꞌ Jesús glal ládxiꞌquëꞌ luꞌë le lahuëꞌ. 6 Niꞌr Jesús gudxëꞌ lequëꞌ:

―Gul‑yutscaꞌ. Gul‑gún chiꞌi cuinliꞌ qui le nac ca xnëꞌi yöt xtil quequëꞌ bönniꞌ gdauꞌ fariseo len quequëꞌ bönniꞌ gdauꞌ saduceo.

7 Niꞌr laꞌ légaczëꞌ glun xtídzaꞌquëꞌ bönniꞌ usë́d queëꞌ, taꞌnë́ꞌ:

―Rnëꞌ cni le cunuaꞌruꞌ yöt xtil.

8 Ráquibeꞌinëꞌ lë ni Jesús, atiꞌ rëꞌ lequëꞌ:

―¿Bizx quië run xtídzaꞌliꞌ laꞌ lbiꞌizliꞌ le cunuaꞌliꞌ yöt xtil? Latiꞌz réjlëꞌliꞌ nedaꞌ. 9 ¿Naruꞌ cu réjniꞌtsaliꞌ len cu rajnéytsaliꞌ ca guc quegac gayuꞌ yöt xtil niꞌ, lë naꞌ glahuëꞌ chiʉ́n gayuꞌë bönniꞌ, atiꞌ tsca zian bdöꞌa butubliꞌ? 10 ¿Naruꞌ cu rajnéytsaliꞌ caꞌ ca guc quegac gadx yöt xtil niꞌ, lë naꞌ glahuëꞌ choaꞌ gayuꞌë bönniꞌ atiꞌ tsca zian bdöꞌa butubliꞌ? 11 ¿Naruꞌ cu réjniꞌliꞌ? Cutu bëꞌa didzaꞌ qui yöt xtil catiꞌ gudxaꞌ lbiꞌiliꞌ gun chiꞌi cuinliꞌ qui le nac ca xnëꞌi yöt xtil quequëꞌ bönniꞌ gdauꞌ fariseo len quequëꞌ bönniꞌ gdauꞌ saduceo.

12 Niꞌr gulayéjniꞌnëꞌ cutu gudxëꞌ lequëꞌ Jesús lun chiꞌi cuinquëꞌ qui xnëꞌi yöt xtil, san ral‑laꞌ lun chiꞌi cuinquëꞌ qui le tuꞌsëdnëꞌ yuguꞌ bönniꞌ gdauꞌ fariseo len yuguꞌ bönniꞌ gdauꞌ saduceo.

13 Catiꞌ bdxinëꞌ Jesús lu xyu yödz Cesarea, ga naꞌ rna bëꞌë Filipo, gnabnëꞌ yuguꞌ bönniꞌ usë́d queëꞌ, rnëꞌ:

―¿Nacx taꞌná bunách nu nacaꞌ nedaꞌ, Bönniꞌ Nuhuöaquëꞌ Gdu Bunách?

14 Gulubiꞌë didzaꞌ, taꞌnë́ꞌ:

―Laꞌquëꞌ taꞌnë́ꞌ: “Juan nacuꞌ, bönniꞌ niꞌ buquilëꞌ bunách nis.” Yelaꞌquëꞌ taꞌnë́ꞌ: “Elías nacuꞌ, bönniꞌ niꞌ bëꞌë didzaꞌ uláz queëꞌ Dios dza niꞌtë.” Yelaꞌquëꞌ taꞌnë́ꞌ: “Jeremías nacuꞌ, o yetúëꞌ bönniꞌ bëꞌë didzaꞌ uláz queëꞌ Dios.”

15 Niꞌr Jesús gudxëꞌ lequëꞌ:

―Nazxga lbiꞌiliꞌ, ¿nuzxa rnaliꞌ nacaꞌ nedaꞌ?

16 Bubiꞌë didzaꞌ Simón Pedro, rëꞌ Lëꞌ:

―Liꞌ nacuꞌ Cristo, Zxiꞌnëꞌ Dios ban.

17 Bubiꞌë didzaꞌ Jesús, rëꞌ lëꞌ:

―Bicaꞌ bauꞌ liꞌ, Simón, zxiꞌnëꞌ Jonás, le cutu buluiꞌinëꞌ liꞌ lë ni nu bönniꞌ, san Xuzaꞌ zoëꞌ yehuaꞌ yubá buluiꞌinëꞌ liꞌ lë ni. 18 Nedaꞌ rëpaꞌ liꞌ, liꞌ nacuꞌ Pedro, atiꞌ lu guiöj ni ucuꞌa nup ludúb quiaꞌ, atiꞌ yöl‑laꞌ uná bëꞌ qui tuꞌ xöhuiꞌ cutu saquiꞌ uzagaꞌ xnözquëꞌ. 19 Gunnaꞌ quiuꞌ yuguꞌ zxiꞌn guia qui latj ga rna bëꞌ Nu zoa yehuaꞌ yubá. Le gna bëꞌu luyú ni, chgna bëꞌ caꞌ Nu naꞌ zoa yehuaꞌ yubá, atiꞌ le guꞌu latj gac luyú ni, chbëꞌ latj gac lë naꞌ Nu naꞌ zoa niꞌ yehuaꞌ yubá.

20 Niꞌr Jesús gna béꞌinëꞌ yuguꞌ bönniꞌ usë́d queëꞌ nutu nu lëꞌë naquëꞌ Lëꞌ Cristo.

21 Laꞌ dza niꞌz gzu lahuëꞌ Jesús rguíxjöiꞌnëꞌ yuguꞌ bönniꞌ usë́d queëꞌ run bayúdx tsijëꞌ Jerusalén, atiꞌ niꞌ lusacaꞌ ziꞌë Lëꞌ yuguꞌ bxuz uná bëꞌ len bönniꞌ gul tuꞌzejniꞌi, len bönniꞌ gdauꞌ tuꞌsëdi, atiꞌ niꞌr ludöddëꞌ Lëꞌ, san catiꞌ gac tsonn dza ubanëꞌ lu yöl‑laꞌ gut. 22 Niꞌr quizi bchëꞌë Jesús Pedro len gzu lahuëꞌ rdil‑lëꞌ Lëꞌ didzaꞌ, rnëꞌ:

―Xan, cutu guꞌë latj Dios. Cutu caꞌ gac quiuꞌ ca rnauꞌ.

23 Niꞌr bueycjëꞌ Jesús, len rëꞌ Pedro:

―Bcuit ga zoaꞌ. Runuꞌ ca run Satanás, tuꞌ xöhuiꞌ. Runuꞌ ga gac chop ladxaꞌa le cutu nac ca rzaꞌ ladxëꞌë Dios le rzaꞌ ladxuꞌu liꞌ, san ca taꞌzáꞌz ládxiꞌgac bunách.

24 Niꞌr Jesús gudxëꞌ yuguꞌ bönniꞌ usë́d queëꞌ, rnëꞌ:

―Chquiꞌ zoëꞌ bönniꞌ rëꞌnnëꞌ tëꞌë nedaꞌ, ral‑laꞌ uzóëꞌ tslaꞌl yuguꞌ le rzë ladxëꞌë, len gaquëꞌ ca tu bönniꞌ zijëꞌ zajtë́ꞌë lëꞌi yag cruz, atiꞌ niꞌr gac tëꞌë nedaꞌ. 25 Nu bönniꞌ guëꞌnnëꞌ gun chiꞌë yöl‑laꞌ naꞌbán queëꞌ, unitiëꞌ lei, san bönniꞌ unitiëꞌ yöl‑laꞌ naꞌbán queëꞌ le dëꞌë nedaꞌ, gataꞌ queëꞌ yöl‑laꞌ naꞌbán gdu. 26 ¿Bizxa uziꞌtsëꞌ xbey bönniꞌ chquiꞌ utubëꞌ yúguꞌtë le dë yödzlyú ni san unitiëꞌ yöl‑laꞌ naꞌbán gdu queëꞌ? ¿Bizxa caz gac unödzjëꞌ bönniꞌ quië gataꞌ queëꞌ yöl‑laꞌ naꞌbán gdu? 27 Cni rniaꞌ, le huödaꞌ nedaꞌ, Bönniꞌ Nuhuöaquëꞌ Gdu Bunách, dzag nedaꞌ yöl‑laꞌ yeníꞌ queëꞌ Xuzaꞌ Dios, len dzagquëꞌ nedaꞌ gbaz laꞌy quiaꞌ. Niꞌr ubiꞌa qui queë bunách tsca nac le nungac. 28 Le nactë rëpaꞌ lbiꞌiliꞌ: “Cutu caꞌ lat laꞌgac nup nacuáꞌ ni catiꞌ laꞌleꞌir duná bëꞌa nedaꞌ, Bönniꞌ Nuhuöaquëꞌ Gdu Bunách.”