1 Ba zua gagu laní gate dxelawe̱' xeta xtila da quebe nachixre cua zichaj chee̱ xeta xtila, da naca na Laní Pascua gate dxulusá lazre̱' ca da be̱n Dios gate bebéaje̱' bénneache chee̱' lu xe̱zr la xu Egipto. 2 Lu zra ca' benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na belílaje̱' ájala xelune̱' xelútie̱' Jesús bagácheze, lawe' da dxelezrebe̱' da xelún benne' zan ca'.

3 Nadxa guxú'u Satanás da xriwe̱' lu lázrdau Judas, bénnea' cá'anqueze le̱' Iscariote. Naque̱' tu benne' chazrinnu gubáz ca' chee̱ Jesús. 4 Judas nigá guxíaje̱' xeajchálajle̱ne̱' benne' xíchaje̱ ca' chee̱ bxruze ca', ne benne' blau ca' chee̱ xudau', na' bchálajle̱ne̱' benne' ca' ájala gune̱' gudée̱' Jesús lu na' benne' ca'. 5 Benne' caní gulebene̱', na' guleche̱be lazre̱' xulunézruje̱' le̱' dumí. 6 Judas na' guzí' lu ne̱'e̱ dumí na', na' guzú lawe̱' dxílaje̱' ájala gune̱' gudée̱' Jesús lu na' benne' ca' gate quebe nu chilá' benne'.

7 Bzrin zra laní gate dxelawe̱' xeta xtila da quebe nachixre cua zichaj chee̱ xeta xtila, gate dxal-la' xelútie̱' zríla'dau' ca' chee̱ Laní Pascua. 8 Na' Jesús gusel-le̱' Pedro ne Juan, na' guzre̱'-be':

―Le chjaca, ne le gucuéza da gágudxu chee̱ Laní Pascua.

9 Benne' caní buluche̱be̱' Le̱':

―¿Ga dxaca lazru' gucuézentu' na?

10 Na' beche̱be Jesusen':

―Gate chu'ule lu xe̱zre, na' xezrágale tu benne' biu zenu'e̱ tu dxe'e nisa. Le chjácale̱ne̱' xu'u naga xezrine̱', 11 na' le xe̱ xrane xu'u na': “Benne' Wese̱de dxe̱'e̱ lue': ¿Ga zua xu'u naga gágule̱na' benne' ca' dxusé̱dea' zríla'dau' chee̱ Laní Pascua?” 12 Nadxa gulé'ene̱' le'e tu xu'u zren da zua chupa cuia sibe, da bache nucá'ana chawe'. Le gucuéza da gágudxu na'.

13 Benne' ca' xjaque̱', na' belezrélene̱' xúgute̱ ca da ba guzre Jesús le̱', na' bulucueze̱' da xelawe̱' chee̱ Laní Pascua.

14 Gate bzrin zra, Jesús ne benne' ca' dxusé̱dene̱' gulezré̱'e̱ ga xelawe̱' na. 15 Nadxa gunná Jesús, dxe̱'e̱ benne' ca':

―Guzá lázrele̱'a gágule̱na' le'e chee̱ Laní Pascua nigá nédxudxa ca quebe ne gatia'. 16 Dxapa' le'e québedxa gawa' da nigá cadxa gaca li na naga dxenná bea Dios.

17 Nadxa guqué̱'e̱ tu zruágadau', na' guzre̱' Dios: “Xcalenu'”, na' gunné̱':

―Le xi'aj late' weaj tu tule le'e. 18 Dxapa' le'e québedxa xí'aja' chee̱ nisa uva caní cadxa xida xel-la dxenná bea chee̱ Dios.

19 Nadxa guqué̱'e̱ xeta xtila, ne guzre̱' Dios: “Xcalenu'”, na' bzúzruje̱' na, ne bnézruje̱' na benne' ca', dxenné̱':

―Da nigá naca na be̱l-la' dxen chia', da guzúa' waláz chee̱le. Le gun da nigá chee̱ cheajsá lázrele chia' neda'.

20 Cá'anqueze be̱ne̱' nen zruágadau' na' ca gudé gulawe̱' xrche', na' gunné̱':

―Zruágadau' nigá zéaje̱ na xel-la wezría cube, da guzúa chúchua' nen dxen chia', da gulálaja' waláz chee̱le.

21 ’Na'a, zrua na' benne' biu na' tu zren nen na'a ga zua da dxágadxu, bénnea' gudée̱' neda' lu na' benne' dxeledábague̱' neda'. 22 Neda', Benne' Gulje̱' Bénneache, waxá'a lu neza da ble'e Dios neda' naga gatia', san edxugúa bénnea' gudée̱' neda' chee̱ gatia'.

23 Nadxa benne' ca' dxuse̱de Jesús gulezú lawe̱' dxuluche̱be ljwezre̱' nu na' gudé Jesús.

24 Cá'anqueze buluche̱be ljwezre̱' nule̱' gácadxe̱' benne' blau. 25 Na' Jesús guzre̱' le̱':

―Benne' wenná bea chee̱ xe̱zr la xu ca' dxelenná bé'ene̱' bénneache ca xrane bénneache ca', na' benne' xíchaje̱ chee̱ benne' ca' dxelenné̱' zaj naque̱' benne' dxelune̱' da chawe' chee̱ benneáche ca'. 26 Le'e quebe dxal-la' gunle ca'. Benne' nácadxe̱' blau ládujla le'e dxal-la' gaque̱' ca benne' nácadxe̱' cuide', na' benne' dxenná be'e̱ dxal-la' gaque̱' ca benne' nada'u chee̱ ljwezre̱' ca'. 27 ¿Nu nácadxa blau, benne' dxe'e̱ dxawe̱', che benne' dxudée̱' xel-la wagu? ¿Quebe naca bénnea' dxe'e̱ dxawe̱'? Neda' zúale̱na' le'e ca tu benne' dxune̱' zrin chee̱le.

28 ’Le'e guzúale̱quezle neda' gate neda' guzí guzaca'. 29 Chee̱ le̱ na' dxunna' le'e lataj nna beale, ca be̱n Xra', be̱nne̱' na neda', 30 chee̱ xi'aj gágule ga naca chia' naga nna be'a neda', na' cue'le lataj blau ca' chee̱ guchí'ale chee̱ chazrinnu cue' xrtia Israel.

31 Na' gunnáqueze Xránadxu:

―Simón, Simón, Satanás, da xriwe̱' ba gunaba na le'e chee̱ seque gudé na le'e lu dul-la ca dxun tu benne' dxudxixre dxutul-le̱' xizre za. 32 Neda' guta' xueda' Xra' gácale̱ne̱' lue' chee̱ quebe guníteu' xel-la dxeajlí lazre chiu'. Na' lue', gate bache bexacu' dipa lazre', gúcale̱ le sa' ljwezru' ca' chee̱ xelezé̱ chache̱'.

33 Na' gunná Simón, guzre̱' Jesús:

―Xran, ba zúaqueza' sá'le̱na' Lue' lizre xia, ne chee̱ gátequeza' nen Lue'.

34 Jesús guzre̱' le̱':

―Pedro, dxapa' lue', ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'.

35 Nadxa Jesús bche̱be̱' benne' ca':

―Gate gusel-la' le'e quebe bíale xixruj, ne naga cu'ule dumí, ne zrélale, ¿bxázrjele bi da guchínnele?

Benne' ca' belexeche̱be̱':

―Gutu bi de̱.

36 Nadxa guzre̱' benne' ca':

―Na'a, benne' nape̱' xixruj dxal-la' gu'e̱ na, ne naga dxugu'e̱ dumí. Bénnea' quebe nape̱' xia da dxuluchínene̱' lu wedil-la, dxal-la' xexutie̱' xicha chee̱', na' si'e̱ xia chee̱'. 37 Dxapa' le'e dxal-la' gaca chia' néda'queza' ca da naxúaj na lu xiche chee̱ Dios, dxenné̱': “Gubabe̱' ca tu benne' we̱n da zrinnaj.” Xúgute̱ da naxúaj na chia' dxal-la' gaca li na.

38 Nadxa benne' ca' gulenné̱':

―Xran, nigá de̱ chupa xia.

Le̱' beche̱be̱':

―Da naze.

39 Nadxa bedxúaj Jesús xu'u na', na' ca dxúnqueze̱', guxíaje̱' lu Xi'a Xaga Olivo, na' benne' ca' dxusé̱dene̱' xjácale̱ne̱' Le̱'. 40 Gate belezrine̱' na', Jesús guzre̱' le̱':

―Le naba lau Dios chee̱ quebe seque da xriwe̱' cu'u na le'e lu dul-la.

41 Nadxa Jesús guzé̱'e̱ ca tu legu'una xiaj naga zaj zra' benne' ca', na' bzu zribe̱' bchálajle̱ne̱' Dios. 42 Gunne̱':

―Xrae, che dxaca lazru', bcuasa neda' ca naca da dxal-la' saca', da naca na ca tu da sla' da dxal-la' xí'aja', quegá gaca na ca dxaca lazra' neda', san ca dxaca lazru' Lue'.

43 Nadxa ble'e lau naga zua Jesús tu gubáz chee̱ xabáa, na' btipe̱' lazre' Jesús. 44 Gate ne dxezácale̱'e̱, du lazre̱' bchálajle̱ne̱' Dios, na' xesa chee̱' guca na ca dxen dxelezrún na lu xu.

45 Ca bexuzre bchálajle̱ne̱' Dios, na' bexase̱', na' bezrine̱' naga zaj zra' benne' ca' dxusé̱dene̱', na' blé'ene̱' dxelase benne' ca', lu xel-la dxelexewi'ine lazre' chee̱'. 46 Nadxa guzre̱' benne' ca':

―¿Dxáselale le'e na'a? Le chasa, ne le naba lau Dios chee̱ quebe seque da xriwe̱' cu'u na le'e lu dul-la.

47 Ne dxuchálajte̱ Jesús gate belelá' benne' zan ca'. Bénnea' le̱' Judas, tu benne' chazrinnu ca', ze̱'e̱ zria lawe̱' lau benne' ca', na' gubigue̱' cuita Jesús chee̱ gunupe̱' Le̱'. 48 Nadxa Jesús guzre̱' le̱':

―Judas, ¿dxunupu' neda', Benne' Gulje̱' Bénneache, chee̱ gudéu' neda' lu na' benne' dxeledábague̱' neda'?

49 Benne' ca' zrále̱ne̱' Jesús, ca belelé'ene̱' ca da dxaca, na' buluche̱be̱' Jesús:

―Xran, ¿guchínentu' xia?

50 Tu benne' ca' dxedále̱ Jesús be̱ne̱' zi' tu bi we̱n zrin chee̱ bxruze blau, guchugue̱' nágabe' zua xabe̱la. 51 Jesús gunné̱':

―Québedxa gunle ca'. Cá'anze.

52 Na' guzre̱' benne' xíchaje̱ ca' chee̱ bxruze, ne benne' blau ca' chee̱ xudau', ne benne' gula sina ca', benne' zá'aque̱' xeleché̱'e̱ Jesús, gunné̱':

―¿Blale le'e nen xia, ne xaga chee̱ qué̱lale neda' ca dxé̱lale tu gubán? 53 Gate guzúa' neda' lu xudau' nen le'e tu zra tu zra, quebe bi be̱nle le'e chia', san zra nigá naca na zra chee̱le, gate dxenná bea da zua na lataj chul-la.

54 Nadxa gule̱le̱' Jesús, na' guleché̱'e̱ Le̱' lizre bxruze blau, na' Pedro zíaje̱' nawe̱' Le̱' zítu'la. 55 Na' gulebé'e̱ guléchaje̱' xi' na', na' Pedro gudxé'e̱ ládujla benne' ca'. 56 Nadxa tu nu'ula we̱n zrin, gate blé'ene̱' Pedro dxe'e̱ dxu'a xi' na', guzúe̱' dxenné̱'e̱ le̱', na' gunné̱':

―Cá'anqueze benne' nigá guque̱' tuze le̱n Jesús.

57 Pedro gunné̱':

―Nu'ula, quebe núnbe'a bénnea'.

58 Xetú chí'idau' guca, na' ble'e xetú benne' xula Pedro na', na' gunné̱':

―Cá'anqueze lue' nacu' tu zren benne' ca'.

Pedro gunné̱':

―Cabí. Quebe naca ca'.

59 Xelate gudé na', xetú benne' be̱n chúchue̱' xrtizre̱', gunné̱':

―Da li, benne' nigá guque̱' tuze le̱n Jesús, lawe' da naque̱' benne' Galilea.

60 Nadxa gunná Pedro:

―Benne', quebe nezda' nu chee̱ na' dxuchálaju'.

Dxácate̱ na' ne dxuchálajte̱ Pedro ca', na' gudxezre xjeaj. 61 Nadxa Xránadxu bzechaj xíchaje̱', gunné̱'e̱ Pedro, na' Pedro xeajsá lazre̱' ca da guzre Xránadxu le̱', gunné̱': “Ná'ate̱la ne dé̱dxela cuezre xjeaj, lue' wannáu' chunna lasa quebe núnbe'u neda'.” 62 Nadxa bedxúaj Pedro, na' gudxezre xáche'le̱'e̱.

63 Na' benne' ca' zaj nuxre̱' Jesús belún le̱' chee̱', na' buluzalje̱' Le̱'. 64 Bulucache̱' lawe̱', na' belegape̱' xrague̱', dxelé̱'e̱ Le̱':

―Gunné̱ xa'a nu be̱ Lue'.

65 Da zan da gulenné̱', dxelenné̱' schanni' chee̱ Jesús.

66 Gate naca te zra, na' belezraga benne' gula sina ca' chee̱ judío ca', ne benne' xíchaje̱ ca' chee̱ bxruze ca', ne benne' ca' dxuluxuzájle̱'e̱ da nadxixruj bea na, na' guleché̱'e̱ Jesús lau benne' ca' chee̱ xu'u lawe' blau chee̱ judío ca'. Na' buluche̱be̱' Le̱':

67 ―Gunná, ¿nacu' lue' Cristo?

Na' beche̱be Jesús:

―Che xapa' le'e: Awe', quebe chéajle̱le, 68 na' che bi guche̱ba' le'e, quebe xeché̱bele chia', ne quebe gusanle neda'. 69 Ná'ate̱la neda', Benne' Gulje̱' Bénneache, cue'a chalá'a xabe̱la chee̱ Dios nape̱' dute̱ xel-la waca.

70 Nadxa xúgute̱' buluche̱be̱' Le̱':

―¿Nacu' Lue' Zri'ine Dios?

Jesús beche̱be̱':

―Naca', ca dxennáquezle le'e.

71 Nadxa gulenná benne' ca':

―¿Núzradxa chínnedxu bi nne̱' chee̱ benne' nigá? Dxí'uqueze ba bénedxu ca da gunnáqueze̱'.