1 Der bicy na, rlagya̱ nu gyezaꞌ lagy der de coz nu bzac de gyitoo bel ne̱ de̱. Ñgyoozh gusa num dey lat tub nac za, nunu dela dey bded nap yu lo nisyudoo ña. 2 Orzeꞌ nu nac nu gusa dey lat za zeꞌ, nunu bded dey lo nisyudoo zeꞌ, orzeꞌ byac dey mbecy nu bzuub gyidag ni Moisees, gal nu byacaꞌ de ub na mbecy nu zuub gyidag ni Jesuuz ornu bzu nis den. 3 Dela dey bdow yu coz nu bruu lo Ñgyoozh. 4 Nunu goꞌ dey nis nu briic Ñgyoozh ornu Moisees pshet yu yangay ich gyitaꞌ. Tees walab Moisees bicy yu nu bruu nis zeꞌ lo gyitaꞌ, sinu Crisht bicy mi nu bruuñ, gun mi zeꞌ gusa num dey. 5 Mas ni, tees zigy dey wangyet lagy Ñgyoozh mod nu bicy dey. Orzeꞌ ndeꞌ nu gut dey lugaar ub zi zeꞌ nu gusa dey zeꞌ.

6 De coz nu guc zeꞌ, ndeꞌ cyiiñ ñi par nu lyuuñ ni de ub na nu cueꞌ galagy na gyicy na coz cyi gal nu bicy de gyitoo bel ne̱ de̱. 7 Nunu cueꞌ griib zily den nab gal nu bicy la be de mbecy lat de yu zeꞌ. Gun lat riidz nu bzeeñ Ñgyoozh rniiñ: “De mbecy gucua dey row yu gyit. Gazeꞌ nu wes su dey nu rulgyiꞌy lo nab”, rniiñ. 8 Nunu cueꞌ gyicy den cyi nu losaꞌn nu wanchelaan gal nu bicy la be mbecy lat de yu zeꞌ. Orzeꞌ nañ tub dzi ziꞌl gut gal zu chon miily de yu nu bicy de cyi zeꞌ. 9 Nunu cueꞌ gyicy den preb Ñgyoozh, Shuaan na, gal nu bicy la be de gyitoo bel ne̱ de̱. Orzeꞌ gut dey nu nac nu bducuaꞌ bily yu. 10 Ni cueꞌ nii zi den ni Ñgyoozh gal nu bicy la be de gyitoo bel ne̱ de̱. Orzeꞌ tub anc nu la Anc nu Rbic Cashtig ni Ñgyoozh biit yu dey.

11 Dela coz nu bzac de gyitoo bel ne̱ de̱ gulas, ndeꞌ par nu gad lagy mbecy nu gyicy cuidad dey ub yu. Nunu dela ndeꞌ pcañ lat de riidz nu bzeeñ Ñgyoozh par nu gad lagy den lac mod chuꞌn tiem na. Nunu na sñuu ga shuub dzi nu gyaꞌ lo dela coz. 12 Orzeꞌ ndeꞌ nu de mbecy nu rzii nu dzi fert ricy cup consuel lo Crisht, rlagy ñi nu gyicy cuidad dey ub yu nis gyicy cyi gan dey. 13 Dela de coz deet nu rzac den, ndeꞌ coz nu rzac deꞌ zir de mbecy. Tees Ñgyoozh ricy paam nu de ub na. Orzeꞌ mi zeꞌ wazaan mi nu gzac zi den ni de coz gashtal wagagyee gaꞌ la den de coz ily nu yad, sinu tiem nu gzac deet den, orzeꞌ Ñgyoozh locyuub mi de ub na nu gad tub mod nu gyicy den gan.

14 Orzeꞌ der bicya̱ nu dzi rca̱, rila cueꞌ griib zily der nab. 15 Ya̱ rne̱e̱ lo der gal nu rne̱e̱ lo de mbecy nu yet lag cuen. Orzeꞌ gush der shcab ni de coz nu rne̱e̱ ben a rishli. 16 Despuees ornu dric den gras ni Ñgyoozh, orzeꞌ rdoꞌn ñup ni urbyay mod nu bzeeñ Jesucrisht. Orzeꞌ ral den gyel nap ni nu pshu reñ mi lo cruuz. Nunu ornu rdow den gyishtily mod nu bzeeñ mi, orzeꞌ ral den gyel nap ni cuerp nim. 17 Mas zigy den nac naa, tees dela den rdow na laab tub ziꞌl gyishtily zeꞌ. Orzeꞌ lo dela den tub zin nac naa.

18 Güii der la ricy de mbecy Israeel. Row dey de gun nu rbic mbecy lo Ñgyoozh. Nunu ornu ni ricy dey, orzeꞌ ral dey gyel nap nu druu lo gun zeꞌ. 19 Walab nu rne̱e̱ nu nab, ndeꞌ coz nu cyiiñ. Nunu walab nu rne̱e̱ nu beel nu gua lo nab, ndeꞌ cyiiñ ñi. 20 Sinu rlagya̱ ne̱e̱ nu de gun nu rbic mbecy lo nab, ndeꞌ walab lo Ñgyoozh rbic dey ñi sinu lo nuras. Nunu ya̱ walagya̱ gal der coz nu druu lo nuras. 21 Wac gal der gyel nap nu druu lo Shuaan den ornu row der gyishtily mod nu bzeeñ mi, benu laab tiem zeꞌ galaꞌ der coz nu druu lo nuras. Nunu wac gal der gyel nap ornu roꞌ der ñup ni urbyay mod nu bzeeñ mi, benu laab tiem zeꞌ galaꞌ der coz nu druu lo nuras.

22 ¿Uti rlagy der gyicy den nu gasaap lagy Shuaan den? ¿Uti rzii der nu fert zir de ub na gazeꞌ ub mi?

23 Yuꞌ mbecy rniiy: “Gac gyicya̱ la ziꞌl coz nu yad ica̱”, rniiy. Rishli rniiy tees walab dela coz cyiiñ ñi ni den. Gac gyicy den la ziꞌl coz tees walab dela coz locyuub ñi nu gyanap den. 24 Rlagy ñi yub den mod nu nap zir par deꞌ zir mbecy. Cueꞌ mod nu nap par ub ziꞌl den.

25 Gac gow der la ziꞌl coz nu rut mbecy zeꞌ nu rsaꞌy de beel. Nunu walagy ñi nu cugyiꞌ der lo de mbecy nu rut beel zeꞌ par nu rdzib der nu gad beel nu gua lo nab. 26 Gun gyishlombecy, gal nu dela coz nu yuꞌ lo yu ii, dela ndeꞌ coz ni Ñgyoozh.

27 Benu tub mbecy nu walab mbecy ni Crisht cuedz yu der nu gow nu der yu gyit, zeꞌ benu shet ic der gow nur yu, orzeꞌ gow laa der la ziꞌl coz nu gzuy lo der. Walagy ñi nu cugyiꞌ der loy nu nac nu rdzib der nu gow ru coz nu gua lo nab. 28 Tees benu tub mbecy niiy lo der: “Nii beel nu gua lo nab”, niiy, orzeꞌ cueꞌ gow der ñii, gun cueꞌ nu gyicy ras nu der yu, nunu cueꞌ nu gyicy der nu gnu shcab niy. 29 Walab de ru gnu shcab nir, gun de ru rad lagy ru nu beel nu gua lo nab se la la gyicy ñi. Sinu gnu shcab ni mbecy zeꞌ, gun yu zeꞌ wagad lagy yu.

Tees yuꞌ mbecy rniiy: “¿Lagu nu nac nu dzi ta ricy reñaꞌ mbecy wac gyicya̱ la ziꞌl coz nu yad ica̱? 30 ¿Lagu rnii zi mbecy ne̱ ornu rda̱w la coz, zeꞌ benu drica̱ gras ni Ñgyoozh nu nac ñii?” rnii dey. 31 La ziꞌl coz nu gyicy der, nu gow der o nu goꞌ der o la ziꞌl coz nu gyicy der, bicy der mod nu gyabic mbecy gyel mbecy ni Ñgyoozh. 32 Cueꞌ cuic der mod nu chuꞌ gyel deet lat ni tub la mbecy: ni lat de mbecy Israeel, ni lat de mbecy nu walab mbecy Israeel, ni lat de mbecy ni Crisht. 33 Niꞌ ziꞌl ya̱ ricya̱ tub mod nu gyedzuꞌ lagy dela mbecy. A̱ꞌ yuba̱ mod nu gyedzuꞌ lagy ub ziꞌla̱, sinu ryuba̱ mod nu nap par nu gyedzuꞌ lagy deꞌ zir mbecy, ben a wayicy cup dey consuel lo Crisht. Orzeꞌ gruu mbañ dey.