1 Ke len naꞌ bibi de wdeꞌroꞌ noteze nakoꞌ rweꞌ beꞌnnach, chaꞌ ll-lliayiꞌlloꞌ beꞌnn yobre, le katenꞌ ll-lliayiꞌlloꞌ beꞌnn yobre, ll-lliayiꞌllkze kwinoꞌ, le toz ka llonkzoꞌ, ka llon leakeꞌ naꞌ. 2 Nnézkzello Dios naꞌ, goneꞌ da saꞌkziꞌllo, ni ke da xhinnjenꞌ llonllo, ka da kaꞌ ba bniaꞌ naꞌ, naꞌ zejkze lixhej kanꞌ goneꞌ naꞌ. 3 ¿Naꞌ llakroꞌ chaꞌ bibi gonn Diosenꞌ da saꞌkziꞌo chaꞌ ll-lliayiꞌlloꞌ beꞌnne, naꞌ naoteꞌo llonoꞌ kanꞌ llon akeꞌn naꞌ? Bi llayaꞌl gakroꞌ waraꞌo rao yel llzaꞌkziꞌ ke Diosenꞌ, ka nak da kaꞌ llonoꞌ naꞌ. 4 ¿Bi llakbeꞌroꞌ Diosenꞌ nakeꞌ beꞌnn chaꞌo, naꞌ beꞌnn xhenraꞌlle laꞌkze napllo doꞌle? Diosenꞌ lloneꞌ kaꞌ nench gakbeꞌroꞌ da xhinnjenꞌ llonoꞌ, naꞌ yeyatroꞌ. 5 Rweꞌ nakoꞌ beꞌnn zid kwis, bi llayatroꞌ da xhinnj kaꞌ llonoꞌn, naꞌ llonlloꞌ biꞌch da xhinnj koꞌon nench waslliꞌoll Diosenꞌ da wsaꞌkzieꞌ rweꞌ kate llin lla wchoybieꞌ ke beꞌnnach. Kanaꞌ wroeꞌn zejkzeꞌ lixhej kanꞌ wchoyeꞌ saꞌkziꞌ toto beꞌnn ren yeolol da ben akeꞌ. 6 Kanaꞌn goneꞌ ke totollo kon ka ben totollo. 7 Weꞌe yel nban zejlikane ke beꞌnn kaꞌ gon da wen laꞌkze biteze yellayrao akeꞌ, beꞌnn kaꞌ llayirjlaꞌlle akre gon akeꞌ nench yedoꞌl akreꞌ ganꞌ llia Dios ke chnare, naꞌ nench yeyazraꞌll Diosenꞌ kanꞌ gon akeꞌ naꞌ, naꞌ nench goneꞌ leakeꞌ beꞌnn zaꞌke. 8 Naꞌ gaklleꞌe weꞌe yel llzaꞌkziꞌ ke beꞌnn kaꞌ llon kon da nen ke akeꞌ, naꞌ bi llejleꞌ akeꞌ diꞌll li ke Diosenꞌ, llon akeꞌ kanꞌ ne da xhinnjenꞌ. 9 Yeolol beꞌnnach llon da xhinnj saꞌkziꞌ akeꞌ yellayrao akeꞌ, zgaꞌtek beꞌnn Israel kaꞌ yellayrao, naꞌtellre noteze beꞌnn bi nak beꞌnn Israel. 10 Zan beꞌnn kaꞌ llon da wen, weꞌe Diosenꞌ leakeꞌ yel banez ke akeꞌ, naꞌ yel baraꞌnne, naꞌ goneꞌ so akeꞌ wen. Zgaꞌtek beꞌnn Israel kaꞌ, naꞌtell yezikre nollre beꞌnne.

11 Diosenꞌ bi llaleꞌe ke ke beꞌnne. 12 Beꞌnn kaꞌ bi nombiaꞌ ley danꞌ bzoj da Moisésenꞌ, naꞌ llon akeꞌ da xhinnj, Dios naꞌ goneꞌ da kweyiꞌ akeꞌ laꞌkze bi nombiaꞌ akeꞌ ley naꞌ, wchoybieꞌ ke akeꞌ le nnez akreꞌ llon akeꞌ da xhinnj naꞌ. Naꞌ beꞌnn kaꞌ nombiaꞌ akseꞌ leyenꞌ, naꞌ llon akeꞌ da xhinnj, Diosenꞌ wchoybieꞌ ke akeꞌ kon ka ne ley naꞌ. 13 Kere danꞌ yénzello ley naꞌ, gaktello beꞌnn wen rao Dios, llayaꞌl gonllo kanꞌ nen naꞌ, naꞌllenꞌ gakllo beꞌnn wen raweꞌn. 14 Beꞌnn bi nake beꞌnn Israel, bi nombiaꞌ akeꞌ ley danꞌ bzoj da Moisésenꞌ. Laꞌkze bi nombiaꞌ akeꞌ leyenꞌ, kon lo raꞌlldaꞌo akeꞌ naꞌ, llwia akeꞌ, naꞌ llon akeꞌ da wen naꞌ, naꞌllenꞌ naksen ka to ley ke akeꞌ. 15 Nnezjekze lo raꞌlldaꞌo akeꞌn llayaꞌl gon akeꞌ ka danꞌ nllia leyenꞌ biaꞌa gon akeꞌ naꞌ, le llon akeꞌ raꞌt wejenꞌ. Naꞌllenꞌ nneze yichjraꞌlldaꞌo akeꞌn danꞌ llon akeꞌn, chaꞌ naken wen o chaꞌ naken da xhinnj. 16 Kanꞌ gak kate llin lla gon Diosenꞌ rao naꞌa Jesucristonꞌ, choyraweꞌ ke bi da ba ben totollo laꞌkze da ngaꞌche, chaꞌ da wen o chaꞌ da xhinnj. Kanꞌ niaꞌ katenꞌ llyixjweꞌraꞌ Diꞌll Wen ke Jesucristonꞌ.

17 Rweꞌ neꞌo nakoꞌ beꞌnn Israel, cheke llakroꞌ zoꞌo wen rao Dios, naꞌ nxenraꞌlloꞌ danꞌ nombiaꞌo ley naꞌ, naꞌ llonxhen kwinoꞌ rao Dios. 18 Naꞌ nombiaꞌo akrenꞌ llazraꞌll Diosenꞌ, naꞌ llakbeꞌroꞌ binꞌ nak da wen, naꞌ binꞌ nak da xhinnj. 19 Naꞌ llakroꞌ zaꞌkroꞌ koꞌ nez beꞌnn kaꞌ bi nombiaꞌ xtiꞌll Diosenꞌ, naꞌ koꞌ beniꞌ lo yichjraꞌlldaꞌo beꞌnn bi nombiaꞌ Dios. 20 Naꞌ llakroꞌ wak wzejnieꞌroꞌ beꞌnn bi llejnieꞌ, naꞌ llakroꞌ wak wroeꞌ wsedroꞌ beꞌnn kobe xtiꞌll Diosenꞌ, le neꞌo nombiaꞌo diꞌll li keꞌen, danꞌ nsaꞌa doxhen danꞌ llayaꞌl nneze beꞌnne. 21 Rweꞌ llroeꞌ llsedroꞌ beꞌnn yobre, ¿bixchen bi llroeꞌ llsedre kwinoꞌ? Rweꞌ neꞌo bi llayaꞌl kwanllo, ¿bixchen llbanoꞌ rweꞌ? 22 Rweꞌ neꞌo nono gak tarén xhoꞌr beꞌnne o xhyio beꞌnne, ¿bixchen llonoꞌ rweꞌ kaꞌ? Rweꞌ llwieroꞌ lwaꞌa da llonliraꞌll beꞌnne, ¿bixchen lljalanoꞌ ganꞌ nkwaꞌa aken naꞌ? 23 Llonxhen kwinoꞌ kwis danꞌ llsedoꞌ leyenꞌ, naꞌ lltitjroꞌ Diosenꞌ le bi llonoꞌ kanꞌ nen naꞌ. 24 Ke len naꞌ nyoj xtiꞌll Diosenꞌ nen: “Ni ke reꞌn nnechach akeꞌ ke Diosenꞌ, beꞌnn kaꞌ bi nak beꞌnn Israel.”

25 Chaꞌ llonllo kanꞌ ne ley naꞌ, zaꞌksen danꞌ ba bzollo sen danꞌ nziꞌi circuncisión leꞌ kwerp kellonꞌ, danꞌ zeje diꞌll, lliꞌo beꞌnn Israel nakllo yell ke Diosenꞌ. Naꞌ chaꞌ bi llonllo kanꞌ ne leyenꞌ, bibi zaꞌken danꞌ ba bzollo sen naꞌ. 26 Naꞌ chaꞌ beꞌnn laꞌkze bi nna soeꞌ sen naꞌ, naꞌ lloneꞌ kanꞌ ne ley ke Dios naꞌ, nakseꞌ txhen ren beꞌnn kaꞌ zo sen naꞌ. 27 Naꞌ beꞌnn kaꞌ llon kanꞌ ne ley naꞌ, laꞌkze bi zo akeꞌ sen danꞌ nziꞌi circuncisión naꞌ, leakeꞌ wroeꞌ akreꞌ de doꞌl keré, le nere nzedre leyenꞌ, naꞌ bi llonre kanꞌ nen naꞌ. 28 Kere nello nakllo dogarj beꞌnn Israel danꞌ naollo ka danꞌ nao leakeꞌ naꞌ, naꞌ danꞌ zollo sen to koꞌllre kwerp kellonꞌ. 29 Gakllo dogarje beꞌnn Israel chaꞌ llonliraꞌll-llo Diosenꞌ do yichj do raꞌll-llo. Naꞌ danꞌ ne akeꞌ zo akeꞌ sen naꞌ, lliꞌo ba nakllo ka to beꞌnn zo sen lo yichjraꞌlldaꞌo. Naꞌ ka nak da ni, kere leꞌ yichenꞌ llzejnieꞌn lliꞌo gonllo da ni, Spíritu naꞌkzenꞌ ba yoꞌn lo yichjraꞌlldaꞌollo llzejnieꞌn lliꞌo. Naꞌ beꞌnnenꞌ llon ki, llayazraꞌll Diosenꞌ leꞌe, laꞌkze beꞌnnach yobre bi llayazraꞌlleꞌ kanꞌ lloneꞌ.