1 Kate' betj Jesusen' ḻaw ya'a na', benne' zan zjákḻene' Ḻe'. 2 To benne' de'e yižwé' leže bžine' gan zoa Jesusen'. Bzoa ẕibe' x̱ni'e, na' gože' Ḻe':

—X̱an, cha' žénelo', wak yeyono' neda'.

3 Naž Jesusen' ḻa' bḻite ne'e, na' wdane' ḻe'. Gože' ḻe':

—Žénela'. Yeyako' chawe'.

Ḻa' benitte yižwé' che bennen'. 4 Naž Jesusen' gože' ḻe':

—Bwia nga, bi yi'o nitó benne' da' ni, san beyéj, bejḻoé'el kwino' ḻaw bx̱oz, na' bejneẕjw dan' bchi'le Moisés ḻe'e, dan' wḻoé'elen benách ka' ba beyako'.

5 Wyáz Jesusen' ḻo yež Kapernaum, na' bḻa' to benne' ga na', benne' ẕchi'e to gaywá' benne' ka' žjake' ḻo wdiḻe. Bžine' gan zoa Jesusen', na' góta'yoele' Ḻe', 6 na' wnné':

—X̱an, zoa to bi' wen žin chia', debe' ḻo yo'o. Bi žak sa'be', na' ẕzáka'ḻe'ebe'.

7 Jesusen' gože' ḻe':

—Sa'a neda', yeyona'-be'.

8 Bechebe benne' wnná bian', na' gože' Jesusen':

—X̱an, bi naka' neda' zi cho'o liža', san cha' nnazo', yeyák bi' wen žin chian'. 9 Ḻezka' neda', zoa to benne' ẕnna bi'e neda', na' zej nnita' benne' ka' žjake' ḻo wdiḻe, benne' ka' ẕnna biá'gaka'-ne'. Kate' žapa'-ne' toe': “Wyéj ga na'” žeje'. Kate' žapa'-ne' yetóe': “Da ni” žide'. Kate' žapa' benne' wen žin chia': “Ben žin ni” ḻa' žontie' žin na'.

10 Kate' benle Jesusen' da' ni, bebanle', na' gože' benne' ka' žónḻengake' Ḻe' tẕen, na' wnné':

—Da' li žapa' ḻe'e, gan zej nnita' benne' Israel ka', bi na' chejx̱aka'a nitó benne' žejḻi'e chia' neda' kan žon benne' ni. 11 Ḻezka' žapa' ḻe'e: žojgak benne' zan zaka' gan ẕḻa' wbíž, na' zaka' gan ženen, na' kwé'ḻengake' tẕen Bran, na' Isaak, na' Jakob, gan ẕnna bia' Dios ya'abá chie', 12 san benne' ka' ba wžekze Dios nich chejnníta'gake' gan ẕnna bi'e Ḻe', wsejwe' ḻégake' na'le gan nak choḻ, gan kwéžegake', na' wx̱éj láye'gake' ḻo yeḻa' nyache' ḻaže' chégake'.

13 Naž Jesusen' gože' bennen' ẕchi'e benne' ka' žjake' ḻo wdiḻe, na' wnné':

—Beyéj ližo'. Kan žejḻi'o chia', ka' gaken chio'.

Ḻa' na'ze beyakte bi' wen žin chien'.

14 Bžin Jesusen' liž Bedw, gan bḻe'ele' x̱na' ẕo'le Bedon' die' ḻo da'a, na' yoe'e da' ḻa. 15 Jesusen' wdane' na' no'len', na' ḻa' bežojte da' ḻa dan' yoe'e. Naž beyás no'len', na' bsí'ni'e da' bdáwgake'.

16 Kate' za' žaḻe ža na', za'gak benne' ka' zej noe'e benne' zan gan zoa Jesusen', benne' yó'ogake' be' x̱iwe' ka', na' ḻen yeḻa' ẕnneze chie' bebeje' be' x̱iwe' ka', na' beyone' yógo'te benne' yižwé' ka'. 17 Ki goken, bžin dan' wnná Isaías, benne' bchaḻje' ḻo wláz Dios ža ni'te, katen' wnné': “Ḻe' beyone' da' ka' wẕáka'žo, na' beké'e yižwé' ka' chežo.”

18 Kate' bḻe'el Jesusen' zej nnita' benne' zan ka' dot kwite', gože' benne' wsedle chie' ka' tégake' yecheḻa'ale nisdo'. 19 To benne' yodo' wsedle bžine' gan zoa Jesusen', na' gože' Ḻe':

—Benne' wsedle, gónḻena' Le' tẕen gáte'teze gan chejo'.

20 Jesusen' gože' ḻe':

—Beza' ka' zej de ẕan yej chégakba', na' byínnedo' ka', zej žia x̱ó'ngakba', san neda', Benne' Golje' Benách, bi de gan chix̱jw yichja'.

21 Yetó benne' wsedle che Jesusen' gože' Ḻe':

—X̱an, benn latje yeyá'a liža' na' zejte wkacha'a x̱a'.

22 Jesusen' gože' ḻe':

—Da ḻen neda'. Be' latje benne' žátgake' wkáche'gake' ljéžgake' ka', benne' žátgake'.

23 Wžén Jesusen' ḻo barkw, na' benne' wsedle chie' ka' žónḻengake' Ḻe' tẕen. 24 Naž gok to be' waḻe ḻo nisdo', na' žasḻe'e nisdon', na' zejte žaz nis ḻo barkwn'. Jesusen' die' ẕtase' ḻo barkwn'. 25 Naž benne' wsedle chie' ka' wbíga'gake' gan die', na' besbángake' Ḻe', na' góžgake' Ḻe':

—X̱an, beslá neto'. Za' gatžo ḻo nis.

26 Bechebe Jesusen', na' gože' ḻégake':

—¿Biẕ chen' ẕžébele? Láte'ze žejḻe'le che Dios.

Naž wyase Jesusen', na' bḻiže' ben' da' žaken, na' nisdon', na' ḻa' wžé'tegaken ži. 27 Bebán ḻáže'gak benne' ka', na' wnnágake':

—¿Biẕ napkze benne' ni? Ẕnneze', na' be' žaken, na' nisdo' žóngaken kan ẕnne'.

28 Kate' bžin Jesusen' yecheḻá'a nisdo' gan nbab yež Gadara, bžojgak chope benne' ka' ḻo bloj ka' gan zej že' ba chegak benne' gat ka', na' bžíngake' gan zoa Jesusen'. Sníaḻe'e zej nake', na' bi gok nitó benne' tie' ḻo nezen'. 29 Ḻa' wžéžeya'agak žoptie' zižje, na' wnnágake':

—¿Biẕ nbága'to' chio', Jesús, Ẕi'n Dios? ¿Zo'o nga nich wsaka' zi'o neto' kate' bi na' žin ža?

30 Gan nníta'gake' zej nnita' koch zan, bia želdaba' žáwgakba', na' zej že'ba' late' gan nak zi'to'. 31 Wnné nyáche'gak be' x̱iwe' ka', na' góžgaken Jesusen':

—Cha' yebejo' neto', be' latje chejžo'oto' yichj ḻáẕdo'gak koch zan ka'.

32 Naž Jesusen' gože' ḻégaken:

—Le chej.

Ḻa' bežójtegak be' x̱iwe' ka', na' bejžó'ogaken yichj ḻáẕdo'gak koch zan ka'.

Naž ka' gaze jak yógo'te koch zan ka', na' bejbíx̱jgakba' gan nak to ḻe'e ya'a yej, na' bejcházgakba' ḻo nisdo', gan wyépgakba' nis, na' gótgakba'.

33 Bžébegak benne' ka', benne' wdape chí'igake' koch ka', na' bẕónnjgake'. Kate' bžíngake' ḻo yež, bzéngekle' benách ka' yógo'te da' gókgaken chegak benne' ka' wyó'ogake' be' x̱iwe' ka'. 34 Naž bžojgak benne' ḻo yež ka', nich bejchággake' Jesusen'. Kate' bḻé'egekle' Ḻe', góta'yoegekle' Ḻe' yezé'e ḻo yežlyó chégake'.