1 Le'e beṉe' Galacia, nc̱hoḻ yic̱hjlažda'olen'. ¿No gwziye' le'e cont chaquele cheyaḻa' gonxenḻe costumbr c̱he da' x̱ozxta'oto' ca'? Ba bzejni'iyaṉe'da' le'e c̱he dan' got Criston' ḻe'e yag cruzen' ṉec̱he chio'. 2 Da' ngazen' chṉabda' le'e: ¿Zoa Spiritw c̱he Diosen' ḻo' yic̱hjlažda'ole ṉec̱he dan' chonḻe can' ža ley dan' bzoj da' Moisésen'? Bitw naquen ca', san zoan len le'e ṉec̱he dan' chejnilaže'le Criston'. 3 Spiritw c̱he Diosen' gwyo'on ḻo' yic̱hjlažda'olen' caten' gwzolao chejnilaže'le Criston'. ¿Da' ḻeca nc̱hoḻ yic̱hjlažda'olen' chaquele chyažjen gonle can' ža leyna' cont yeyož gacle can' chazlaže' Diosen'? 4 Da' zan da' bosoc̱hi bososaca' beṉe' le'e dan' chejnilaže'le Criston'. ¿Na' bixe zacan' byo bchejele len da' ca' še ṉa'a chaquele cheyaḻa' gonḻe can' ža leyna'? 5 Ṉezele Diosen' ba beṉe' Spiritw c̱hen' zoan len le'e na' chone' yeḻa' guac da' chle'ele ṉec̱he chejḻe'le xtiža' Criston' dan' bzeneto' le'e, gague chac ca' ṉec̱he dan' chonḻe bi dan' ža leyna'.

6 Da' Abrahanṉa' gwyejnilaže' Diosen', na' da'nan' Diosen' gwne' naque' beṉe' güen lagüen'. 7 Da'nan' cheyaḻa' ṉezele yogo' beṉe' chesejnilaže' Diosen', Diosen' none' ḻegaque' ca xi'iṉ diaža c̱he da' Abrahanṉa'. 8 Diosen' bžie' bia' gone' len le'e bi nacle beṉe' Israel can' chone' len neto' beṉe' Israel, con note'tezcho chejnilaže'chone' none' chio' beṉe' güen lagüen'. Da'nan' Xtižen' dan' nyojen žan gože' da' Abrahanṉa' diža' güen qui cate' biṉa' žin ža gaquen': “Dan' chejnilažo' neda' gona' güen len beṉe' ca' že' yogo' nación.” 9 Na' can' naquen, Diosen' chone' güen len beṉe' ca' chesejnilaže' ḻe' can' bene' güen len da' Abrahanṉa' ben' gwyejnilaže'ne'.

10 Na' note'tez beṉe' chon xbab gaque' beṉe' güen len Diosen' lagüe' chone' bi dan' ža ley dan' bzoj da' Moisésen', da' mal juisyw gac c̱he' še ca', ḻe nyoj Xtiža' Diosen', žan': “Da' mal juisyw gac c̱he note'tez beṉe' še bi ṉita'teze' yesone' yogoḻoḻ can' ža leyna' bate'teze.” 11 Na' Xtiža' Diosen' nyojen, žan: “Beṉe' chesejnilaže' Diosen' zjanaque' beṉe' güen lagüe', na' da'nan' guata'cze yeḻa' mban c̱hegaque' toḻi tocaṉe.” Na' da' žan ca' ṉezecho bitw že' c̱he note'tezcho naccho beṉe' güen lagüen' ṉec̱he choncho bi dan' ža leyna' goncho. 12 Na' leyna' bi žan cheyaḻa' šejnilaže'cho Diosen', san con žan: “Note'teze beṉe' chon doxen can' ža leyna' gac bane' toḻi tocaṉe.”

13 Perw Criston' bṉitlagüe' xtoḻa'chon' cont bi gac da' mal juisyw c̱hecho dan' bi chzoecho goncho doxen can' ža leyna'. Bnežjw cuine' goc da' mal juisyw c̱he' laz chio'. Goc c̱he' can' nyojen, žan: “Da' mal juisyw chac c̱he note'tez beṉe' chesote' chosode'ene' ḻe'e yag.” 14 Goc ca' cont lencze le'e bi nacle beṉe' Israel šejnilaže'lene' na' soale mbalaz ca mbalazen' gwzoa da' Abrahanṉa' dan' gwyejnilaže' Diosen'. Nachen' da' chejnilaže'cho Cristo Jesúsen', Diosen' gwseḻe' Spiritw c̱hen' zoan len chio' can' gwne' gone'.

15 Beṉe' migw, gwzejni'ida' le'e len da' nga chac yežlio nga: Cate' to beṉe' chze'e yiš o chone' testament, bi ṉacho cate' beyož bosoc̱heḻe' can' gwne' gone' cbi gone' can' žanṉa' o gwzanche' can' žanṉa', ḻa'czḻa' naquen to da' chon beṉac̱hze. 16 Na' ca nac dan' gož Diosen' Abrahanṉa' gone' da' güen len ḻe' na' len xi'iṉ diaža c̱he', Xtiža' Diosen' dan' nyojen bi choen' diža' c̱he zan diaža c̱he da' Abrahanṉa', san choen' diža' c̱he toze', na' zejen Cristo. 17 Na' dan' gož Diosen' Abrahanṉa' gone' gac da' güen c̱he', chzaca'leben ca to yiš dan' chosoza' beṉe', ḻe Diosen' bitw gwše'e can' gwne' gone'. Na' ba gwde tap gayoa šichoa iz gož Diosen' da' Abrahanṉa' gone' gac da' güen c̱he' cate' bene' cont bzoj da' Moisésen' ley c̱hen'. Perw ḻa'czḻa' Diosen' bnežjue' leyna', bitw ṉacho cbi chone' can' gwne' gone' len Abrahanṉa' na' len xi'iṉ diaža c̱he' ca'. 18 Šaca' Diosen' že' con beṉe' cheson doxen can' ža leyna' zjanaque' beṉe' güen, bitw chone' da' güen c̱he xi'iṉ diaža c̱he da' Abrahanṉa' can' ba gwne' gone' šaca'. Perw Abrahanṉa' goque' beṉe' güen len ḻe' da' gwyejḻe'e gon Diosen' can' gože'ne'.

19 Še naquen ca' ¿bixc̱hen byažje ley dan' bzoj da' Moisésen'? Diosen' bnežjuen' da' x̱ozxta'oto' beṉe' Israel cate' ba gwde tiemp c̱he da' Abrahanṉa' cont gosacbe'ede' bi chesone' can' non Diosen' mandadw yesone'. Na' bžie' bia' gonen žin šlac biṉa' yid Criston' ben' gwna Diosen' galje' ḻo diaža c̱he da' Abrahanṉa', na' c̱he ḻe' be' Diosen' diža' caten' gwne' gone' güen len xi'iṉ diaža c̱he da' Abraham. Na' ca nac leyna', Diosen' bene' cont angl ca' bosonežjuen' da' Moisésen'. Na' Diosen' bc̱hine' Moisésen' bzejni'ide' x̱ozxta'oto' beṉe' Israel ca' can' žanṉa'. 20 Perw cate' Diosen' gože' da' Abrahanṉa' gone' güen c̱he', cuincze' bzejni'ide' da' Abrahanṉa', na' bi byažjde' beṉe' yoble gwzejni'ide' ḻe' can' gone'.

21 Na' bitw cheyaḻa' gaquecho ley dan' bzoj da' Moisésen' chonen clele len da' gwna Diosen' gone' ḻa'czḻa' leyna' bitw gac yocoben yic̱hjlažda'ochon'. Šaca' gac yocoben yic̱hjlažda'ochon' guac goncho can' ža leyna' nach gaccho beṉe' güen len Diosen' šaca'. 22 Perw Xtiža' Diosen' dan' nyojen žan yogo'ḻoḻ beṉac̱hen' yesezi'e castigw toḻi tocaṉe ṉec̱he xtoḻa'gaquen', na' con beṉe' yesejnilaže' Jesucriston' ṉitlao xtoḻa'gaque' can' bsi Diosen' xṉezen', cont gac güen c̱hegaque' can' gwne' gac c̱he xi'iṉ diaža c̱he da' Abrahanṉa'.

23 Ca nac neto' beṉe' Israel, cate' biṉa' ṉezeto' cheyaḻa' šejnilaže'to' Criston', nchoglaon c̱heto' si'to' castigw toḻi tocaṉe dan' nombia'to' leyna' na' bitw chonto' can' žanṉa'. 24 Len neto' leyna' zaca'leben ca to beṉe' chgüia chṉe'e xi'iṉ beṉe', da' zan da' chi'ebe' gombe' na' da' zan da' chi'ebe' bi gombe'. Perw ṉa'a ba bid Criston', na' note'tezcho chejnilaže'chone', Diosen' že' naccho beṉe' güen len ḻe'. 25 Na' dan' ba bid Criston' leyna' bich naquen ca beṉe' chgüia chṉe'e neto' beṉe' Israel, neto' chejnilaže'to'ne'.

26 Yogo' chio' chejnilaže'cho Cristo Jesúsen' naccho xi'iṉ Dios. 27 Na' note'tezcho še ba gwzoacho nisen' cont blo'echo naccho txen len Criston', ba chzolao chac yic̱hjlažda'ochon' can' nac yic̱hjlažda'ogüen'. 28 Na' tozecze can' zaca'cho lao Diosen' še naccho beṉe' Israel o še bi naccho, na' še naccho beṉe' esclavo o še bi naccho, na' še naccho beṉe' byo o še naccho no'ole. Yogo'cho ba naccho ca toze beṉe' ṉec̱he dan' naccho txen len Cristo Jesúsen'. 29 Na' dan' naccho txen len Criston', lao Diosen' naccho xi'iṉ diaža c̱he da' Abraham, na' gon Diosen' güen len chio' can' gwne' gone' len xi'iṉ diaža c̱he da' Abrahanṉa'.