1 Beyož bzoja' da' ca' gwne' neda', ble'edaogüeda' nyaljo to puert yaban'. Nach da' yoble benda' gwṉe Jesucristw ben' gwṉe neda' da' nechw zižjechgua cacze zižje chbež to trompeta, gože'nda':

―Gwyep gan' zoa' nga cont gwlo'eda' le' da' ca' za' gac.

2 Nach ḻa' bente Spiritw c̱he Diosen' cont ble'edaogüeda' yaban' gan' chi' Diosen' chnabi'e. 3 Na' ble'eda' ben' chi' chnabian' chactite' ca chactit yejese, yej da' nzi' jaspe na' da' nzi' cornalina. Na' to da' nac ca to pita' gwyec̱hjen gan' chi'e chnabi'en, na' chactiten ca chactit to yej da' nzi' esmeralda. 4 Na' cue'ej cuit Diosen' gan' chi'e chnabi'e zjachi' yetapechoa beṉe' gwlej Diosen' zjanaque' blao, beṉe' chesenabi'e txen len ḻe'. Zjanyaze' lache' šiš na' zjazoa corona de oro yic̱hj to togaque'. 5 Na' gan' chi' Diosen' chnabi'e chep yes na' chac sšag na' chašjw chtin. Na' lagüen' nita' gaže yi' da' chaḻa'ṉiṉ. Yi' ca' gaže zjanaquen Spiritw c̱he Diosen', na' Spiritw c̱he Diosen' naquen ca gaže spiritw. 6 Na' doxen lagüe' gan' chi'e chnabi'en nžiljw ḻo yon' to da' chactit ca vidrw na' nḻan' ca to nis nyadi da' nḻa'xeje.

Na' nita' yetap beṉe' gan' zoa Diosen'. Tgüeje' nita' cuite' chop ḻa'ate, yetoe' cože' na' yetoe' lagüe', na' zjažia da' zan yejlaogaque', žia da' žia laogaque' na' lente cože'gaque'. 7 Beṉe' nechw naque' ca to león, na' beṉe' gwchope ca to go'ṉ, na' beṉe' gwyoṉe nac cho'alagüe' ca c̱he beṉac̱h, na' beṉe' gwdape naque' ca to bsia be ze ḻo be'. 8 Na' dapte beṉe' ca' to toe' žia x̱op güeje x̱ilgaque', na' zjažia zan yejlaogaque' ḻo x̱ilen' lente cože' x̱ilen'. Na' do ža do yel bi chososane' chesene':

9 Na' yogo' ṉi'a cate' beṉe' ca' tap cheso'e diža' catec beṉe' zaca' nac Dios ben' chi' chnabia', ben' zoacze toḻi tocaṉe, yogo' ṉi'a cate' chesonxene' ḻe' cheso'e yeḻa' chox̱clen c̱he', 10 beṉe' tapechoa ca' gwlej Diosen' cont zjanaque' blao chosozoa xibe' lao Dios ben' zoa toḻi tocaṉe chesonxene' ḻe' gan' chi'e chnabi'e na' chosonite' corona c̱hegaquen' xṉi'en, chesene':