EFESUS
Pol so mamey, sios Efesus ko se ma mey hok non
Meyamey uwr hokwe: Aposel Pol.
Yier hiy ma lwayr meyamey hokwe: Hiykwe yier Rom mon lwak non meyamey.
Enekwei hiy ma meyamey hokwe: Hiykwe enekwei Yia 60 sok po meyamey kok pak e, Yia 61 sok po meyamey kok pak e, Jisas hiy ma lokrue so meyki.
Ok mamey mon ma lwak mokwe senkin: Pol hiykwe mamey okukwe hiy kalabus-uwr lwak nonaw meyamey. Meyk-ar hyo hokwe senkin, hiykwe nan kiykiy-ay uwrsa kipay Esia mon ma lwak me hiymon woro-woro kraipakrai e mon. Hiykwe weynpaweyn paraw-uh ko o, enekwei enkin ma kiy-ousne-sa-ousne ohom o, seyr omok ma lousne sa-ousne ey o, seme lohruw-a. Hiykwe peyr God paraw ma lwayr-hre ne so uron, hiy ki se ma nanpanan koruay se lohruw-a pie, sei, enekwei enkin God hiy uwrsa Krais se ma nan kiykiy-ay me ma huonok prosue me nak-ohruw-a, sei, poup lowpwarowp omok kyor-oruayk ha ey me nak-ohruw-a. Hiykwe senkin lohruw-a kraipakrai, enekwei enkin ohokwe, hromo aw kokwe, iwar me aw lono pey, sawk, niohney piap-araw me nion nak-ono. Sawk hrom Krais so owhi ko uwrku ma lwak omokwe hromkwe lorok kraiay krai non. Mamey ohok ko kopi pariawey kokwe, Pol hiykwe kristen mo liwak yor me lohruw-a, yor senkin: sa huon yor, aio-ipey me mon komnow komnow yor, mey-uwr puraw mo yor, seme lohruw-a.
Pol so uron ko hokwe senkin: God so uron hreme ma hiymon e ma nan hokwe, God hiykwe paraw nuw-mon ousne, God hiy ki se ma mon-hre lopa non. God hiykwe hreme po huonok prosue, Krais so kueir nonaw, sa hiykwe hyo uron hokwe sios nonaw meio ousne e nan. Hrom uwrsa, God se ma nan kiykiy-ay homkwe, Krais so mon lwak, seyr hiykwe hromo maw-om, sa hromkwe Satan se kokwe Krais so krai non liy lorok ono akre akre.
1
Pol so peyrmawk-ok
1 Hakwe Pol, hakwe Krais Jisas so aposel. Ha aposel ma kiy-wak ohokwe, God so uron arian nonaw me-iaup. Mamey okukwe hakwe kristen-uwrsa om Efesus ko, Krais se ma nan kiykiy-ay wayr me mey kow. * Ap 18:19-21; 19:1
2 Hromo Aio God o, hromo Hakamay Jisas Krais o, hmekwe, maym-kow-yor o, liwak marowhway yor o, seme ka kow.
Krais so kueir nonaw kokwe God hiykwe omeme yaprue niohney ko me hreme kow
3 Hromkwe God, seyr hromo Hakamay Krais Jisas so Aio se me-ihey e! Payhokuaw, hrom Krais so kueir nonaw ma lwak ohokwe, God hiykwe omeme yaprue lowpwarowp niohney ko, nonkumey ko kipay ko mokwe hrome po kow. * Ef 2:6 4 Mo ki ehe ma mon-hre lopa ma lwak hokwe, God hiykwe hreme kokwe Krais so kueir nonaw me-iaup, hrom hyo inour mon kokwe pekneyweys o, heyn lopa o, senkin lwak ey hokwe. * Jon 15:16 5 God hiy hreme uron-pi ko-ar ma lwak hokwe, hiykwe hreme kokwe Jisas Krais so kueir nonaw kokwe paraw lahan koruay, hyo ney arian lwak e. Sohokwe hyo uron arian so meyk-ar, hiy kar ma ley ey hiy non. * Jon 1:12 6 Hromkwe God se lowk nakie e, hiy hyo maym panpaniowni non hreme hyo ney arian so kueir non puraw ma kow se. Hyo maym hokwe hremekwe ipey-ar po nuw-kow, hyo ney arian, hiy uron-pi ko-ar ma nuw-wak so ouon mon kokwe. 7 Krais so nioh se hokuaw kokwe hreme kokwe po hrorsay preisia ha, suw senkin, hromo weynpaweyn piap-araw mokwe po lorionay kow. Sa God so maym hreme ma kow hokwe ompuay. * Ef 2:7; Kol 1:14 8 Somokwe God hiykwe hyo mawkhow ihey-ar non o, hyo nonkway arian non o, hreme ipey-ar po nuw-kow. * Ro 16:25 9 Sa hiykwe hyo ok-san, ouon-aw ma lwak, seyr hiykiaw paraw kar nonaw ma nanpanan mokwe, hreme po meio ousne hra-hra kow. Ouon-aw ok sokukwe hiykwe Krais so kueir nonaw meio ousne e me-sakon kawk koruay. 10 Ki ohiy so enekwei pariawey-ar hiy lousne ankin, God hiykwe ouon-aw ok sokukwe enekwei sohiy non meio lowpway ey. Ki mon kokwe payay homkwaw lwak e, seyr nonkumey mon kokwe payay homkwaw lwak e, God hiykwe lowpwarowp me kokwe makwey-uwr prueynyaw so ouon mon-aw lokrar kekie sowkriy ey. Makwey-uwr sohokwe Krais. * Kol 1:16,20
11 Krais so kueir hokwe, God hiykwe hreme po me-iaup, paraw hiy hreme ma lahan koruay me hokuaw. Mey lowpwarowp, God hiy ma mon ousne mokwe, hyo uron arian, paraw ma me-sakon kawk so meyki mon-aw ley. * Ro 8:28-29 12 Hiykwe senkin sehe lon, hrom Juda, Krais se uron hyo-hyo ma lon pie hromkwe God so panpaniowni se lowk nakie e.
13 Ama, hom seyn, homkwe God so ok-ar-ok, hme ma huonok prosue ey ke lonuayk menkin, homkwe Krais se nion po non-okin nasay. Seyr hom Krais se ma nan kiykiy-ay mokwe, God hiykwe hyo Niohney Pekneyweys, hiy hme ma me-loray hokwe po kow, meir se hieyn. Meir sohokwe hom hyo uwrsa arian lwak ey hom non. 14 God so Niohney hokwe meir se hieyn, hreme senkin mesair kumay kow, God hiy pay me me-loray e, hreme liy kow, Niohney Pekney-weys se ma kow se hieyn. Seyr hromkwe senkin nak-nonkway, God hiykwe hyo uwrsa arian me ya kahror hrawey hrawey preisia ha a. Hromkwe hyo panpaniowni se sehe lowk nakie e. * 2 Ko 1:22
Pol hiy God se mesopok me-ihey
15 Hakwe hom Hakamay Jisas se ma nan kiykiy-ay o, seyr kristen-uwrsa me uron-pi ko-ar ma nuw-wak o, seme lonuayk pie menkin, 16 hakwe God se me-ihey kane ha pa sehe nuw-wak. Hakwe God se mesopok mokwe, hme senaw nak-nanpanan mesopok. 17 Hakwe hromo Hakamay Jisas Krais so God, Aio panpaniowni non se mesopok wayr, hiy hme Niohney, mawkhow ihey-ar non o, mesair hrahra yor non o, sehe kow e. Suw homkwe God se liy nuw-nonkway popriy. * Kol 1:9 18 Hakwe God se sehe mesopok, hiy hmo nene me ka kamapi kow, hom hyo ey-yar se lira ey hokwe. Suw homkwe meykyar, hiy hme ma me-huonokyaw hokwe liy nuw-nonkway. God so hiymon yor, hom uron hyohyo ma lon sohokwe, aiopey hay. Seyr ompay-ompay, God hiy hyo uwrsa me kow e ma liaup somokwe, ipey-ar. 19 Seyr hyo krai seirpey-ar, hrom uwrsa hye ma nan kiykiy-ay mo owh mon ma meio hokwe, ipey-ar nuw-wak. Krai, hromo mon ma meio sohokwe, krai seirpey-ar, 20 God hiy Krais se lokrue-yier ko se ma mon oksian sohiykwaw. God hiykwe mo Krais se kokwe krai seirpey-ar sohiy nonaw mon oksian nok, hyo iha sayar mon isay iwak, nonkumey ko kipay lowpwarowp mon. * Sng 110:1; 2 Ko 13:4; Kol 2:12 21 Krais hiy serey ma liwak sohokwe, hiykwe hiy-wayr-uwr lowpwarowp o, makwey-uwr lowpwarowp o, krai seirpey-ar lowpwarowp o, hakamay lowpwarowp o, sohom mo eir mon lwak. Seyr hyo uru hokwe uru lowpwarowp mo ayaw mon lwak, enekwei enkin hiykwaw korey, sawk omok enekwei seyn. 22 Omeme lowpwarowp mokwe God hiykwe Krais so sune ouon mon po kekie sowkriy. Sa sios me hiymon ey se hokuaw, Krais se kokwe sios so omeme lowpwarowp mo makwey-uwr lwak e po me-iaup. * Sng 8:6 23 Sios hokwe Krais so owhi, sa sios hokwe Krais hiy paniaw ma lwak ihey se mesair kow. Krais hiykwe mey lowpwarowp me yerki senkin senkin non nuw-mon wouk-wouk-ay prusow uwr. * Ro 12:5; Ef 4:10,15; Kol 1:18