1 Kꞌisbꞌal kꞌu re, hermanos, ꞌana alaq orar chwach ri Dios paqawi riꞌoj chaꞌ lik keꞌek tan rutzijoxik ri Utzilaj Tzij re ri Qanimajawal che ronoje luwar y chaꞌ kakꞌul waꞌ chi utz kuma ri ketaw re jelaꞌ pachaꞌ xꞌan ralaq. 2 ꞌAna alaq orar chwach ri Dios paqawi riꞌoj chaꞌ na kojtzaq ta pakiqꞌabꞌ ri winaq lik itzel kikꞌuꞌx y na jinta kisukꞌ, ma na konoje taj kakaj kakikubꞌaꞌ kikꞌuꞌx rukꞌ ri Jesús. 3 Na rukꞌ ta kꞌu riꞌ, ri Qanimajawal lik jusukꞌ ma e kuꞌan na pachaꞌ ri ubꞌiꞌim, ma Rire kujikibꞌaꞌ kꞌuꞌx alaq y kuchajij kꞌu alaq chwach ritzel winaq. 4 Kubꞌul kꞌu qakꞌuꞌx che waꞌ: Rukꞌ rutoꞌbꞌal ri Qanimajawal, ralaq katajin alaq che uꞌanik ri xqataq alaq che y jelaꞌ kaꞌan kꞌu alaq chiqawach apanoq. 5 Ekꞌu ri Qanimajawal Jesucristo katoꞌw e alaq chaꞌ ri rutzil kꞌuꞌx alaq kuꞌana jelaꞌ pachaꞌ ri rutzil ukꞌuꞌx ri Dios y chaꞌ kachꞌij alaq uchuqꞌabꞌ taq ri kꞌaxkꞌobꞌik rukꞌ unimal kꞌuꞌxaj jelaꞌ pachaꞌ xuꞌan ri Cristo.

6 Hermanos, chupa rubꞌiꞌ ri Qanimajawal Jesucristo kaqataq alaq che chaꞌ kesaj ibꞌ alaq chikij taq ri hermanos lik e xepuꞌabꞌ, ri na kakitaqej ta ri kꞌutunik xmaj kan alaq chiqij. 7 Lik etaꞌam kꞌu alaq saꞌ ri lik chirajawaxik kakꞌam alaq re che ri qabꞌinik qasilabꞌik riꞌoj, ma echiriꞌ xojkꞌojiꞌ ukꞌ alaq, lik xojchakunik. 8 Na xqatzꞌonoj taj xa kasipax ri qawa, ma ronoje ri xyaꞌ chiqe, xqatojo. Ri xqaꞌano e lik xojchakun chipaqꞌij chichaqꞌabꞌ chaꞌ jelaꞌ na kojuꞌan ta oj eqaꞌn chuqul junoq che alaq. 9 Wa xqaꞌano na e ta keꞌelawi na taqal ta chiqe kojtoꞌ alaq; ri xqaꞌan wi e chaꞌ kamaj e alaq chiqij. 10 Ma echiriꞌ kꞌa oj kꞌo ne chilaꞌ ukꞌ alaq, xqataq alaq che waꞌ: «We kꞌo junoq na karaj taj kachakunik, na taqal ta che katzuqik.» 11 Yey woꞌora qatom, e kꞌo jujun chixoꞌl alaq na kechakun tane kꞌenoq; ri kakiꞌano e kakimin kibꞌ che taq ri na jinta ke che. 12 E taq kꞌu waꞌ wa tikawex keqataq che y keqapixabꞌaj pa rubꞌiꞌ ri Qanimajawal Jesucristo: Chechakunoq re chꞌakabꞌal re ri kiwa* “Kiwa”: Waꞌ e keꞌelawi e ronoje ri kajawax chike. y chekꞌola jusukꞌ.

13 Yey ekꞌu ralaq hermanos, makos alaq che uꞌanik ri utz. 14 We kꞌo junoq na kutaqej ta wa kaqatzꞌibꞌaj pana che alaq, qꞌalajisaj alaq chinoq y majunimaj ibꞌ alaq rukꞌ, chaꞌ jelaꞌ kakꞌix che ri kuꞌano y kutzelej utzij. 15 Pero maꞌan alaq che tzel kil alaq; ri ꞌana alaq e pixabꞌaj alaq ma rire e jun qa hermano.

16 Ekꞌu ri Qanimajawal, ri aj yaꞌl utzil chomal, xaqi chuyaꞌa pawiꞌ alaq ri utzil chomal chupa taq ri kikꞌow wi alaq. Kꞌola ri Qanimajawal ukꞌ onoje alaq.

17 Riꞌin in Pablo, rukꞌ ri nuqꞌabꞌ kantzꞌibꞌaj wa rutzil wach alaq. Jelaꞌ kanꞌan che taq ri nucarta, kꞌutubꞌal re in ri kintzꞌibꞌan re.

18 Kꞌulu kꞌu alaq ri unimal rutzil ukꞌuꞌx ri Qanimajawal Jesucristo. Amén.