1 Ekꞌu ri Pilato xtaqan che kakꞌam bꞌi ri Jesús y kajichꞌ upa. 2 Yey ri soldados xkikoj che rujolom ri Jesús jun corona kipachꞌum rukꞌ kꞌiix. Y xkirip jun manta morato* “Morato”: Kil “púrpura” pa vocabulario. chirij. 3 Tekꞌuchiriꞌ xeqibꞌ rukꞌ y kakibꞌiꞌij:

—¡Nim uqꞌij ri rey ke raj judiꞌabꞌ! —kechaꞌ. Yey kakipachꞌ qꞌabꞌ chupalaj.

4 Ri Pilato xel tanchi uloq y xubꞌiꞌij chike raj judiꞌabꞌ:

—Chilape alaq, kanwesaj lo waꞌchi chiwach alaq. Chetaꞌmaj kꞌu alaq, riꞌin na jinta juna umak kanriqo —xchaꞌ.

5 Ekꞌuchiriꞌ xel lo ri Jesús, kꞌo ri corona re kꞌiix che rujolom y ripom ri manta morato chirij. Xubꞌiꞌij kꞌu ri Pilato chike:

—¡Riꞌ rachi kꞌo chiwach alaq! —xchaꞌ.

6 Echiriꞌ ri nimaq e aj chakunel pa Rocho Dios kukꞌ ri e chajinel re ri Rocho Dios xkil ri Jesús, xkijeq kesikꞌinik, jewaꞌ kakibꞌiꞌij:

—¡Kamisax chwa cruz! ¡Kamisax chwa cruz! —kechaꞌ.

Ekꞌu ri Pilato xubꞌiꞌij chike:

—We e riꞌ, kꞌama bꞌi ralaq y kamisaj alaq chwa cruz, pero riꞌin na jinta juna umak kanriqo —xchaꞌ.

7 Raj judiꞌabꞌ xkikꞌul uwach:

—Riꞌoj kꞌo jun taqanik paqawiꞌ y kubꞌiꞌij kꞌu riꞌ taqal che rire kakamisaxik ma uꞌanom Ukꞌajol Dios che ribꞌ —xechaꞌ.

8 Echiriꞌ ri Pilato xuta waꞌ, xok más xiꞌin ibꞌ rukꞌ. 9 Xok kꞌu tanchi ubꞌi pa ri palacio y xutzꞌonoj che ri Jesús:

—¿Pa lal petinaq wi rilal?† Ri Pilato na kutzꞌonoj taj pa xalax wi ri Jesús; ri karaj karetaꞌmaj e we ri Jesús xa e jun tikawex o we rukꞌ ri Dios petinaq wi. —xchaꞌ. Pero ri Jesús na xukꞌul ta uwach.

10 Ri Pilato xubꞌiꞌij kꞌu che:

—¿E laꞌ na kakꞌul ta la uwach wa kantzꞌonoj cheꞌla? ¿Na etaꞌam ta kami la panuqꞌabꞌ riꞌin kꞌo wi kankamisaj la chwa cruz y panuqꞌabꞌ kꞌo wi kanyolopij bꞌi la? —xchaꞌ.

11 Ri Jesús xukꞌul uwach:

—Paqatzij wi kambꞌiꞌij cheꞌla, na jinta kꞌana paqꞌabꞌ la kataqan la panuwiꞌ we tamaji e ri Dios chilaꞌ chikaj xyaꞌw cheꞌla. E uwariꞌche, china ri xinqꞌatisan paqꞌabꞌ la, e más kꞌo umak riꞌ, chiwach rilal —xchaꞌ.

12 Chwi kꞌu riꞌ, ri Pilato lik xutzukuj suꞌanik kuyolopij bꞌi ri Jesús. Pero raj judiꞌabꞌ ko kesikꞌin che ubꞌiꞌxik:

—¡We xyolopij bꞌi la, na lal ta chi ramigo riꞌ ri nimalaj taqanel re Roma; ma china ri kuꞌan rey che ribꞌ, riꞌ e tzel karil wa nimalaj taqanel! —xechaꞌ.

13 Echiriꞌ xuta waꞌ ri Pilato, xutaq bꞌi resaxik ri Jesús y xtzꞌuyiꞌ pa ri luwar re qꞌatbꞌal tzij “Tzꞌaqom Abꞌaj” kecha che, yey pa ri chꞌaꞌtem hebreo “Gabatá” rubꞌiꞌ.

14 E qꞌij riꞌ kayijbꞌax pan janipa ri kajawax pa ri nimaqꞌij Pascua. Ekꞌuchiriꞌ xuꞌan tikꞌil qꞌij,‡ “Tikꞌil qꞌij”: Kil “hora” pa vocabulario. ri Pilato xubꞌiꞌij chike raj judiꞌabꞌ:

—Riꞌ ri rey e alaq —xchaꞌ.

15 Noꞌj raj judiꞌabꞌ ko kesikꞌin che ubꞌiꞌxik:

—¡Kamisax chwa cruz! ¡Kamisax chwa cruz! —kechaꞌ.

Ri Pilato xubꞌiꞌij chike:

—¿Kankamisaj kami riꞌ chwa cruz ri rey e alaq? —xchaꞌ.

Pero ri nimaq e aj chakunel re ri Rocho Dios xkikꞌul uwach:

—Riꞌoj na jinta juna chik qarey, xew e qarey ri nimalaj taqanel re Roma —xechaꞌ.

16 Ekꞌu ri Pilato xuya bꞌi ri Jesús pakiqꞌabꞌ re kakamisax chwa cruz. Ewi xkꞌam bꞌi ri Jesús.

17 Ri Jesús utelem bꞌi rucruz echiriꞌ xkꞌam bꞌi pa ri luwar kabꞌiꞌx che “Luwar re Ubꞌaqil Ujolom Animaꞌ”, yey pa ri chꞌaꞌtem hebreo, “Gólgota”. 18 Chiriꞌ kꞌu riꞌ xyaꞌ wi ri Jesús chwa ri cruz junam kukꞌ kebꞌ chik achijabꞌ, jun pa taq utzal; y xkꞌojiꞌ kꞌu Rire chikinikꞌajal.

19 Ri Pilato utaqom chik katzꞌibꞌax waꞌ y kayaꞌ kꞌu lo chwi ri cruz: «JESÚS RI AJ NAZARET, RI REY KE RAJ JUDIꞌABꞌ.»

20 Yey waꞌ tzꞌibꞌital pa ri chꞌaꞌtem hebreo, pa ri chꞌaꞌtem griego y pa ri chꞌaꞌtem latín. E kꞌi kꞌu chike raj judiꞌabꞌ xkajilaj waꞌ, ma ri luwar pa xyaꞌ wi ri Jesús chwa ri cruz xa naqaj kꞌo wi che ri tinamit. 21 Yey ri nimaq e aj chakunel re ri Rocho Dios xkibꞌiꞌij che ri Pilato:

—Na ubꞌe taj xtzꞌibꞌaj la “Ri rey ke raj judiꞌabꞌ”. Jalkꞌatij la chaꞌ jewaꞌ kubꞌiꞌij: “Rire xubꞌiꞌij: Riꞌin in rey ke raj judiꞌabꞌ” —xechaꞌ.

22 Pero ri Pilato xubꞌiꞌij chike:

—Ri xintaq utzꞌibꞌaxik riꞌin, jelaꞌ kakanaj kanoq —xchaꞌ.

23 Ri soldados echiriꞌ kiyaꞌom chi ri Jesús chwa ri cruz, xkimol uchiꞌ ruqꞌuꞌ, xkijach upa chaꞌ kuꞌan kajibꞌ rajaw. Jelaꞌ xkaj kakiꞌan rukꞌ rukoton; pero waꞌ xa jun upa uꞌanom. 24 Ruma kꞌu waꞌ, ri soldados jewaꞌ xkibꞌiꞌij chikiwach:

—Maqarichꞌij upa rukoton; qaꞌana jun sorteo chaꞌ jelaꞌ kaqilo chinoq chiqe kakꞌamaw bꞌi re —xechaꞌ.

Ekꞌu xuꞌana pachaꞌ ri tzꞌibꞌital kan chupa Ruchꞌaꞌtem ri Dios:

25 Chunaqaj kꞌu ri cruz e kꞌo ruchu ri Jesús, ruchaqꞌ ruchu, ri María rixoqil ri Cleofas y ri María ri aj Magdala. 26 Echiriꞌ ri Jesús xril pan ruchu kꞌo putzal ri jun utijoꞌn lik kꞌax kunaꞌ Rire, xubꞌiꞌij kꞌu pan che ruchu:

—Nuchu, chwi kꞌu woꞌora e alabꞌ la laꞌ —xchaꞌ.

27 Tekꞌuchiriꞌ xubꞌiꞌij che ri jun utijoꞌn kꞌo putzal ri María:

—Ekꞌu riꞌat, chwi woꞌora e achu laꞌ —xchaꞌ. Chwi kꞌu riꞌ, wa jun utijoꞌn ri Jesús xukꞌam bꞌi ri María chaꞌ keꞌjeqela chirocho.

28 Ekꞌu ri Jesús retaꞌam ya xukꞌis uꞌanik ronoje ruchak; yey chaꞌ e kuꞌana janipa ri tzꞌibꞌital kan chupa Ruchꞌaꞌtem ri Dios, jewaꞌ xubꞌiꞌij:

—Katzajin nuchiꞌ* Sal. 69:21 —xchaꞌ.

29 Chiriꞌ kꞌo jun xaro nojinaq che vinagre. Yey e kꞌo jujun xkichuqꞌ jun esponja chupa, xkixim kꞌu chutzaꞌm jun vara re hisopo y xkiya pan chwa reꞌ ri Jesús.

30 Rire xutij ri vinagre, tekꞌuchiriꞌ xubꞌiꞌij:

—Xinkꞌis kꞌu utzaꞌm ri nuchak —xchaꞌ.

Ekꞌuchiriꞌ, xuyuxubꞌaꞌ rujolom y xuqꞌatisaj ri ranimaꞌ puqꞌabꞌ ri Dios.

31 Ekꞌu qꞌij riꞌ kayijbꞌax pan janipa ri kajawax pa ri nimaqꞌij Pascua. Ruma kꞌu laꞌ, raj judiꞌabꞌ na kakaj taj kakꞌojiꞌ juna kaminaq chwa cruz pa ri qꞌij re uxlanibꞌal, ma laꞌ la jun qꞌij lik nimalaj nimaqꞌij. E uwariꞌche xkitzꞌonoj che ri Pilato kutaq uqꞌepik ri kaqan ri e kꞌo chwa cruz chaꞌ jelaꞌ kekam tan y keqasax kꞌu uloq.

32 Xebꞌek kꞌu ri soldados y xeꞌkiqꞌepa ri kaqan ri e kꞌo chwa cruz pa taq utzal ri Jesús. Xkiꞌan kꞌu riꞌ che ri nabꞌe, tekꞌuchiriꞌ jelaꞌ xkiꞌan che ri jun chik. 33 Pero echiriꞌ xeqibꞌ rukꞌ ri Jesús, xkilo kaminaq chik; ruma riꞌ, na xkiqꞌep ta ri raqan. 34 Na rukꞌ ta kꞌu riꞌ, jun chike ri soldados xutoqꞌ rukꞌalkꞌaꞌx ri Jesús rukꞌ rulanza y kꞌatetana chupa waꞌ xel lo kikꞌ y yaꞌ.

35 Ri katzijon re ronoje waꞌ e xilow re; lik qatzij kꞌu ri kubꞌiꞌij ma lik retaꞌam saꞌ ri xrilo. Yey kutzijoj kꞌu riꞌ chaꞌ kakubꞌiꞌ kꞌuꞌx alaq rukꞌ ri Cristo. 36 Ma ronoje taq waꞌ xuꞌano chaꞌ e kuꞌana janipa ri tzꞌibꞌital kan chupa Ruchꞌaꞌtem ri Dios, ma jewaꞌ kubꞌiꞌij:

38 Kꞌisbꞌal re taq waꞌ, ri José aj Arimatea xuꞌtzꞌonoj che ri Pilato chaꞌ kayaꞌ che kukꞌam bꞌi rucuerpo ri Jesús. Yey ri José e jun chike rutijoꞌn ri Jesús tobꞌ xa xeꞌlaqꞌay, ma kuxiꞌij ribꞌ chikiwach ri rach e aj judiꞌabꞌ. Ekꞌu ri Pilato xuya bꞌi che, y ri José xukꞌam bꞌi rucuerpo ri Jesús.

39 Ekꞌu ri Nicodemo, ri jun achi xeꞌchꞌaꞌta rukꞌ ri Jesús chaqꞌabꞌ,* Jn. 3:1-2 xopon che utoꞌik ri José. Rukꞌaꞌam laj jun quintal kunabꞌal lik kiꞌ ruxlabꞌ, waꞌ mirra uyijbꞌam rukꞌ áloes. 40 Xkikꞌam kꞌu bꞌi rucuerpo ri Jesús y xkibꞌolqꞌotij pa jutaq rabꞌaꞌj kꞌul kojotal ri kunabꞌal che, ma waꞌ lik xex kakiꞌan wi raj judiꞌabꞌ che kimuqik ri kekamik.

41 Xa naqaj che ri luwar pa xkikamisaj wi ri Jesús chwa ri cruz, kꞌo jun luwar kꞌo chomilaj cheꞌ chwach. Y chiriꞌ kꞌo jun muqubꞌal kꞌakꞌ ꞌanom, y na jinta junoq muqum chupa. 42 Chiriꞌ kꞌu riꞌ xkimuq wi rucuerpo ri Jesús, ma ri muqubꞌal xa naqaj kꞌo wi; yey xkaj kamuqiꞌ ri cuerpo pa ri qꞌij echiriꞌ raj judiꞌabꞌ kakiyijbꞌaꞌ pan janipa ri kajawax chike pa ri nimaqꞌij Pascua, ma na utz taj kaꞌan muqunik pa ri nimaqꞌij.