1 Chupa waꞌ wa qꞌij e kꞌo jujun chiriꞌ xkitzijoj che ri Jesús saꞌ ri xkikꞌulumaj jujun aj Galilea, ri xekamisax ruma utzij ri taqanel Pilato echiriꞌ ketajin che uyaꞌik ri kiqasaꞌn re chikop chwa ri altar pa ri Rocho Dios. Yey ri kikikꞌel waꞌ wa aj Galilea xkich kaꞌn puwi ri kikikꞌel ri chikop.

2 Ekꞌu ri Jesús xukꞌul uwach:

—¿E kachꞌobꞌ nawi alaq, waꞌ wa aj Galilea xekamisaxik ma e más e aj makibꞌ chikiwa ri kach aj Galilea? 3 Paqatzij wi kambꞌiꞌij che alaq, na e ta riꞌ. Yey ralaq, we na katzelej ta tzij alaq chwach ri Dios, e ne jun ralaq kasach wach alaq.

4 »¿O saꞌ nawi kachꞌobꞌ alaq puwi ri xkikꞌulumaj ri e dieciocho, ri xekamik echiriꞌ xtzaq lo ri Torre re Siloé pakiwiꞌ? ¿E kachꞌobꞌ nawi alaq, wa winaq xekamik ma kꞌo más kimak chikiwa ri kach aj Jerusalem? 5 Paqatzij wi kambꞌiꞌij che alaq, na e ta riꞌ. Yey ne ralaq, we na katzelej ta tzij alaq chwach ri Dios, e ne jun ralaq kasach wach alaq —xchaꞌ.

6 Xutzijoj kꞌu wa jun kꞌambꞌal naꞌoj chike:

«Kꞌo jun achi utikom jun cheꞌ re higo chupa rutikoꞌn. Xkꞌun kꞌu loq re koluꞌtzukuj ujiqꞌobꞌalil ri higo yey na jinta xuriq che. 7 Xubꞌiꞌij kꞌu che ri chajinel re rutikoꞌn: “Chawilapeꞌ, e urox junabꞌ waꞌ kinkꞌunik koꞌlnutzukuj ujiqꞌobꞌalil wa cheꞌ re higo, yey na jinta kꞌana ujiqꞌobꞌalil kanriqo. Woꞌora chacheta bꞌi ma ¿saꞌ kutiqoj kꞌo chupa waꞌ wuꞌlew?” xchaꞌ.

8 Ekꞌu ri chajinel xubꞌiꞌij che: “Wajaw, yaꞌa chi la wa junabꞌ che, ma kantij chi na uqꞌij kankꞌot rij y kankoj abono chuxeꞌ. 9 Kꞌaxtaj kuya ujiqꞌobꞌalil; noꞌj we na xuya taj, kꞌa ekꞌuchiriꞌ utz kachet bꞌi” xchaꞌ.»

10 Pa jun qꞌij re uxlanibꞌal ri Jesús kakꞌutun chupa jun sinagoga. 11 Kꞌo kꞌu jun ixoq chiriꞌ e dieciocho lo junabꞌ riꞌ lik kꞌuyukꞌik uꞌanom ri rij ruma jun itzel uxlabꞌixel, yey na utz ta ne kusukꞌupij ribꞌ. 12 Y ri Jesús echiriꞌ xril rixoq, xusikꞌij apanoq y jewaꞌ xubꞌiꞌij che:

—Ixoq, lal kunutajinaq chi che ri yabꞌil kꞌo wi la —xchaꞌ. 13 Y xuya ruqꞌabꞌ puwi rixoq; y chupa kꞌu laꞌ la joqꞌotaj rixoq xsukꞌupitajik y xujeqo kuyak uqꞌij ri Dios.

14 Ekꞌu ri taqanel re ri sinagoga lik xpe royowal chirij ri Jesús ma xkunan chupa ri qꞌij re uxlanibꞌal, y xubꞌiꞌij kꞌu chike ri winaq:

—Kꞌo waqibꞌ qꞌij re chak; chupa waꞌ utz kape alaq re kakunax bꞌi alaq, pero lik na ubꞌe taj kakunax alaq chupa ri qꞌij re uxlanibꞌal —xchaꞌ.

15 Ekꞌu ri Jesús xubꞌiꞌij:

—¡Xa kebꞌ palaj alaq! Onoje ralaq ¿na kakir ta nebꞌa alaq ri bꞌoyex y ri buru chupa ri qꞌij re uxlanibꞌal chaꞌ kakꞌam bꞌi alaq chi tijoj yaꞌ? Kaꞌan ne alaq waꞌ chike yey xa e awaj. 16 Makꞌuwariꞌ taqal che wiꞌxoq katoꞌik, ma rire ralkꞌoꞌal kan ri Abraham,* Ri aj Israel lik kakiyak uqꞌij ri Abraham y kakibꞌiꞌij kiqaw che, ma e nabꞌe katiꞌ-kimam. yey e dieciocho lo junabꞌ waꞌ “yututal” ruma ri Satanás. ¿Na utz ta kami riꞌ kesax chupa ri yabꞌil pa ri qꞌij re uxlanibꞌal? —xchaꞌ.

17 Echiriꞌ xubꞌiꞌij waꞌ ri Jesús, lik xekꞌix konoje ri tzel kebꞌilow re; noꞌj konoje ri winaq lik kekiꞌkot ruma ri kꞌutubꞌal re runimal uchuqꞌabꞌ ri Dios kuꞌan ri Jesús.

18 Ekꞌuchiriꞌ, xubꞌiꞌij tanchi ri Jesús:

«¿Saꞌ rukꞌ kajunimax wi rutaqanik ri Dios? 19 Riꞌin kanjunimaj rukꞌ juna ijaꞌ re moxtasa, ri xkꞌam bꞌi ruma jun achi y xtikiꞌ chupa ri werta. Ekꞌu riꞌ waꞌ xkꞌiyik y lik xuꞌan bꞌojobꞌik; yey ri tzꞌikin kexikꞌikꞌ che ruwa kaj xkiꞌan kisok puwi taq ruqꞌabꞌ» xchaꞌ.

20 Y xubꞌiꞌij tanchi ri Jesús:

«¿Saꞌ rukꞌ kanjunimaj wi rutaqanik ri Dios? 21 E jelaꞌ pachaꞌ ri levadura, ma echiriꞌ juna ixoq kuꞌan pam, kutuk jubꞌiqꞌ levadura xoꞌlibꞌal oxibꞌ pajbꞌal harina y ri levadura kusipowirisaj upa ronoje ri qꞌor»† Wa kꞌambꞌal naꞌoj puwi ri levadura e keꞌelawi tobꞌ rutaqanik ri Dios xujeq xa rukꞌ kebꞌ oxibꞌ pero waꞌ kumaj ronoje ruwachulew. xchaꞌ.

22 Echiriꞌ ri Jesús kꞌo chi bꞌe re keꞌek Jerusalem, xikꞌow pa taq tinamit y pa taq aldeas, e riꞌ kakꞌutunik. 23 Y kꞌo kꞌu jun xbꞌiꞌn che:

—Wajawal, ¿xa nawi jujun ri kekolobꞌetajik? —xcha che.

Y ri Jesús xukꞌul uwach:

24 «Lik chichꞌikikej iwibꞌ chaꞌ kixok chupa ri nutaqanik che ri okibꞌal xa chꞌutiꞌn uwach, ma kambꞌiꞌij chiwe: Kopon na ri qꞌij echiriꞌ lik e kꞌi ri kakaj kebꞌok bꞌi, noꞌj na kayaꞌtaj ta chike kebꞌok bꞌi.

25 »Ma e kuꞌana pachaꞌ ri rajaw juna ja echiriꞌ kuꞌan juna nimaqꞌij. Echiriꞌ ebꞌokinaq chi konoje ri ebꞌusikꞌim, kutzꞌapij lo ri puerta, y na jinta chi kꞌu junoq kokik. Jekꞌulaꞌ riꞌ ri kikꞌulumaj riꞌix, na kixok ta chubꞌi. Kijeq kꞌu riꞌ kixchꞌaw apanoq: “Qajaw, Qajaw, yaꞌa ko la chiqe kojok bꞌi” kixchaꞌ.

»Yey Rire jekꞌuwaꞌ kukꞌul lo uwach chiwe: “Riꞌin na wetaꞌam taj pa ix petinaq wi riꞌix” kacha chiwe.

26 »Ekꞌuchiriꞌ, kijeq ubꞌiꞌxik: “Oj waꞌ kꞌu woꞌqinaq ukꞌ la yey xkꞌutun ne la pa taq ri bꞌe re ri qatinamit” kixcha che.

27 »Noꞌj Rire kubꞌiꞌij lo chiwe: “Paqatzij wi, riꞌin na wetaꞌam taj pa ix petinaq wi riꞌix. Chixela chinuwach, iwonoje ri ix ꞌanal re ri lik itzel uwach” kacha chiwe.

28 »Ekꞌuchiriꞌ, lik kixoqꞌik y kaqichꞌichꞌ ruwi iweꞌ echiriꞌ kebꞌiwil ri Abraham, ri Isaac y ri Jacob kukꞌ konoje ri qꞌalajisanelabꞌ e kꞌo rukꞌ ri Qaqaw pa rutaqanik chilaꞌ chikaj; yey ekꞌu riꞌ riꞌix na jinta piqꞌabꞌ kixok bꞌi kukꞌ. 29 Noꞌj e kꞌo ri na e ta aj judiꞌabꞌ e petinaq pa relebꞌal lo ri qꞌij, putzaqibꞌal ri qꞌij y pa ronoje luwar che ruwachulew, riꞌ kebꞌok chwa ri mexa pa rutaqanik ri Dios.

30 »Chiwilape kꞌu riꞌ, ma e kꞌo jujun chike ri na jinta kiwach wara che ruwachulew, e lik kakꞌojiꞌ kiwach chwach ri Dios chilaꞌ chikaj; yey e kꞌo ri lik kꞌo kiwach wara che ruwachulew, e kuꞌana na jinta kiwach chwach ri Dios chilaꞌ chikaj» xchaꞌ.

31 Chupa kꞌu waꞌ wa qꞌij xeqibꞌ jujun fariseos rukꞌ ri Jesús y jewaꞌ xkibꞌiꞌij che:

—Chelubꞌi la y oj la ma ri rey Herodes karaj kukamisaj la —xechaꞌ.

32 Y ri Jesús xubꞌiꞌij chike:

—Oj alaq y jeꞌbꞌiꞌij alaq che laꞌ laꞌchi, ri e pachaꞌ juna yak: “Waqꞌij y chweꞌq kꞌa kebꞌenuwesaj bꞌi ri itzel uxlabꞌixel y kanꞌan kunanik yey kabꞌij kꞌut kankꞌis ri nuchak” kacha alaq che. 33 Pero che kꞌu woꞌxibꞌ qꞌij chirajawaxik wi kambꞌinibꞌej pan nubꞌe kinꞌek, ma na taqal ta che juna qꞌalajisanel kakam kꞌa naj che Jerusalem —xchaꞌ.

34 Tekꞌuchiriꞌ xubꞌiꞌij:

«¡Jerusalem, Jerusalem, riꞌix kebꞌikamisaj ri qꞌalajisanelabꞌ y kebꞌiꞌan paꞌbꞌaj janipa ri ebꞌutaqom lo ri Dios iwukꞌ! E riꞌin ukꞌiyal laj lik xuaj xinmol kichiꞌ riwalkꞌoꞌal riꞌix jelaꞌ pachaꞌ kuꞌan juna atiꞌ akꞌ chike taq ruwiꞌch echiriꞌ kumol kichiꞌ chuxeꞌ taq ruxikꞌ, noꞌj riꞌix na xiwaj ta kꞌenoq.

35 »Chitape kꞌut, kꞌo jun qꞌij echiriꞌ ri iwocho riꞌix kawulix kanoq. Kambꞌiꞌij kꞌu chiwe na kiwil ta chi nuwach kꞌa echiriꞌ kopon na ruqꞌijol kibꞌiꞌij: