Riꞌin lik wetaꞌam ronoje ri kiꞌano. Kabꞌiꞌx ne chiwe “ix kꞌaslik”, pero na qatzij taj ma riꞌix ix kaminaq chwach ri Dios. 2 Kambꞌiꞌij kꞌu chiwe: Chixkꞌastajoq y lik chitija chi uqꞌij kiyak iwibꞌ che taq ri utz kꞌa kixtajin che uꞌanik, ma taq waꞌ katajin usachik uwach. Ekꞌu Riꞌin wilom ri iꞌanom, yey waꞌ na e ta ri karaj ri Dios chiwe. 3 Kꞌuna kꞌu chikꞌuꞌx saꞌ taq ri imajom y saꞌ taq ri itom chwi ri kꞌutunik ikꞌulum. E chitaqej taq waꞌ y chitzelej itzij chwach ri Dios; ma we kixwarik, Riꞌin xaqikꞌateꞌt kinopon iwukꞌ jelaꞌ pachaꞌ ri roponibꞌal releqꞌom, ma na iwetaꞌam ta kꞌu riꞌ ri ora echiriꞌ kinoponik. 4 Pero e kꞌo jujun tikawex iwukꞌ chiriꞌ Sardis lik jusukꞌ ri kibꞌinik kisilabꞌik chwach ri Dios, waꞌ na kichꞌulam ta kibꞌ rukꞌ ri mak. Yey chiqawach apanoq rike junam kebꞌin wukꞌ rukꞌ kiqꞌuꞌ saq, ma e taqal riꞌ chike. 5 China kꞌu ri kachꞌijow uchuqꞌabꞌ taq ri na utz taj, kawiq rukꞌ uqꞌuꞌ saq y na kanyoj ta rubꞌiꞌ chupa ri libro re kꞌaslemal na jinta utaqexik. Yey kanqꞌalajisaj kꞌu rubꞌiꞌ chwach ri Nuqaw y chikiwach ri ángeles e kꞌo rukꞌ. 6 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.

8 Riꞌin lik wetaꞌam ronoje ri kiꞌano. Chitapeꞌ: Riꞌin nuyaꞌom chiwach riꞌix jun puerta jaqalik y waꞌ wa puerta na jinta junoq kariqow utzꞌapixik; ma tobꞌ na lik ta kꞌo ichuqꞌabꞌ, e lik itaqem ri Nutzij y na kixkꞌix tane che ri nubꞌiꞌ chikiwach ri winaq. 9 Chitapeꞌ: Ri e kꞌo puqꞌabꞌ ri Satanás (waꞌ kakibꞌiꞌij “oj utinamit ri Dios ma oj aj judiꞌabꞌ” kechaꞌ, pero kakiꞌan raqꞌubꞌal ma na e ta kukꞌil rutinamit ri Dios), Riꞌin kanꞌan kꞌu chike rike e koꞌlkixuku kibꞌ chiwach riꞌix y kaketaꞌmaj kꞌu riꞌ Riꞌin lik kꞌax kixinnaꞌo. 10 Riꞌix ichꞌijom uchuqꞌabꞌ taq ri kꞌaxkꞌobꞌik rukꞌ unimal ikꞌuꞌx pachaꞌ ri ximbꞌiꞌij chiwe; ruma kꞌu riꞌ, kixinchajij che taq ri kꞌaxkꞌobꞌik katajin lo puwi ronoje ruwachulew, waꞌ e re kꞌambꞌal kipa konoje ri tikawex. 11 Chitapeꞌ: Riꞌin kinopon tan iwukꞌ; lik kꞌu miwesaj iwibꞌ che ronoje ri uyaꞌom ri Dios chiwe, chaꞌ jelaꞌ na jinta junoq kamajaw ri corona* “Corona”: Waꞌ keꞌelawi e ri rajil ukꞌaxel kuya ri Dios chilaꞌ chikaj chike ri xkiꞌan ri utz. kuya ri Dios chiwe. 12 China kꞌu ri kachꞌijow uchuqꞌabꞌ taq ri na utz taj, Riꞌin kanꞌan che kuꞌan pachaꞌ bastión re ukowil ri Rocho ri nu Dios y na kel ta chi kꞌana chiriꞌ. Kantzꞌibꞌaj kꞌu che rire rubꞌiꞌ ri nu Dios y rubꞌiꞌ rutinamit ri nu Dios, waꞌ e ri kꞌakꞌ Jerusalem kape chilaꞌ chikaj rukꞌ ri nu Dios. Yey kantzꞌibꞌaj ne ri kꞌakꞌ nubꞌiꞌ che. 13 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.

15 Riꞌin lik wetaꞌam ronoje ri kiꞌano. Riꞌix na ix tane joron y na ix tane kꞌatan. ¡Lik utz we ta ix joron o we ta ix kꞌatan! 16 Pero ruma kꞌu xa ix saqmiqꞌin ma na ix tane joron y na ix tane kꞌatan, kixinxabꞌej na lo pa nuchiꞌ. 17 Ma riꞌix kibꞌiꞌij: “Lik oj bꞌeyom, ronoje ri kajawax chiqe kꞌo chi qukꞌ y na jinta nibꞌaꞌil kaqatijo”; noꞌj lik toqꞌoꞌ ne iwach ma na kinaꞌbꞌej ta kꞌu riꞌ chwach ri Dios na jinta kꞌana iwach, lik ix nibꞌaꞌ, ix potzꞌ yey ix chꞌanalik. 18 E uwariꞌche kanya wa pixabꞌanik chiwe: Chiloqꞌo chwe Riꞌin ri oro lik chom, porotal chi utz pa aqꞌ, chaꞌ jelaꞌ paqatzij wi kixuꞌan bꞌeyom. Chiloqꞌo chwe Riꞌin riqꞌuꞌ saq re kikojo chaꞌ jelaꞌ kichꞌuq rikꞌix ruma ix chꞌanalik y chiloqꞌo chwe Riꞌin ri kunabꞌal re kikunaj riwach chaꞌ jelaꞌ paqatzij wi kixtzuꞌnik. 19 Riꞌin kanchꞌaꞌbꞌej kipa y kebꞌenuqꞌil konoje ri kꞌax kebꞌenunaꞌo; e uwariꞌche chitzelej kꞌu itzij chwach ri Dios rukꞌ ronoje ikꞌuꞌx. 20 Chitapeꞌ: Riꞌin in kꞌo pan chwach ri puerta y kinchꞌaw kꞌu apanoq; we kꞌo junoq kuta ri nuqul y kujaq lo ri puerta, Riꞌin kinok bꞌi y kinwaꞌ rukꞌ, y rire kawaꞌ wukꞌ Riꞌin. 21 China kꞌu ri kachꞌijow uchuqꞌabꞌ taq ri na utz taj, kanya che katzꞌuyiꞌ wukꞌ chupa ri nutzꞌulibꞌal pa kintaqan wi, jelaꞌ pachaꞌ Riꞌin nuchꞌijom uchuqꞌabꞌ ronoje ri na utz taj yey in tzꞌul chi rukꞌ ri Nuqaw chupa rutzꞌulibꞌal. 22 China kꞌu ri kꞌo utanibꞌal, e chuta ri kubꞌiꞌij ri Ruxlabꞌixel ri Dios chike taq riglesias, kachaꞌ.»