1 ¿Saꞌ kꞌu riꞌ kaqabꞌiꞌij puwi ri Abraham, ri nabꞌe qamam ojertan ri oj aj Israel? ¿Suꞌanik xꞌaniꞌ jusukꞌ che rire chwach ri Dios? 2 We ta ri Abraham xꞌan jusukꞌ che chwach ri Dios ruma taq ri chak xuꞌan xa pa riꞌre, taqal kꞌu riꞌ che kutakꞌabꞌaꞌ uqꞌij; tobꞌ waꞌ na jinta keꞌelawi chwach ri Dios. 3 Ma ¿saꞌ ri kubꞌiꞌij Ruchꞌaꞌtem ri Dios? Jewaꞌ kubꞌiꞌij:

4 Echiriꞌ juna aj chak kachakunik, kayaꞌiꞌ ri taqal che; yey waꞌ na e ta jun sipanik, ma uchꞌakom chik. 5 Noꞌj na je ta kꞌu laꞌ echiriꞌ ri Dios kuꞌan jusukꞌ che junoq. Ma waꞌ e jun sipanik re ri Dios, na e ta tojbꞌal re juna chak ꞌanatalik. Ma juna tikawex na kuꞌan ta jusukꞌ che ribꞌ ruma lik kachakunik; e kaꞌan jusukꞌ che xew ruma ri kubꞌulibꞌal ukꞌuꞌx rukꞌ ri Dios, ri kaꞌanaw jusukꞌ chike raj makibꞌ. 6 Yey ri David ubꞌiꞌim kanoq nim kiqꞌij kalaxik ri tikawex we ri Dios kuꞌan jusukꞌ chike y waꞌ na e ta ruma juna chak kiꞌanom, 7 ma jewaꞌ xubꞌiꞌij:

9 Echiriꞌ kubꞌiꞌij «nim kiqꞌij kalaxik», ¿xew nawi kachꞌaꞌt pakiwi ri kikojom ri retalil re circuncisión? ¡Na xew taj! Ma kachꞌaꞌt pakiwi ri kikojom ri retalil re circuncisión y pakiwi ri na kikojom taj.* Ri kikojom ri retalil re circuncisión e ri e aj judiꞌabꞌ, yey ri na kikojom taj; e ri na e ta aj judiꞌabꞌ. Yey qabꞌiꞌim puwi ri Abraham: Xꞌaniꞌ jusukꞌ che rire ruma ri kubꞌulibꞌal ukꞌuꞌx rukꞌ ri Dios.* Gn. 15:6 10 ¿Jampa nawi xꞌan jusukꞌ che ri Abraham? ¿Kꞌa e nawi echiriꞌ ukojom chi ri retalil re circuncisión? ¡Na e taj! Ma kꞌamajaꞌ ne kukoj waꞌ echiriꞌ ri Dios xuꞌan jusukꞌ che; tekꞌuchiriꞌ xkoj ri retalil re circuncisión che. 11 Wa retalil re circuncisión ukojom e kꞌutubꞌal re ri kubꞌulibꞌal ukꞌuꞌx, ri xukꞌutu echiriꞌ kꞌamajaꞌ kukoj waꞌ. Ruma kꞌu laꞌ, xeꞌeloq e rire ri kiqaw konoje ri kakubꞌiꞌ kikꞌuꞌx rukꞌ ri Dios, tobꞌ na xkoj tane waꞌ wa retalil re circuncisión chike. Jekꞌulaꞌ, ruma ri kubꞌulibꞌal kikꞌuꞌx kaꞌan jusukꞌ chike chwach ri Dios. 12 Ri kikojom ri retalil re circuncisión e ralkꞌoꞌal kan ri Abraham; pero xew taqal chike kakibꞌiꞌij kiqaw che rire we kakikꞌut ri kubꞌulibꞌal kikꞌuꞌx rukꞌ ri Dios che ri kibꞌinik kisilabꞌik, pachaꞌ ri xuꞌan ri qamam Abraham echiriꞌ kꞌamajaꞌ ne kukoj ri retalil re circuncisión.

13 Ri Dios xubꞌiꞌtisij che ri Abraham y chike konoje ri e ralkꞌoꞌal kanoq, kuꞌan na ke rike ronoje ruwachulew. Pero wa bꞌiꞌtisinik na xꞌan ta che ri Abraham ruma xutaqej ri taqanik re ri Tzij Pixabꞌ,† Wa Tzij Pixabꞌ tzꞌibꞌital kan ruma ri Moisés kꞌamajaꞌ kayaꞌtajik echiriꞌ kꞌa kꞌas ri Abraham. Gn. 22:17-18; Gl. 3:17 ma e ruma lik xkubꞌiꞌ ukꞌuꞌx rukꞌ ri Dios. Ruma kꞌu riꞌ, ri Dios xuꞌan jusukꞌ che. 14 We ta e laꞌ kꞌo pakiqꞌabꞌ taq ri winaq kakikꞌul rubꞌiꞌtisim ri Dios ruma kakiꞌan ronoje ri taqanik re ri Tzij Pixabꞌ, na jinta kꞌu kutiqoj riꞌ ri kubꞌulibꞌal kikꞌuꞌx rukꞌ ri Dios, yey na jinta ne uchak riꞌ rubꞌiꞌtisim ri Dios, ma na jinta junoq kuriq uꞌanik ronoje ri taqanik. 15 Ma ri Tzij Pixabꞌ e kukꞌam lo ri qꞌatbꞌal tzij pakiwi ri e aj palajiy tzij. Pero we ta e laꞌ na jinta taqanik, na jinta aj palajiy tzij riꞌ.

16 Ruma taq waꞌ, ri tikawex kakikꞌul rubꞌiꞌtisim ri Dios xew ruma ri kubꞌulibꞌal kikꞌuꞌx rukꞌ Rire. Qꞌalaj kꞌu riꞌ, wa sipanik xa e ruma ri unimal rutzil ukꞌuꞌx Rire, chaꞌ jelaꞌ kꞌo pakiqꞌabꞌ konoje ri ralkꞌoꞌal ri Abraham kakikꞌul na ri bꞌiꞌtisim chike ruma ri Dios. Yey e ralkꞌoꞌal ri Abraham na xew ta ri kꞌo ri Tzij Pixabꞌ re ri Moisés pakiqꞌabꞌ, ma e ralkꞌoꞌal konoje ri kubꞌul kikꞌuꞌx rukꞌ ri Dios jelaꞌ pachaꞌ ri xuꞌan ri Abraham. Ekꞌu rire e qaqaw qonoje riꞌoj 17 chwach ri Dios, jelaꞌ pachaꞌ ri tzꞌibꞌital kan pa Ruchꞌaꞌtem ri Dios: «Nuꞌanom chawe at kiqaw tikawex che ukꞌiyal tinamit»* Gn. 17:5 xchaꞌ. Ri Dios xubꞌiꞌij waꞌ che ri Abraham, yey rire xukojo; ma lik xkubꞌiꞌ ukꞌuꞌx rukꞌ ri Dios, ri kuya kꞌaslemal chike ri ekaminaq y kachꞌaꞌt chwi ri kꞌamajaꞌ kuꞌano pachaꞌ chi ya uꞌanom chik.‡ Ri Dios xchꞌaꞌt pakiwi taq ri e ralkꞌoꞌal ri Abraham echiriꞌ kꞌamajaꞌ kebꞌalaxik.

18 Ekꞌu ri Abraham xukojo kuꞌana kiqaw tikawex che ukꞌiyal tinamit jelaꞌ pachaꞌ ri bꞌiꞌtisinik ꞌanom che ruma ri Dios echiriꞌ xubꞌiꞌij che: «Lik e kꞌi kebꞌuꞌana rawalkꞌoꞌal.»* Gn. 15:5 Yey tobꞌ chwach ri Abraham waꞌ lik kꞌayew, na rukꞌ ta kꞌu riꞌ, lik xroyeꞌej rukꞌ kubꞌulibꞌal kꞌuꞌxaj jelaꞌ kuꞌanaꞌ. 19 Y na xqꞌobꞌ ta ri kubꞌulibꞌal ukꞌuꞌx tobꞌ retaꞌam rucuerpo e pachaꞌ kaminaq chik ma ya kopon pa jun ciento rujunabꞌ y retaꞌam ri rixoqil Sara na kalan taj. 20 Na rukꞌ ta kꞌu riꞌ, na kebꞌ ta ne upa xukoj ri xubꞌiꞌtisij ri Dios che, ma e lik xuchuqꞌubꞌej ribꞌ che ri kubꞌulibꞌal ukꞌuꞌx rukꞌ ri Dios. Lik kꞌu xuyak uqꞌij ri Dios, 21 ma lik ujikibꞌam ukꞌuꞌx e ri Dios kꞌo uchuqꞌabꞌ re kuꞌan ronoje rubꞌiꞌtisim. 22 Y ruma kꞌu ri kubꞌulibꞌal ukꞌuꞌx, xꞌaniꞌ jusukꞌ che.

23 Ekꞌuchiriꞌ Ruchꞌaꞌtem ri Dios kubꞌiꞌij: «Xꞌaniꞌ jusukꞌ che ruma ri kubꞌulibꞌal ukꞌuꞌx,» waꞌ na xew ta puwi ri Abraham xtzꞌibꞌax wi; 24 ma e paqawiꞌ ne riꞌoj. Ma ri Dios kuꞌan jusukꞌ chiqe riꞌoj ri kakubꞌiꞌ qakꞌuꞌx rukꞌ ri Jun xukꞌastajisaj lo ri Jesús, ri Qanimajawal. 25 Ekꞌu ri Jesús xyaꞌ pa kamik ruma ri qamak riꞌoj y xkꞌastaj bꞌi churox qꞌij chaꞌ jelaꞌ kojuꞌana jusukꞌ chwach ri Dios.