1 Chakuxtaj chike konoje ri kikojom rubꞌiꞌ ri Qanimajawal Jesucristo, lik chirajawaxik e kakinimaj y kakitaqej ri kakibꞌiꞌij ri e taqanelabꞌ y ri e aj qꞌatal tzij re ri tinamit yey kakiya kibꞌ che uꞌanik janipa taq ri utz. 2 Chabꞌiꞌij chike mechꞌaꞌt chirij junoq, mechꞌoꞌjinik; kikꞌutu ri rutzil kikꞌuꞌx y kiꞌana chꞌutiꞌn che kibꞌ chikiwach konoje taq ri tikawex.

3 Ma e riꞌoj rojertan echiriꞌ kꞌamajaꞌ ne kaqakoj rubꞌiꞌ ri Cristo, na jinta qanaꞌoj, oj titzꞌitaq, oj sachinaq, qayaꞌom qibꞌ puqꞌabꞌ ronoje ri rayinik y ruqusil ruwachulew, lik kꞌo retzelal qakꞌuꞌx, lik tzel kojilik y tzel kaqil qibꞌ chiqawach. 4 Na rukꞌ ta kꞌu riꞌ, ri Dios Qakolobꞌenel xukꞌut ri relej ukꞌuꞌx y ri rutzil ukꞌuꞌx chike konoje ri tikawex che ruwachulew. 5 Xojukolobꞌej kꞌu riꞌ, na ruma ta juna chak lik utz qaꞌanom, ma e ruma ri kꞌaxnaꞌbꞌal ukꞌuꞌx chiqe. Xojuchꞌaj kꞌu che ri qamak chaꞌ kuya jun kꞌakꞌ kꞌaslemal chiqe y xuya ri Santowilaj Ruxlabꞌixel pa qanimaꞌ chaꞌ kujalkꞌatij ri qabꞌinik qasilabꞌik. 6 Ruma ri Qakolobꞌenel Jesucristo, ri Dios xuya ri Ruxlabꞌixel chiqe yey ¡lik nim rutoꞌbꞌal Rire qukꞌ! 7 Uꞌanom kꞌu jusukꞌ chiqe ruma ri unimal rutzil ukꞌuꞌx chaꞌ kaqakꞌul na ri qoyeꞌem, waꞌ e ri qakꞌaslemal na jinta utaqexik.

8 Waꞌ wa kambꞌiꞌij pan chawe lik qatzij yey lik kuaj katok il che ukꞌutik waꞌ chike konoje ri kikojom rubꞌiꞌ ri Dios chaꞌ kakitijoj kibꞌ che uꞌanik ri utz. Ma taq waꞌ wa kꞌutunik lik areꞌ y lik kꞌo kutiqoj chike konoje ri tikawex che ruwachulew. 9 Maꞌan kꞌu aweꞌat kukꞌ taq ri kakichapalaꞌ kibꞌ rukꞌ taq chꞌaꞌtem na jinta uchak, ri kakichololej kibꞌiꞌ ri katiꞌ-kimam re ojertan y ri kechꞌoꞌjin puwi ri tzijpixabꞌ ke ri aj judiꞌabꞌ. Ma ronoje taq waꞌ na jinta keꞌelawi y na jinta kutiqoj. 10 We kꞌo kꞌu junoq kujach kipa taq rutinamit ri Dios, chachꞌaꞌbꞌej upa julajoq o kalajoq. Noꞌj we lik na kukoj ta kꞌu tzij, mawachbꞌilaj chik. 11 Awetaꞌam e junoq kujach upa rutinamit ri Dios, yojtajinaq runaꞌoj y mak ri kuꞌano. Yey ruma kꞌu rumak, utukel utzukum qꞌatbꞌal tzij chirij.

12 Echiriꞌ kantaq ri Artemas o ri Tíquico awukꞌ,* Ri Pablo kutaq bꞌi jun chike wa kebꞌ hermanos chaꞌ kakꞌojiꞌ pukꞌaxel ri Tito che ri chak pa taq riglesias chilaꞌ Creta. chawilij katpetik chaꞌ koꞌlqariqa qibꞌ wara Nicópolis, ma nuchꞌobꞌom chik kinkꞌojiꞌ wara chupa ruqꞌijol echiriꞌ lik kꞌax tew y kꞌo jabꞌ.

13 Kambꞌiꞌij chawe lik chatoꞌo ri Zenas, ri aj kꞌutunel re ri tzijpixabꞌ yey chatoꞌo ri Apolos. Chayaꞌa kꞌu chike ronoje taq ri kajawax che ri kibꞌenam chaꞌ kakimaj bꞌi kibꞌe. 14 Lik chirajawaxik kꞌu chike konoje ri e qukꞌil riꞌoj, ri kikojom rubꞌiꞌ ri Cristo, kakimaj uꞌanik ri utz y kekitoꞌ kꞌu taq ri kꞌo kajawax chike chaꞌ jelaꞌ kꞌo kutiqoj ri kibꞌinik kisilabꞌik. 15 Konoje taq ri e kꞌo wara wukꞌ, kakiya pan rutzil awach. Y riꞌat chayaꞌa rutzil kiwach ri kikojom rubꞌiꞌ ri Dios, ri kꞌax kojkinaꞌo. Chikꞌulu kꞌu iwonoje riꞌix ri unimal rutzil ukꞌuꞌx ri Dios. Amén.