Apocalipsis.
5.
Xinwil jubꞌotaj wuj kꞌo puqꞌabꞌ uwikiqꞌabꞌ ri Jun tzꞌul chupa ri tzꞌulibꞌal re taqanik. Ekꞌu wa jubꞌotaj wuj kꞌo tzꞌibꞌital chupa y chirij, yey nakꞌom rukꞌ wuqubꞌ sellos. 
Xinwil kꞌu jun ángel lik kꞌo uchuqꞌabꞌ xsikꞌin che ubꞌiꞌxikil: «¿China ri yaꞌtal che kukir uwach ri jubꞌotaj wuj y kulochꞌij ri sellos kꞌo che?» xchaꞌ. 
Yey na jinta ne junoq chilaꞌ chikaj o che ruwachulew o chuxeꞌ ulew yaꞌtal che kulochꞌij ri sellos nakꞌom che ri jubꞌotaj wuj re karajilaj uwach o tobꞌ ne xa re karilo. 
Ekꞌu riꞌin lik kinoqꞌik, ma na jinta junoq riqom yaꞌtal che kukir uwach ri jubꞌotaj wuj re karajilaj uwach o tobꞌ ne xa re karilo. 
Kꞌo kꞌu jun chike ri veinticuatro nimaq winaq, jewaꞌ xubꞌiꞌij chwe: —Matoqꞌ chik, ma e ri Jun Koj re ri tinamit Judá, ri ralkꞌoꞌal kan ri rey David, ri uchꞌijom uchuqꞌabꞌ ronoje ri na utz taj, yaꞌtal kꞌu puqꞌabꞌ Rire kulochꞌij ri sellos y kukir uwach ri jubꞌotaj wuj —xchaꞌ. 
Tekꞌuchiriꞌ xinwilo, chwach ri tzꞌulibꞌal re taqanik y chikixoꞌlibꞌal ri kajibꞌ kꞌo kikꞌaslemal pachaꞌ e ángeles y ri nimaq winaq, chakal jun Qꞌapoj Bꞌexex pachaꞌ lik ꞌanom kꞌax che. Wuqubꞌ ri rukꞌaꞌ y wuqubꞌ ruwach, waꞌ keꞌelawi e ri wuqubꞌ uwach Uxlabꞌixel re ri Dios taqom lo che ronoje ruwachulew. 
Ri Qꞌapoj Bꞌexex xqibꞌik y xukꞌam ri jubꞌotaj wuj kꞌo puqꞌabꞌ uwikiqꞌabꞌ ri Jun tzꞌul pa ri tzꞌulibꞌal. 
Echiriꞌ kꞌo chi ri jubꞌotaj wuj puqꞌabꞌ, ri kajibꞌ kꞌo kikꞌaslemal pachaꞌ e ángeles y ri veinticuatro nimaq winaq xkixuk kibꞌ xeꞌraqan uqꞌabꞌ ri Qꞌapoj Bꞌexex. Konoje kukꞌaꞌam ki arpa y kicopa re oro nojinaq che incienso. Wa incienso keꞌelawi e taq ri oración kakiꞌan rutinamit ri Dios. 
Y kakibꞌixoj wa jun kꞌakꞌ bꞌix: «Xew Rilal taqal cheꞌla kakꞌam la ri jubꞌotaj wuj y kalochꞌij la taq ri sellos nakꞌal che, ma xya ibꞌ la pa kamik y jekꞌulaꞌ xeloqꞌ la rukꞌ ri kikꞌel la konoje rukꞌiyal kiwach taq ri tikawex che ronoje rukꞌiyal uwach chꞌaꞌtemal y konoje taq ri tinamit chaꞌ kebꞌuꞌana re ri Dios. 
Xꞌan kꞌu la xa jun tinamit chike y xꞌan la chike e chakunel chwach ri Dios y ketaqan kꞌu che ruwachulew» kechaꞌ. 
Tekꞌuchiriꞌ xebꞌenuwil ukꞌiyal ángeles kisutum rij ri tzꞌulibꞌal re taqanik yey kisutum kij ri kajibꞌ kꞌo kikꞌaslemal pachaꞌ e ángeles y ri nimaq winaq. Ri kikꞌiyal wa ángeles na kachꞌijitaj ta kajilaxik ma lik e ukꞌiyal millones. Yey xinto 
lik ko kesikꞌin che ubꞌiꞌxikil: «Ri jun Qꞌapoj Bꞌexex lik ꞌanom kꞌax che, xew che Rire taqal wi kakꞌojiꞌ ronoje taqanik y bꞌeyomal puqꞌabꞌ, xew rukꞌ Rire kꞌo saqil naꞌoj y unimal chuqꞌabꞌ, xew che Rire taqal wi kaxuk ibꞌ chwach y kayak uqꞌij ruma ri unimal uchomalil» kechaꞌ. 
Jekꞌulaꞌ xebꞌenuta konoje taq ri e ꞌanatal ruma ri Dios: ri e kꞌo chilaꞌ chikaj, ri e kꞌo che ruwachulew, ri e kꞌo chuxeꞌ ulew y ri e kꞌo chupa ri mar, jewaꞌ kakibꞌiꞌij: «Che ri Jun tzꞌul pa ri tzꞌulibꞌal y che ri Qꞌapoj Bꞌexex, taqal ri yakbꞌal kiqꞌij y ri kaxuk ibꞌ chikiwach yey taqalik kabꞌiꞌxik kꞌo kichomalil y kichuqꞌabꞌ na jinta utaqexik» kechaꞌ. 
Ri kajibꞌ kꞌo kikꞌaslemal kakikꞌul pan uwach: «¡Amén!» kechaꞌ. Y ri veinticuatro nimaq winaq xkixukubꞌaꞌ kibꞌ, xkiqasaj kꞌu kimejelem kꞌa chuꞌlew y xkiloqꞌnimaj uqꞌij ri Jun na jinta utaqexik rukꞌaslemal.