Apocalipsis.
8.
Echiriꞌ ri Qꞌapoj Bꞌexex xulochꞌij ruwuq sello nakꞌal che ri jubꞌotaj wuj, laj juna mey ora lik xtzꞌintzꞌot chilaꞌ chikaj, na jinta chi kꞌo xtatajik. 
Tekꞌuchiriꞌ, xebꞌenuwil ri wuqubꞌ ángeles e takꞌal chwach ri Dios y xyaꞌ kꞌu jun trompeta chikijujunal. 
Xkꞌun chi lo jun chik ángel y xtakꞌiꞌ chwach raltar. Waꞌ rukꞌaꞌam jun rachpom re oro. Y xyaꞌ kꞌu ukꞌiyal incienso che re kuꞌan bꞌi xa jun rukꞌ taq ri ki oraciones konoje rutinamit ri Dios yey waꞌ e qasaꞌn chwi raltar re oro kꞌo chwach ri tzꞌulibꞌal re taqanik. 
Lik kabꞌuqbꞌut kꞌu ri sibꞌ xel chupa ri rachpom kꞌo puqꞌabꞌ ri ángel y xopon kꞌa chwach ri Dios junam rukꞌ taq ri ki oraciones rutinamit ri Dios. 
Ekꞌu ri ángel xukꞌam ri rachpom y xunojisaj che ri rachqꞌaꞌl kꞌo chwa raltar. Tekꞌuchiriꞌ xupukꞌij lo che ruwachulew. Ewi xtataj uchꞌawibꞌal jabꞌ karaqlajik y kajininik, y xyokꞌ kaꞌn ruxeꞌ kaj; yey xpe jun nimalaj kabꞌraqan. 
Ri wuqubꞌ ángeles, ri kukꞌaꞌam ri wuqubꞌ trompetas, xkiyijbꞌaꞌ kibꞌ che uchꞌawisaxik taq waꞌ. 
Ri nabꞌe ángel xuchꞌawisaj rutrompeta, y xpe kꞌu saqbꞌach rachbꞌiꞌil aqꞌ rukꞌ kikꞌ chwi ruwachulew. Y ruma waꞌ xkꞌat rurox parte che ruwachulew, xkꞌat rurox parte che ronoje taq ri cheꞌ, ri tikoꞌn y raqꞌes. 
Rukaꞌm ángel xuchꞌawisaj rutrompeta, y kꞌo xtzaq chwi ri mar pachaꞌ juna juyubꞌ kajumuw aqꞌ che. Y ruma waꞌ rurox parte che ri mar xuꞌan kikꞌ uwach. 
Y xekam kꞌu rurox parte chike rawaj e kꞌo chupa ri mar yey rurox parte chike taq ri barcos e kꞌo chwi ri mar, xsach kiwach. 
Rurox ángel xuchꞌawisaj rutrompeta, y jun nimalaj chꞌumil kajumuw aqꞌ che xtzaq lo chikaj puwi rurox parte che taq ri raqanaꞌ y taq rakꞌal pa kalax wi lo yaꞌ. 
Rubꞌiꞌ waꞌ wa jun chꞌumil e “Kꞌa”. Ewi rurox parte che taq ri nimayaꞌ lik xuꞌan kꞌa; y ukꞌiyal winaq xekam ruma rukꞌayul ri yaꞌ. 
Rukaj ángel xuchꞌawisaj rutrompeta, y lik xꞌan kꞌax che rurox parte che ri qꞌij, che ri ikꞌ y chike ri chꞌumil. Xqꞌobꞌ kꞌu taq ruwonibꞌal waꞌ, jelaꞌ xujeq kamoymot uwach ri saq paqꞌij y xuꞌan más qꞌequꞌm raqꞌabꞌ. 
Tekꞌuchiriꞌ xinwil jun águila kaxikꞌikꞌ chikaj y xinto jewaꞌ kasikꞌin che ubꞌiꞌxikil: «¡Toqꞌoꞌ kiwach! ¡Toqꞌoꞌ kiwach! ¡Toqꞌoꞌ kiwach konoje ri ejeqel che ruwachulew ruma ri kakikꞌulumaj echiriꞌ ri oxibꞌ ángeles kakichꞌawisaj ri jujun chik trompetas! ¡Ma ya e kuꞌana waꞌ!» kachaꞌ.