1 Nunia Israel ni weari ainaujai tangkurtuk tura warinchurtuk Beerseba yaktanam jeamiayi. Tura nuni jea, ni apari Isaac yaanchuik tangkurin maa, Yusen susatas epeamia nunisang niisha turamiayi. 2 Turamtai Yus kashi tari, ni yaanchuik naarin pachis untsuk: —Jacob, Jacob —tamati, Israel ayaak: —Juni pujajai —timiayi.

3-4 Tamati Yus chicharak: —Wikia Yusetjai. Ami aparmi Yusrinjai. Wikia amijai Ejipto nungkanam wetatjai. Tura nuni jeakmin, ami wearam ainaun nukap yujratnuitjai. Tura asamtai Ejipto nungkanam shamkartutsuk weta. Nunia nukap arusan ami wearam ainaunka ataksha Ejiptonmaya waingkiartinuitai. Tura ame jakatatme nuningkia Josésha amijai tsanias pujutnuitai, —timiayi.

5 Tamati Jacobo uchiri ainau Beersebanmaya jiinkiartas, ni uchiri ainaun, tura nawantri ainauncha carretanam Faraón niin yaruaktiniun akupturmia nuni engkerar jukiarmiayi.

6 Jacob ni weari ainaujai mash Ejiptonam wear, ni vacari tura ovejari ainaun tura Canaánnum pujusar, takutai ainauncha mash yaruakarmiayi. 7 Kame, Jacobo uchiri ainau, nawantri ainausha, tura tirangki ainausha mash wearmiayi.

8 Jacobjai Ejipto nungkanam wearmia nuka ju armiayi: Jacobo uchiri eemkauri Rubén, 9 tura Rubénka uchiri Hanoc, Falú, Hezrón, tura Carmi.

10 Simeónka uchiri ju armiayi: Jemuel, Jamín, Ohad, Jaquín, Zohar, tura Saúl. Nu Saúlka nukuri Canaánnumia nuwa ayayi.

11 Leví uchiri ju armiayi: Gersón, Coat tura Merari.

12 Judá uchiri ju armiayi: Er, Onán, Sela, Fares tura Zara. (Kame, Er tura Onáncha Canaán nungkanam yaanchuik jakarmiayi.) Tura Faresa uchiri jimiar ju aarmiayi: Hezrón tura Hamul.

13 Isacara uchiri ju armiayi: Tola, Fúa, Job tura Simrón.

14 Zabulónka uchiri ju armiayi: Sered, Elón tura Jahleel. 15 Ju aints ainauka Jacob Padán-aramnum pujus Leanam yajutmarmiayi. Tura nuni pujus nawantrincha Dina naartinnun nawantrumramiayi. Jacobo weari Leanau ainauka aishmang ainau nuwa ainaujai mash irumram treinta y tres armiayi.

16 Tura Gada uchiri ju armiayi: Zifión, Hagui, Ezbón, Suni, Eri, Arodi, tura Areli. 17 Tura Asera uchiri ju armiayi: Imna, Isúa, Isúi tura Bería, tura nuna umaji Sera naartin. Bería uchiri jimiar armia nuka Heber tura Malquiel armiayi. 18 Nu aints ainauka Jacobnau Zilpa jerermiayi. Kame, Lea apari Labán: —Zilpa Lea inatiri ati —tusa susamiayi. Tura nuka mash irumram dieciseis armiayi.

19 Jacobo nuwari Raquela uchiri ju armiayi: José tura Benjamín. 20 José Asenatnum yajutmarmia nusha ju armiayi: Manasés tura Efraín. Nuka Ejipto nungkanam akiinawarmiayi. Tura Asenatka Potifera nawantri ayayi. Tura Potiferaka yakat Onta sacerdoteri ayayi.

21 Benjaminka uchiri ju armiayi: Bela, Bequer, Asbel, Gera, Naamán, Ehi, Ros, Mupim, Hupim tura Ard. 22 Jacobo tura Raquela weari mash irumram catorce armiayi.

23 Nunia Danka uchiri kichik Husim naartin amiayi. 24 Tura Neftalia uchiri ju armiayi: Jahzeel, Guni, Jezer tura Silem. 25 Nu ainauka Jacobnau Bilha jerermiayi. Kame, Raquela apari Labán: —Bilha Raquela inatiri ati, —tusa susamiayi. Tura nuka mash irumram siete armiayi.

26 Aints Jacobjai Ejiptonam wearuka nuu numpak ni najatin nekapmatsuk sesenta y seis aints armiayi. 27 José uchiri Ejiptonam akiinawarmia nuka jimiar armiayi. Tura asamtai nujai mash irumram Jacob ni weari ainaujai Ejiptonam jearmia nuka setenta aints armiayi.

28 Jacob nungka Gosénnum jeatak wajas, Joséjai nu nungkanam ingkunikmi titas, Judá emajati tusa akupkamiayi. Tura Gosén nungkanam taaramtai, 29 José: Aparam Gosénnum tayi tamaun antuk, ni inatirin: —Carro iwiarturataram, aparjai ingkiungtajai —timiayi. Tura carron umisaramtai, José Gosénnum we, aparijai ingkiunik, aparin minakas waraak nukap juutmiayi.

30 Turamtai Israel Josén chicharak: —Maaketai, uchiru, yamaikia wainkajme. Nekasam iwiaakuitme. Yamaikia iimia wiki iwiaaku pujamin wainkau asan, pengker nintimsan jaaknasha jakamnawaitjai, —timiayi.

31 Nuniangka José ni yachi ainaun tura apari weari ainauncha chicharak: —Yamaikia faraónkan werin jiisan: Wina yatsur ainau tura aparu weari ainausha wijai pujusartas Canaánnumia kaunkari tusan ujaktajai. 32 Turakun ni ovejari ainaun tura vacari ainauncha tura ninu ainausha mash yaruakar ikiaankari tusan ujaktatjai. 33 Nuniangka faraón atumin untsurmak: ¿Atumsha warí takakminuitrume tusa ininmataikia?, 34 ayaakrum: Ii juuntri ainauka tuke oveja wainin asaramtai, iisha nunisrik oveja wainin ainaji titaram. Takurminkia ejiptonmaya ainauka oveja wainin ainaujaingkia pujuschamin asaramtai, atumka Gosén nungkanmak pujustinuitrume turamtatrume, —José timiayi.