Miamun.
49.
Yakop inuꞌ narun rusan santan impruꞌ da ini rutin ibiani, “Agam santan wabampa wampruꞌ ruam watsuafiꞌ dzi da dzi nani nan idzuwai nida waꞌan da agam da gubuꞌ bampan aga. 
“Dzi, Yakop, narungꞌ rusangꞌ, wampruꞌ ruam waba da waringant i dzi, agam ramanggam Israil, nan gangꞌ nidan. 
“Ruben, dzi narunggangꞌ miamun, u waꞌ da u santingꞌ dzi rini urun gangꞌ miamun. U yu bingan tsiraꞌ da nampang iyus raim rusam. 
Agu bi mpui furan fuafagin suda tsurupiap da wasangꞌ i garam ntingan u, da bitsintaꞌ wasangꞌ i rungꞌ tsarifa agu u, i u atangꞌ ramanggam ungaran sib da u rim rini miaꞌ tsiraꞌ bingan da dzi. 
“Simion da rainggan Liwai isangꞌ ruan angu i uwayant i suda bangi biꞌ da wayada nam. 
Dzi wasangꞌ i mpada wasaꞌ i rib iruꞌ igi nan gan maradzigin tipan u. Iyu wangun tsakiadan utaꞌ angu da yis garam funub da itipuꞌ makau faga far utaꞌ utaꞌ angu isangꞌ maranggan furan. 
Nam pupuarapan narut ribarangan i nam nugun tsakia tsiraꞌ da nugun tsiaꞌan i rima tsakia da isa garam funub. Dzi bungꞌ awat ribarangan rai nadzarang nampa wasaꞌ i garam Israil gampan. 
“Yuda, u raim rusam bungꞌ atsarif agu, da bungꞌ aidzaꞌ fagan da agu. Da agu bungꞌ agab garam ipiapam wan. 
O Yuda, agu sangꞌ laion naru faꞌ mangan gada apu gan garadan da tipa bada gan gingꞌa gin. Da isangꞌ laion amputan i mprutsan da manga wasangꞌ suda frapin. 
Mingꞌa Yuda da bungꞌ agif bungaꞌ king gan i banginggan da yanginggan taptap bungꞌ asu king, nasangꞌ bungaꞌ igi ramanggan nidzun suda wain gin bawaꞌan da garam intap wain wain atangꞌa warangꞌ i arangan. 
Yuda bruꞌ wain gan bungꞌ ayus da arangan bungꞌ adzur dongki gan nafa bruꞌ wain bini yusan maran aridagin. Bungꞌ atip wain gurun nayus da bungꞌ adzuꞌ ngarukui gan gin. 
Arangan maranidzun bungꞌ asu biꞌ i wain numan, da nifu urun bungꞌ asap nidzun angu i makau sisu gurun numan. 
“Tsebulun bungꞌ ampa namingꞌ mpui uruts ringan da bungꞌ asu mumai bini madzung ba antungꞌa gin. Da ampapan bungꞌ afan da nawaꞌ gamp Saidon. 
“Isakar ibi dongki riniurun gingꞌa wasaꞌ i tayap nam bunump iruꞌrun. 
Gubuꞌ arangan tsanganda intapan igi bida intap ngarubini bingan mpada asap gin, da bungꞌ adzuangꞌ aruꞌ da nausu runggan i buaringꞌa barabin bida mamaꞌ gum utaꞌ angu. 
“Dan bungꞌ asu gudzun i raruda garaman bini nabi utupan Israil fain naga. 
Dan bungꞌ abi muntsir isiꞌ angu da nampang tsiraꞌ gingꞌa sanab ringan. Da bida hos runta badan da bungꞌ agara i faga mutun, da garam mpada hos bungꞌ aruaꞌ nafa barun gin. 
“O Yawe, dzi mpa irim marangꞌ i u yuda dzi sinungꞌ ipiap banginggan. 
“Garam wapa nam bungꞌ awaꞌ da nais Gat, da bitsintaꞌ arangan bungꞌ ais ribarangan da nadaru rai nafan. 
“Aser intapan bungꞌ anti nidzun angu i nam gadan bini. Da bungꞌ arim nam bini mara maran nasangꞌ king ruasan gadan. 
“Naftali ibi dia rinan runta utaꞌ angu yungan i maranggan furan, da rima narun ruas bini bini angu. 
“Yosef ibi bruꞌ muntida uts da mpui maran da kapa nidzun bini yusan da bangi ngab yari ragun i nam santan. 
Garam isa nam i biriang da dampa iwaꞌ da yintsaꞌ i faningꞌa arangan da isa arangan funub. 
Da bitsintaꞌ Yosef bangin waratarat da gan dampa gan u, imaꞌ. Bangin ipuapap angu i Yakop Anutu gan nampang gan irim arangan sib, da binganggan fain ibi Garam Mpada Tayangꞌ Dumpa da Tauf Tsiraꞌ Muntida Sib i Israil. 
Da dzi Anutu gangꞌ Nampang Wain bungꞌ arim agu sib da nanang nam bini ampi bingan nawaꞌ da agu: natangin gamiꞌ namingꞌ maranguntung wagungꞌ naruꞌ, da mpui namingꞌ intap warangꞌ nayab, da sagat da apu rinan santan narim narun ruas nayus. 
Nam fintidan ampi bingan u ramanggam dzi riman da agu iyus nam bini bini mingꞌa mamai ratar ratar sib. Nam fintidan santan igi narut agu, Yosef, i u yu bingan tsiraꞌ imingꞌ wasaꞌ i u raim rusam santan. 
“Benyamin isangꞌ iyam buman ragiyab tsiraꞌ. Tataꞌ santan da arangan igara apu funub da igan. Da nam nufan da arangan ifab fain rumingꞌan igi.” 
Nigi utup 12 Israil, da raman Yakop ifinti i nan fintidan igi intuang ribarangan ruga rugan. 
Yakop ini nan babampafan da narun rusan ibiani, “Isu uts i dzi mampan. Da agam warim dzi wampruꞌ da dzi ramangꞌ rusangꞌ namingꞌ tauf bampun mingꞌa Efron garam Hit intapan 
mingꞌa Makpela ugu, Mamri marafain gan gubuꞌ yaban mingꞌa intap Kanan. Tauf bampun da intap igi da Abraham iyu imingꞌ Efron gin, i rima badzab in. 
I mingꞌa nigi da irim Abraham da fininggan Sara da Isak da fininggan Rebeka, da dzi rim Lia imingꞌ nigi impruꞌ. 
Dzi rumpunggan Abraham iyu intap da tauf bampun igi imingꞌ garam Hit gin.” 
Yakop intsup nan gan nidan da narun rusan sib da intsrung faganggan iyab rabiꞌ gan da igingꞌ iruꞌ da imamp.