PORI MA EFESASÍ NANIN BANTA UVAMAN AMEIN BOMPON MINO
(Efesasi)
Efesasi Vompon Ma Uvanteí Pákenai Afova Vaya Ino
Ma vompon ma uvantein banta ino.
Baya varen orin banta Pori ino.
Uvarein orana ino.
AD sikisti-tu (62) fin mi Korosí nanin bantai vompon má Firimonini vompon má manafin kauran baren orein mino.
Ma vompon ma uvantein baru ino.
Romú kákan barurá karavusií uran báken karavusi namun pintéi uvanten mino.
Ma vompon ma uvaman amikhein kéká ino.
Efesasí ma monó nanin banta varé eimpin mifo mai vompon mano anan Esiá barafin ma varé ein monó namun kayofimpá deren eúkukhen mino.
Nái ana vará ma vompon uvanten nafino.
Ena anan nanin banta finté ma monó tiyain nana ma Esiá barafin bain Yutan kayo ano ma oyan amen nan mino. Yutan kayo vá ena anan kéká bápin ma ákona kafi varé ein ma Tiyarafenu ano Karaisin tiantan ma yoruman barákuren ma míkampin mana mumunan kaen ma inká Karaisimpin ma maman mana kékasíen ma ukhein nan mi ma ma minópá uvaman amikhein bompompin tian amá ukhen mino. Ma vomponi kankan saptafin mi monó tin avúavá pákena ineine amen mi inká Tiyarafenui aruvin dana san tikhan ma minó ano anunu iyain vesi va san tian amá ukhen mino. (Sapta 6:10-18 fin ná onano.)
1
Porini Susu Vaya Ino
1 * Apo 18:19-21; 19:1Yisas Karaisini kama vaya varen orin bantaí ino van ma Tiyarafenu ano vei anunurá ma aní ukhein banta séi Pori anon ma vompon uvaré uno. Efesasí ma Tiyarafenui kantá nanin banta váken Yisas Karaisintá ma mumunan ukheona kayon uvaman amé uno.
2 Teti Sifóe Tiyarafenu vá inká tetisi Bafan Yisas Karaisin má anon tiretin tarisari uren ará kusin aminten mino.
Yisas Karaisin Táké Ma Kantasí Ukhein Avu Varan Baya Ino
3 * Efe 2:6Tetisi Bafan Yisas Karaisin Afóen Tiyarafenu avisá daní ó tifano. Béi anoi setin tivábá uren mi inaru fákena kama yanasinta setin timikhan mai anoi setin tú iyampon tiya iyan mino. 4 * Yon 15:16Mai fara vara seyo, Tiyarafenu ano ma vara ída uvanten pefái setin aní uren Yisasin má maman túpá ukharen mino. Para va ino. Béi setin nan anunu uren mi mai avúavá mádan baren ben avorá kantasí ukhein nanin banta ano setin nan ída aau manten mino sinten mino. 5 * Yon 1:12Tiyarafenu ano Yisasin pinté uaren tetí ankan e sivían be akhasí ono van inikhen mi véin kákan amusin uanten mino. 6 Tiyarafenu ano ma setin tarisari urá ma ve Anin má túpá ukhé tiferuna vará ben aví daní ó tifano. 7 * Efe 2:7; Kor 1:14Tiyarafenu ano Yisas Karaisin pinté uaren mi setin moéken tarisari uren beni narefó ume finté setin evaránen tivíken mino. 8 Tiyarafenu ano vei kama ineine vá tarisari vá tetimpin banaen mino. 9 * Rom 16:25Pefá ma Tiyarafenu ano ma Yisas Karaisintái ma yaná baranté uno siren ma inian kain ma aúpá bá ein mai saréan bariyáken mi setimpin tian amá iyan mino. 10 * Kor 1:16, 20Mai veni ineine máan mi ukhen mino. Be ma aní ukhein damú ma afoká intin maen minó ma vara ráke yanasinta vá inaruráke yanasinta vá o éke e éke uan manafin átaru urantin maen Yisas Karaisini yafisin aránaópá anan banten mino.
11 * Rom 8:28-29Yisas Karaisin má ma súpá ukhé tiferuna van mi Tiyarafenu ano setin nan bei vanasi ino sen aní ukhen mino. Máan tukhantíi Tiyarafenu ano ma fefá iyátintákaré ein danasinta vará tifanté uno. 12 Tiyarafenu ano ma máan tein mai seti Yutan nanin banta ano ma Yisas Karaisimpin naren ma ákona inin ma ave ukhé tiferuna kéká ano Tiyarafenu aví daní iyan kákan bí amino van mino. 13 Tireti ena anan nanin banta ano Yisasini fura vaya vá kama vaya vá inire mumunan e ono. Máan ma eona anon tiretin aya uran mi Tiyarafenu ano seti Yutan kayo ma einíen tiretin avían Yisasin má túpá en mino. Máan turen mi vei vanasi ma ameno van iyáantan baré ein Kantá Aunan ma siretin amein manon beni vanasi ino sen aní ukhen mino. 14 * 2Ko 1:22Tetí ankan ma Tiyarafenu ano iyátintan bain danasinta ma ínaimpá baranunai fura sen Kantá Aunampó tetimpin aní ukhen mino. Mai vará tetí ankan kakhakein Tiyarafenu aví daní ó tifano.
Efesasí Nanin Banta Ayaino Van Ma Pori Amúkein Baya Ino
15 Bafan Yisasintá ma ákona e mumunan iyáke monó nanin banta ma minó pimpá ma vain ma avábá iyaona vaya vá iné uno. 16 Mai van mi séi Tiyarafenu vaípá ena ena susu siantiyáké ákona é timúkuantiyá uno. 17 * Kor 1:9Máan tiyá inká tetisi Bafan Yisas Karaisin Afóe ma moéken kakhakhein Tiyarafenu vaípá tiretíi mumunampin kama afova amintin Tiyarafenurá ma mumunan in avúavá kama e afová ono van timúkuantiyá uno. 18 Máan tiyá inká tiretíi inin ona yiantantiya kama yanasinta ma ameno van dan bain afová ureya mai yanasinta varanté uno sire mairá ákona kaono van mai van deren timúkiyá uno. Mai fara vara seyo, kokhon danasinta ma vei vanasi iyáantan baréin ma amikhein afová ono van muno. 19-20 * Kor 1:11; Íbo 110:1; 2Ko 13:4; Kor 2:12 * Íbo 110:1; 2Ko 13:4; Kor 2:12Máan tukhái mai ma minó daná esantaren dan uron bain ákona vaintá ma mumunan iyá tiferuna kéká ano afová ó tifano van mi simúkiyá uno. Mai ákona maen mai ma Yisas Karaisi ma furin pintena evaránen avían mantaren kákan bí amiren ma ve ayan kurompá ma yan inarufá bain má manaí ukhein ákona ino. 21 * Kor 1:16; 2:10Máan tukhein nan mi Yisas Karaisi anon namu aunan kayo ma moékan ákona vain kayorá dafíken mino. Máan tukhan mi ven aví bá ákona vá anon ánon banta kayo aví bá ákona vá esantakhen mino. Máan tukhein béi ída saréa ana yafisinten mifo ínaimpá deren dafisinten mino. 22 * Íbo 8:6Tiyarafenu ano minó danáká ma yafisin ákona Yisas Karaisin amikhen mino. Mai monó nanin banta ano mai fintena ayain barano van mi mai ákona amikhen mino. 23 * Rom 12:5; Efe 4:10, 15; Kor 1:18Monó nanin banta ma vain mai Yisasin aun ban mino. Máan tukhan mi minó akhempá ma vain danasintafin béi kanai suron ukhen mino.