“Awemuy mina pagpopoyungan ya nonot muy gafu ta inuhohug ken ta ayanin, te am ikatalak muy ya Namaratu, a mappya ta iyak hapa ya ikatalak muy. 2 Te maski magtugutak a eyak mangiparan ta pagyanan muy ta bali ni Damakewan, te addu hapa ya pagyanan ta bali na en, a awek mina nebar tekamuy am awa kustu. 3 A gafu ta eyak mangiparan ta pagyanan muy a tolin ta kam hapa sangaw, te alapan ta kam sangaw teyak, petta magyan kam hapa la teyak. 4 A mappya hapa, te amu muy hala ya eyan ku ikid na dalan,” kunna.

“Pa-pa-nun mi hud makkamu ta dalanina, Afu, bakawa awemi haman amu ya lugarina nga eyam,” kunna.

“Iyak hapa la ya dalan nga angen muy, ikid na pakkamun muy ta kakurugan ikid na mangtolay tekamuy, te awan pulus ta makadulot te Damakewan am bakkan ta iyak ya angen na. 7 A am pake amu dak a amu muy mantu i Damakewan, a mamegafu ta ayanin a amu muy, te naita muy na,” kunna.

“Afu, pake ipaitam ya Damam tekami a matappag kamin,” kunna.

9 “Anu nabayagak na haman tekamuy, Felipe, a awem para la amu am inya yak. Ya nakaita teyak a naita na hapa i Damak. Annum mantu ibar ta ipaitak i Damak tekamuy? 10 Awem hud mangurug, Felipe, ta itta i Damakewan teyak, a intu hala ya pagtolayan ku? A maski ya ngamin inuhohug ku tekamuy a awek haman neuroray neuhohug, te i Damakewan ya itta teyak, a ya tarabakuk a tarabaku na hapa. 11 A mappya ta kurugan muy ya uhohug ken ta itta i Damakewan teyak ikid na intu hapa ya pagtolayan ku, ammi am mazigat ya mangurug ta uhohug ken tekamuy a ya tinarabakuk mina ya pangurugan muy.

12 “A pake ibar ku para tekamuy ta maski am inya tekamuy ya mangurug teyak a makkwa na hapa sangaw ya kuman na tinarabakuk. A maski dakdakal para ya makkwa na ammi ta iningwak, te eyak na sangaw ta agyan ni Damakewan, 13 petta maski am anu ya adangan muy tentu ta gafu teyak a iyak hala sangaw ya makkamu ta inadang muyen, petta maita hapa ya pakedayawan ni Damakewan gafu teyak. 14 A maski am itta hapa sangaw ya adangan muy teyak nga megitta teyak a iyak hala sangaw ya makkamu,” kunna.

15 “A am kurug ta iddukan dak a itug muy mantu ya pakkwak tekamuy, 16 a magadangak hapa sangaw te Damakewan petta idob na sangaw tekamuy ya takday Manguffun nga megitta teyak, petta magnayun hala sangaw tekamuy. 17 A intu sangaw Kauffunan muy ya Kahalwa na Namaratu nga mangipakamu ta kakurugan tekamuy. Ammi ya awan kiden mangurug teyak a aweda ikatalak ya mangipakamu ta kakurugan tekamuy, te aweda manonot, a awan ta pakkamu da tentu. Ammi itta ya pakkamu muy tentu, te mehebing tekamuy, ammi itta hala sangaw ta nonot muy.

18 “A maski magtugutak a awemuy pahig ta iwarad ta kanan, te mehulunak hala sangaw ta Kahalwa na Namaratu nga magyan tekamuy. 19 Awena mantu la mabayag addet ta awenan sangaw pakaita na tolay kiden teyak, ammi tekamuy a maita dak hala sangaw. A gafu ta matolayak a matolay kam hapa gafu teyak. 20 A am ittan sangaw ye-yen na araw a yen sangaw ya pake pakkamu muy ta magtatakday kami ni Damakewan, a kumanen hapa sangaw tekitam ngamin. 21 A ya mangitug ikid na mangidulot ta ngamin patarabakuk tekamuy a intu hala ya mangipasikkal ta pangidduk na teyak. A intu hapa ya pangipaitan mi ni Damakewan ta pangidduk mi tentu, a ukadan ku hapa ya nonot na petta pake amu nak,” kunna.

“Anu kawagan na, Afu, ta ikami la sangaw ya pangipakamum ta barim, ammi awem isipat ya ngamin tolay?” kunna.

“Maski am inya na tolay ya mangidduk teyak ikid na mangitug ta uhohug ku a yen ya iddukan ni Damakewan, a yen hapa ya emmi pakipagyanan. 24 Ammi ya awan mangidduk teyak a awena ikayat itug ya uhohug ku. Ammi bakkan haman ta uhohug ku ya madangag muy am awa uhohug ni Damakewan nga nangidob teyak.

25 “A ye-yen kid na uhohug ya isirak ku tekamuy ta awek para la pagtugut tekamuy. 26 Ammi ya Kahalwa na Namaratu ya Manguffun sangaw tekamuy, te intu sangaw ya pinakabarik nga doban ni Damakewan, a ituldu na kam sangaw ta ngamin magserbi tekamuy, te pagnonotan na kam ta ngamin inuhohug ku tekamuy,” kunna.

27 “A ta ayanin a isirak ku hapa tekamuy ya pagintak na nonot muy, ammi bakkan ta kuman na pagintak na awan kiden makkamu teyak, te mesipat kanan ta pagintak na nonot ku. Awemuy mantu pagpopoyungan ikid na pagtalawan ya nonot muy. 28 Nadangag muy paen ya uhohug ku tekamuy ta ‘Pagtugutān ta kanan, ammi pagtolin ta kam hala sangaw,’ kunku paen. A am kurug ta iddukan dak a awemuy mina magdamdam am awa makipagayayat kam mina teyak gafu ta makaange yak na te Damakewan, te pake atata-nang i Damakewan ammi teyak. 29 A nebar kun mantu yen tekamuy ta awena para la magdulot, petta sangaw am nabalin na a idulot muy la ya pangurug muy. 30 A awek na makapagbayag nga maguhohug tekamuy, te dumatang na ya mamaddayen ta ngamin dulay ta paglelehutin, petta pagzigātan nak. 31 A maski awan ta gatut ku tentu a ituluk ku hala ya barik tentu ta kuman na pakkwa ni Damakewan teyak, petta amu na ngamin tolay ta iddukan ku i Damak. Imikkat kanan mantu, te entanan,” kunna.