1 Wajcaw, ilu' inRyosil. Ntin te'ju' na incolwit wib.

Chin cole'u' bin ẍchik'ab yi e' incontr, yi na chitzan tan joyle'n puntil tan imbiyle'n cu'n.

2 Ta' chin cole'u', na ko tzun ne'l cu'n cya'n swutz.

Na ni'cu'n e' incontr tu balum.

Ko quil chin colu', puch'ij cunin chinsaj cya'n.

3 Wajcaw, ilu' inRyosil.

¿Na' nchinjuchune't, te cyakil yi e'chk takle'ne'j?

4 ¿Ja pe' quim jun wunak wa'n?

¿Ko ja tzun imban mal tetz jun wamiw yi nternin na ke'l na ko'c tuch'?

¿Ko ja tzun che' imbuch yi e' incontr?

5 Yi ko ya'tz, chibne' bin incontr cyajbil swe'j.

Chintx'amxoken bin cya'n.

Elk bin ink'ej cya'n.

Ej nin ba'n chincu' cya'n tbe'.

6 Wajcaw chin cole'u'.

Xcyeke'nu' scye'j incontr.

Che' cawse'u' tan yi teru' poreru'.

Poro xomok wi'u' swe'j.

Na alijt cyen tanu' yi ilu' jun balaj pujul xtisya', yi qui na je k'ab twi' jun.

7 Chu'l cyakil e'chk tnum.

Chu'l cyakil e'chk nación swutzu'.

Nin scawunku' squibaj.

8 Ta', yi ilu' yi na ocu' tan ma'le'n cyajtza'kl cyakil wunak, chin ma'laju' chi na banu' scye'j yi e' wunaka'tz.

Chin ma'laju' quib yi wutane'n, na chinch wetz qui'c wil.

9 Ta' chin tz'aknak cuninu', na ba'n na el xtxumu' te e'chk kajtza'kl.

Ba'n na el xtxumu' te yi e'chk katxumu'n yi na icy' tkac'u'l.

Make' binu' chiwutz yi e' juchul il.

Ma yi e' yi ba'n ate't che' ẍch'eyaju' tan chiquiwixe'n.

10 Yi wetz colol wetz i'tz yi Kataj Ryos, yi taw yi tcya'j tu yi wuxtx'otx'.

Yi wetz colol wetza'tz, na oc tan kacolche'n yi o' yi skoj cu'n te kalma'.

11 Kataj Ryos i' yi pujul xtisya', yi qui na je k'ab twi' jun, na ilen nin na tak' i' chicaws yi e' juchul il.

12 Ko quil chibansaj quib yi e' wunak tu Kataj Ryos, jepon wi' yi spar i' ta'n, tan biyo'n.

List atit cyakil yi e'chk ma'cl i' tan chibiyle'n cu'n.

13 Ncha'tz na tzan i' tan teche'n nin yi e'chk flech yi cy'a'n k'ak' ta'n.

List atit yi e'chk flech yi xconk ta'n.

Cyakil yi e'chk ma'cl i' tetz oyintzi' list atit.

14 Chixmayninu' yi e' juchul il.

Ja wi't chilo'on cyera'tz, na na chiẍch'in chi na ban jun ch'on wi' yi tx'anlij tlen tu'.

Nin yi tz'itz'ok scye'j, i'tz e'chk takle'n cachi', i'tz yi e'chk la'jil.

15 E' nkopon jun chin jul tan imbene'n klo' tul, poro e' te'n nchiben tzoypuj tul.

16 Cyakil yi e'chk takle'n cachi' yi na chitzan tan banle'n, ta'ste'n nin lbaje't ẍchiwi'.

17 Ma yi in wetz, swak'e' ink'ajsbil tetz Kataj yi wi'tz Ryos, na yi na oc tan pujle'n xtisya', qui na je' k'ab twi' jun.

Cha'stzun te swak'e' ink'ajsbil tetz i', na i' taw cyakil yi tcya'j tu yi wuxtx'otx'.