1 Ta', ko' cole'u'.

Na qui'ct jun yi cho'nk k'uklij c'u'l te'ju'.

Cya'l jun yi najk tek ẍchi'u' jalu'.

2 Na ntin la'jil na xcon cya'n squibil quib.

Qui na cyal yi mero bintzi squibil quib.

Chiwutz tu' chiplaj tu' yi na chijilon.

3 Kataj, che' sotz cunu' yi e' la'ja'tz.

Nin che' sotz cunu' yi e' yi na cyocsaj quib nim tu chijilon.

4 Na je chiyole'j:

“Yi ketz katzi', xcyek tan kacolche'n. Katx'aconk tan ketz kayol.

Cha'stzun te qui'c xac junt sketz,” che'ch yi e'a'tz.

5 Ma yi ketz Kataj, je yol i'e'j:

“Nocopon tan quich'eye'n yi e' tal prow, yi e' yi qui'c colol cyetz tane'n.

Nocopon il scye'j, na buchij che'.

Swak'e' ẍch'eybil cyetz, na cho'n at chich'iw swe'j,” stzun Ryos.

6 Yi yol Kataj, ya'stzun yi mero bintzi.

Nin i'tz mas balaj swutz yi balaj sakal, yi ocnak juk tir tk'ak' tan telse'n yi plojil.

7 Ta', ntin ilu' colol ketz te yi tiempe'j, nin sbne' opon tunintz.

Ilenin tz'ocoponu' tan kuch'eye'n ẍchik'ab yi e' mal naka'tz.

8 Na yi jun jilwutz wunaka'tz, ate' nintz skaxo'l.

Ncha'tz cyakil wunak, na chipek' tan banle'n yi e'chk takle'n cachi'.