1 Ilu' Kataj, wi'nin na tzatzin yi ketz kareyil, na ilu' mmak'on tzaj ẍchamil.

Wi'nin na tzatzin na ja tx'acon tan poreru'.

2 Cyakil yi mme'l talma' i' te'j, ja wi't tak'u' tetz.

Qui'c nin jun takle'n yi njak i' teru' yi qui'k ntak'u' tetz.

3 Ja tak'u' cyakil yi banl talma'u' tibaj.

Nin ja je tk'olu' jun coron twi' yi oro cu'n.

4 Ja jak' i' stz'ajbil teru', nin ja tak'u' tetz.

Ja tak'u' tetz i' tetz ben k'ej ben sak.

5 Ntyoẍ teru' tan xtxaxl talma'u' yi at tibaj.

Na ja jal wi'nin k'ej yi ketz kareyil.

Nin ja jal ẍchamil, na i' yi wi'tz ajcaw.

6 Ja tak'u' banlu' tibaj tetz ben k'ej ben sak.

Nin wi'nin na tzatzin i', na ilenin atu' te'j.

7 Poro yi ilu' teru', ilu' kareyil, cho'n k'uklij c'u'lu' te'j Kataj.

Quil tz'el majij yi ca'wl tk'abu', na cho'n k'uklij c'u'lu' te yi juna'tz yi taw yi tcya'j tu yi wuxtx'otx'.

8 Xtx'aconku' scye'j cyakil yi contru', na yi ilu' teru' ilu' yi wi'tz ajcaw.

Scawunku' scye'j cyakil yi e' yi na chi'ch chic'u'l te'ju'.

9 Ej nin yil tz'ul tzaju' tan pujle'n xtisya',

ẍchitz'e'ok cyakil yi e' contru', tan jun chin wutzile'n k'ak'.

Na yi jun k'ak'a'tz cho'n tz'ul kojol Kataj tcya'j, tan chitz'e'se'n tircu'n.

10 Ncha'tz cyakil yi chinitxa', yi ate' bene'n tzi'n wuxtx'otx', chisotzok.

Nin ncha'tz ẍchibne' chixonl, tircu'n chisotzok.

11 Pelo'k cho'c tan joyle'n puntil tan banle'n mal teru', nka tan xtxumle'n e'chk takle'n tan telse'n k'eju', quil chixcye'.

12 Yil xcon yi c'oxbilu' tan chibiyle'n, ẍcho'jkok swutzu'.

13 Wajcaw, skak'e' kak'ajsbil teru', na wi'nin poreru'.

Skabitzink swutzu', na ja kil yi ẍchamilu'.