1 Wajcaw, oku' tan contri'n scye'j yi e' incontr.

Chibiye' quibu' scyuch' yi e' yi na cyaj cho'c tan imbiyle'n.

2 Tcy'aj tzaju' yi ma'clu' yi makbil flech.

Nin ulku' tan wuch'eye'n.

3 Xconken yi teru' lansu' tan chibiyle'n e' incontra'tz.

Tale'u' swetz, yi atu' tan incolche'n.

4 Lok tz'el chitx'ix yi e' yi na cyaj cho'c tan imbiyle'n.

Lok xit yi cyajtza'kl yi e'a'tz, yi na cyaj yil chiban yi e'chk takle'n cachi' swe'j.

5 Cho'nk chiban chi na ban tz'is yi na ben tan cyek'ek'.

Nink tz'oc yi ángelu' tan chilaje'n len swe'j.

6 Ej nin cho'nk chixon tc'u'l be' yi chin tz'o'tz nin, yi chin cyak'puch nin.

Nink xomnin yi teru' ángelu' tan chitz'amle'n.

7 Na qui'c nin xe' cyajtza'kl yi na chitzan tan xtxumle'n swe'j.

Poro ja cho'c tan nuc'le'n e'chk jul tan imbene'n klo' tul.

8 Nink tz'ul sotzaj c'u'lal ẍchiwutz.

E' te'nk chicu' tc'u'l e'chk trampa'tz yi ja wi't bnix cya'n swe'j.

E' te'nk chiben tc'u'l.

9 Chin tzatzink tzuntz te'ju' Ta', na ẍchinclaxok tanu'.

10 Nin tetz cu'n walma' swale':

“Wajcaw, ¿na' scyetz junt yi ni'cu'n tu ilu'?

Na atu' tan kuch'eye'n yi o' tal me'ba' yi at tajwe'n sketz.

Nin na ocu' tan kuch'eye'n ẍchik'ab yi e' yi na cyaj cho'c tan majle'n yi e'chk takle'n yi at skuch'.”

11 At e' stiw yi junt len cyajtza'kl, yi na baj cyalol e'chk takle'n yi qui'c wetz na wil.

12 Ja imban wetz pawor scyetz.

Poro yi e' cyetz, chin juntlen nin cyajtza'kl yi na chitzan tan banle'n swe'j.

Wi'nin na chimbisun tan yi jun ajtza'kla'tz.

13 Yi na chiyabtij cyetz, wi'nin na chimbisun scye'j.

Nin na oc yi be'chok swe'j yi na ẍchaj yi na chimbisun.

Na inmuc' we'j, nin na innach Kataj squibaj.

14 Yi na ul jun sotzaj c'u'lal ẍchiwutz, wi'nin na chimbisun scye'j.

Nin na chimbisun scye'j, chi na bisun jun yaj yi na quim xtxu', nka chi yi na quim jun tamiw nka jun titz'un.

15 Poro yi tule'n yi sotzaj c'u'lal tzinwutz wetz, tze'e'n tu' e' ban swe'j, chi ink awer nak ẍchiwutz.

Quinin na chitane' tan injisle'n.

16 Ja cho'c tan inxuxe'n, nin ja chitze'en swe'j, na na chi'ch chic'u'l swe'j.

Nin yi na chixmayin tzaj swetz, tech cu'n tib yi na chi'ch chic'u'l swe'j.

17 Ma jalu' Wajcaw, ¿tona' tz'ocu' tan chicawse'n?

Chin cole'u' ẍchik'ab e' incontra'tz, yi icu'n cyuch' balum, yi na chinarcan tan we'j.

18 Swak'e' tzun ink'ajsbil teru' ẍchiwutz jun c'oloj wunak.

Swak'e' k'eju' ẍchiwutz cyakil yi tanumu'.

19 Qui'k chitzatzin e' incontr swe'j, qui'tk chiban chiwutz swetz.

20 Yi e' cyetz qui na chitzan tan joyle'n tzatzin paz.

Ntin na chitzan tan joyle'n puntil tan chisuble'n yi e' wunak, yi qui'c na chiban.

21 Na chic'abe'n chitzi' tan inyolche'n.

Itzun na cyaltz: “Ilwok nin nocxe'j. Mbi nin tal tane'nx,” che'ch na ban.

22 Poro cho'n at swutzu' Ta'.

Na tbitu' yi mbi na cyal.

Quil sjatxlen tibu' swe'j.

23 Wajcaw, elk bin k'ajabu' swe'j, na ilu' inRyosil.

Chin ẍch'eyaju'.

Oku' tan banle'n tane'n, nin xomok wi'u' swe'j.

24 Chin ma'laju' Ta'.

Xomok cyentu' te ca'wlu', bantz qui chitze'ene'n yi e' incontr swe'j.

25 Qui'k chitxum nin qui'k cyal yi e'a'tz swetz:

“Ya'stzun na kajtze'j. Ja el cu'nx ka'n swutz.”

26 Nink tz'el cyetz chitx'ix tanu', yi e' yi na chitze'en swe'j.

Nink tz'el chitx'ix junawes, yi e'a'tz yi na cyocsaj quib balaj tzinwutz wetz.

27 Poro yi e' wamiw yi xomij chiwi' swe'j, ba'n chitzatzin nin ba'n chiẍch'in tan yi tzatzi'n yi at tetz cyalma', yi na quil yi ja wi't chintx'acon.

Na ilenin na cyal cyetz:

“At wi'nin k'ej Kataj. Nin wi'nin na tzatzin i', tan tu' yi ba'n atit yi tetz ẍchakum.”

28 Nin ko ya'tz tuleju', swale' yi chin tz'aknak cunin ilu'.

Nin cyakil k'ej swak'e' ink'ajsbil teru'.