1 Ma jalu' kaRyosil, ja kubit yi mbi cu'n banaku' tenẍchan.

Ja kubit scyetz yi e' kamam kate', yi mbi banaku' te yi ate' tzaj cyetz.

2 Na ilu' mmak'on chicaws yi e' mal nak.

Nin ilu' e' lajun len swutz yi cyetz chiluwar, nin ja tak'u' scyetz yi e' kamam kate'.

3 Na ilu' ak'on ama'l scyetz kamam kate' tan cyetzal yi e'chk ama'la'tz.

Na yi e' cyetz, quinin klo' e' xcye' cyetz tan cyetz chispar cun tu'.

Ma na tan yi teru' poreru', nin tan yi ẍchamilu' nchixcyewe't.

Na ja xomu' scye'j tul yi oyintzi' tan tu' yi mpek'u' scye'j.

4 Ilu' kaReyil, ilu' kaRyosil, na el katxum tetz yi ilu' mmak'on ama'l scyetz kamam kate' tan chixcyewe'n te chicontr.

5 Ncha'tz mbanu' ske'j ketz, na tan ilu' nkaxcyewe't scye'j yi e' ketz kacontr.

Nin tan tu' yi xomiju' ske'j, junawes nche'l cu'n yi e' kacontr ka'n swutz.

6 Cha'stzun te, yi in wetz, qui na k'uke' inc'u'l te yi e'chk inma'cl, chi tane'n yi c'oxbil inflech nka chi tane'n weri inspar.

7 Na ilu' nkacolon ẍchik'ab yi e' kacontr.

Ej nin tan ilu' ja el chitx'ix yi e' kacontra'tz ka'n.

8 Cha'stzun te, ilenin skak'e' k'eju'.

Nin skak'e' kak'ajsbil swutzu' sbne' opon tunintz.

9 Poro lastum, ja ke'l te c'u'lu' Ta', na ja tak'u' ama'l tan tele'n katx'ix.

Nin qui't na xomu' ske'j yi na ke'l tan oyintzi'.

10 Ja tak'u' ama'l scyetz kacontr tan chixcyewe'n ske'j, na ja ke'l ojk ẍchiwutz.

Nin ja ben chicy'al cyakil yi e'chk kame'bi'l.

11 Ja tak'u' ama'l scyetz kacontr tan kabiyle'n, chi na ban jun tal cneru' yi na ben tk'ab biyol tetz.

Nin ja tak'u' ama'l tan kele'n xit bene'n tzi'n ẍchixo'l yi e' awer nak.

12 Ja ko' ben c'ayilu'.

Chin warat nin nkabene't c'ayilu'.

Qui'c nin mu'ẍ tal kaxac, na qui'c nxtxicbaj teru', yi mben c'ayilu' o'.

13 Ja ko'c tetz chiyolbe'tz cyakil wunak.

Nin ncha'tz yi e' kawisin ja chitze'en ske'j.

14 Na ja tak'u' ama'l scyetz yi e' awer nak tan cyoque'n tan kayolche'n.

Ej nin yi na cho'c tan kayolche'n, na chitze'en ske'j.

15 Qui'c nin jun tkuj yi qui'k na katx'ixwij.

Chin tx'ixwil nin kawutz.

16 Poro i'tz tan chipaj yi e' kacontra'tz, yi na chitzan tan kabuchle'n nin tan kayolche'n.

17 Ya'stzun kutane'n ẍchik'ab.

Poro nk'e'tz tan paj yi jajk elu' te kac'u'l, nka jajk kapaj ca'wlu'.

18 Na qui'c na katxum tan cyaje'n cyen kilolu'.

Nin qui'c na katxum tan kapajol yi ca'wlu'.

19 Poro yi ilu' teru' ja tak'u' ama'l tan kele'n cu'n swutz.

Ja tak'u' ama'l tan toque'n kaluwar tetz jun ama'l yi tz'inunin tu', kale wutz quent yi quimichil ske'j.

20 Ma jalu' Ta', yi nink me'lu' te kac'u'l

nin yi nink nkajoy junt ketz kaRyosil yi apart, ja klo' tilu'.

21 Ja klo' tilu', na yi ilu' teru', na tilu' cyakil yi mbi na icy' tkac'u'l.

22 Poro cyakil yi e'chk takle'na'tz yi ja ul skawutz, i'tz tan paj yi xomcho' te'ju'.

Cyakil nin k'ej wi'nin kaquime'n.

Cho'n cu'n na ku'lij chi na ban jun tal cneru' yi na ben tk'ab biyol tetz.

23 Ma jalu' Ta', qui't tak'u' mas ama'l te yi e'chk takle'na'tz, ma na elk k'ajabu' ske'j.

Quil ke'l te c'u'lu' tetz ben k'ej ben sak.

24 Quil ko' til cyenu'. Quil tew tibu' skawutz.

Quil ko' til cyenu' kachuc, na chin q'uixc'uj nin ato't.

25 Junawes ja ke'l cu'n swutz, na ja wi't ko'c jak' chica'wl yi e' kacontr.

Nin qui'c nin mu'ẍ kaxac tane'n ẍchiwutz.

26 Sajk binu' tan kuch'eye'n.

Ko' cole'u' tan yi banl talma'u'.