1 Ilu' inRyosil tbite'u' yi na chinxochon teru'.

Chin cole'u' ẍchik'ab yi e' incontr.

2 Chin tew cunu' ẍchik'ab yi e' mal nak, yi ja oc chitxumu'n tan imbiyle'n.

Chin cole'u' ẍchik'ab yi e' mal naka'tz, yi na cyaj cho'c tan inxite'n.

3 Na cyakil yi e'chk yol yi na eltzaj le chitzi', chin xo'wbil nin.

Ni'cu'n tu jun flech yi cy'a'n wenen ta'n.

4 Nin yi e' wunaka'tz, ewun cu'n na cho'c tan kaxite'n yi o' yi qui'c quil.

Qui na el chik'ajab ske'j, na ewun cu'n na chijoy puntil tan kapo'tze'n.

5 Na chinimsaj quib tan banle'n mal tetz junt.

Na bnix e'chk tramp cya'n tan chicwe'n yi tal prow tul.

Nin na cyaltz yi cya'l na tzan tan chixmaye'n, nin yi cya'l tz'ak'on chicaws te'j.

6 Poro na el te chic'u'l yi at jun yi na tzan tan chixmaye'n, nin tan tbite'n yi mbi i ila'tz yi na chitzan tan banle'n.

Na qui'c jun e'chk takle'n yi na icy' le chic'u'l, yi qui'k na til Ryos.

7 Cha'stzun te, Ryos tz'ak'onk chicaws yi e'a'tz, nin quinin tz'icy' scyetz yil chilo'on ta'n.

8 Ej nin e' te'n chibaj tc'u'l yi chiyol.

Nin cyakil wunak ẍchitze'enk scye'j.

9 Kalena's tzun cho'c cyakil wunak tan tak'le'n k'ej Ryos. Ej nin ẍchitxole' yi mbi cu'n mban i', na tz'elepon chitxum tetz yi ẍchamil i'.

10 Poro cyakil yi o' ketz yi skoj cu'n te kalma', yi o' yi jicyuch te kajtza'kl, skatzatzink, na na kajak ẍch'eybil ketz tetz Ryos.