1 Cyakil e'u' yi ate'u' bene'n tzi'n wi munt, cyak'e'u' chik'ajsbilu' tetz kaRyosil.

Tetz cu'n cyalma'u' yil cyak'u'.

2 Chibitziju' balaj bitz swutz i'.

Cyak'e'u' chik'ajsbilu' tetz.

3 Cyale'u' tetz Kataj yi xtxolbile'j:

“Ta', cyakil yi na bnix tanu', chumbalaj nin.

Cyakil yi e' contru' na chisaj colpuj tan yi poreru'.

4 Cyakil wunak bene'n tzi'n wi munt scyak'e' k'eju'.

Nin chocopon tan c'u'laje'n yi bi'u', na scyak'e' chik'ajsbil teru'.”

5 Ma jalu' quibit tzaju' yi e'chk takle'n balaj yi mbnix tan Ryos skaxo'l yi o' wunak.

6 Na ja cu' jatxol yi mar yi quicy'e'n tzaj yi e' kamam kate' tc'u'l.

Ncha'tz tulejnak yi tzanla' yi na bi'aj Jordán.

Ej nin skejenle'n quicy'e'n tzaj yi kamam kate'.

Cha'stzun te kak'e' k'ej Kataj.

7 Kak'e' k'ej Kataj na na cawun bene'n tzi'n, nin scawunk sbne' opon tunintz.

Nin na til yi na cho'c yi e' mal nak tan xtxumle'n contri'n te i', poro qui na tak' i' ama'l scyetz.

8 Cyakil e'u' wunak yi ate'u' bene'n tzi'n, cyak'e'u' chik'ajsbilu' tetz.

Chin chiwi' ninu' ẍchibne'u' tan bitz swutz i'.

9 Na tan i' itz' o' jalu', na quinin tak' i' ama'l sketz tan kalo'one'n.

10 Ma jalu' Ta', ilenin na ocu' tan kapile'n chi na bajij te jun piẍ sakal yi na oc pile'n tk'ak'.

11 Ja tak'u' ama'l tan kacwe'n le tramp.

Nin ja tak'u' ama'l tan je'n jun kektz tane'n, yi chin al nin.

12 Ej nin ja tak'u' ama'l tan chixone'n wunak squibaj.

Ja tak'u' ama'l tan koque'n jak' chica'wl yi e' kacontr.

Tan yi xtxolbila'tze'j, ni'cu'n chi yi jajk ko'c tk'ak' nin jajk kacu' xe' a' tanu'.

Poro tyoẍtu' teru' yi itz' o' jalu', na ilenin na el k'ajabu' ske'j.

13 Ma jalu' nchimben le templo, nin tzimpate' intx'ixwatz teru'.

Ya'stzun swulej, tan wele'n cu'n te yi inyol yi insuknak teru'.

14 Na insuknak inyol teru' te yi atin tul sotzaj c'u'lal.

15 Tzimpate' intx'ixwatz swutzu'.

Swak'e' balaj tor tu e'chk balaj chiw teru'.

Ncha'tz swak'e' e'chk cneru'.

Swak'e' tircu'n teru' tan tak'le'n k'eju'.

16 I bin jalu', cyakil e'u' yi na cyeku' ẍchi' Ryos, quibitzaju' cobox inyol, na swale' scyeru' yi mbi mban Ryos swe'j wetz.

17 Ja cu' inwutz tetz, nin ja tbit i' intzi' inkul.

Cha'stzun te wak'ol ink'ajsbil tetz i'.

18 Yi atk e'chk yab ajtza'kl le intxumu'n, qui tzun klo' ntbit i' yi intzi' inkul.

19 Poro ja tbit i' cyakil yi minjak tetz tul inoración.

20 Ntyoẍ bin tetz Kataj Ryos yi ja tbit yi intzi' inkul, na quinin cabej c'u'l yi ntak' yi banl talma' swibaj.