1 Wajcaw, yi ilu' inRyosil, chin colpe'l tzaju' na txant tan imbek'xe'n.

2 Na txant tan imbene'n mulk'uj xe jun a'.

Txant tan imbene'n mulk'uj tul snep. Cya'l na cwe't wukan.

Ja wi't chincopon jalen xe' a' cu'n.

Ja wi't chimben tan tojkbil a'.

3 Elk bin k'ajabu' swe'j Wajcaw, na nternin so'yt inkul tan sich', tan jakle'n ẍch'eybil wetz teru'.

Nin ja k'e'xij inwutz tan xmaye'n ko at tulbilu' tan incolpe'n.

4 Na wi'nin chijale'n yi e' yi na chi'ch chic'u'l swe'j.

Mas tcu'n cyajlal swutz yi xi'il inwi'.

Tunin na chi'ch tu' chic'u'l swe'j. Wech na qui'c wetz wil.

Ncha'tz na chitzan tan jakle'n xel yi e'chk takle'n yi qui nwalk'aj.

5 Ilu' inRyosil, sak swutzu' yi qui'c nin mu'ẍ skojal walma',

na qui'c rmeril tan wewal yi wil swutzu'.

6 Wajcaw, ilu' inRyosil yi jun yi cya'l na xcye' quen te'j.

Qui'k tz'el chitx'ix yi e' yi k'uklij chic'u'l te'ju' tan impaj.

Ilu' kaRyosil, yi o' xonl Israel, qui'k cabej chic'u'l yi e' yi nternin na el cyalma' tan joyle'nu', tan wetz impaj.

7 Tan paj yi xomchin te'ju' Ta', na icy'pon wi'nin jisbil wetz wa'n.

Ej nin na el intx'ix tan paj.

8 Na ni'cu'n in tu jun awer nak ẍchixo'l yi e' witz'un.* Job 19:13; Jn 1:11; 7:5.

9 Ej nin na je' tzinwutz, yi qui na cyak' wunak k'ej yi ca'lu'.

Ncha'tz yi na oc jisle'nu', cho'n na baj tinwi'.

10 Na yi na no'c tan muc'le'n we'j, nin tan o'kl, tan tak'le'n k'eju', na cho'c tan xbajtzi'i'n swe'j.

11 Ej nin tircu'n na chitze'en swe'j, yi na oc e'chk be'chok swe'j yi na ẍchaj yi na chimbisun tan wil.

12 Tircu'n e', na chitzan tan inyolche'n.

Nicy't nin e' kbarel na cho'c tan xbajtzi'i'n swe'j.

13 Cho'n na cu' inwutz teru' Ta'. Chin ẍch'eyaju'.

Chin ẍch'eyaju' tan yi banl talma'u'.

Chin colpe'u', na ilenin na el k'ajabu' swe'j.

14 Quil tak'u' ama'l tan imbene'n tul il.

Chin cole'u' ẍchik'ab yi e' yi na chi'ch chic'u'l swe'j.

Nin quil tak'u' ama'l tan imbene'n mulk'uj xe a' tane'n.

15 Quil tak'u' ama'l tan wele'n wi a' tane'n.

Quil tak'u' ama'l tan imbene'n tan yi tojkbil tzanla'.

16 Wajcaw, elk k'ajabu' swe'j, na na cu' inwutz teru'.

Nin na el intxum tetz, yi wi'nin banl talma'u', nin yi na pek'u' swe'j.

Sajk binu' tan wuch'eye'n, tan tu' yi banl talma'u'.

17 Qui bin stew tibu' tzinwutz, na na chimbisun, na atin tul sotzaj c'u'lal.

Cha'stzun te elk k'ajabu' swe'j.

18 Sajk binu' tan wuch'eye'n.

Chin cole'u' ẍchik'ab yi e' incontr.

19 Sak swutzu' yi mbi na chiban swe'j.

Sak swutzu' yi ja el ink'ej cya'n.

Nin na el xtxumu' tetz yi na' scyetz e' incontra'tz.

20 Ej nin tan yi e'chk takle'na'tz, yi na bajij swe'j, na bisun walma', nin qui'ct inwalor at tan paj.

Tech tunin na chintzan tan joyle'n ẍch'eybil wetz, poro cya'l na pek' tan wuch'eye'n.

21 Ja cu' wenen cyak'un te yi inwa'.

Nin yi inquime'n tan sak tzi' ja cyak' vinagre swetz.† Mt 27:34, 48; Mc 15:23, 36; Lc 23:36; Jn 19:28-29.

22 Ma jalu' Ta', cyakil yi e'chk balaj wa'a'n yi na chitzan cyetz tan xtxumle'n, nink xcon tan chicu'se'n.

Nink xcon tetz jun tramp ẍchiwutz.

23 Nink cho'c moyi'ẍ tanu'.

Ej nin tunink lucnecu'n quikan.

24 Ticy'se'u' c'u'lu' scye'j yi incontra'tz. Tak'e' chicaws.

25 Elk cu'n chinajbil swutz.

Cya'lk naje' tul. Chin tz'inunin tu' tuleju'.

26 Na na chitzan tan chibiyle'n yi e' yi na chibisun.

Ej nin na chitze'en scye'j.

27 Tak'u' chicaws, na chin juchul il nin e'.

Qui'k tz'el k'ajabu' scye'j.

28 Tzajscunu' chibi' tul planiy kale tz'ibane't chibi' yi e' yi ẍchicambok te yi itz'ajbil.

Quil cu' chibi' tanu' kale atite't chibi' yi e' balaj.

29 Poro elk bin k'ajabu' swe'j wetz Ta'.

Na na sotz inc'u'l, nin na chimbisun.

Cha'stzun te chin ẍch'eyaju' nin chin cole'u'.

30 Swak'e' ink'ajsbil teru', ilu' inRyosil.

Swak'e' ink'ajsbil tetz cu'n walma'.

31 Na mas na tzatzinu' yi na kak' k'ajsbil teru', swutz yi na kapat jun chin mam tor tetz katx'ixwatz.

Nka yi na kapat jun ne'ẍ wacẍ tuml yi tuc' tu yi e'chk pac'.

32 Ej nin yil quil cyakil yi e' tal prow yi na chibisun, yi na tzatzinu' te yi ink'ajsbil yi na chintzan tan tak'le'n teru', squiwixk chic'u'l tan chixome'n mas te'ju'.

33 Na tz'elepon chitxum tetz, yi na tbitu' chitzi' chikul yi e' tal prow me'ba' yi na chibisun, nin yi at ninu'-tz tan quich'eye'n yi e' teru', yi ate' pres.

34 Cyak'e'u' bin chik'ajsbilu' tetz Kataj, cyakil yi e'u' yi ate'u' wuxtx'otx'.

Nin cyakil yi e'u' yi ate'u' tcya'j, tuml yi e'u' yi ate'u' xe mar, tajwe'n tan cyak'olu' len chik'eju' tetz kaRyosil.

35 Na tz'ocopon Ryos tan colche'n yi ama'l Sión, nin jepon xtxicbal i' junt tir yi e'chk tnum cwent Judá.

36 Nin cyakil chixonl yi e' ẍchakumu' scyetzaje' yi ama'la'tz.

Cyetz sbne', nin cho'n ẍchinajank tul.

Na yi e' yi chocopon tan tak'le'n k'ej i', ya'stzun yi e' yil chinajank tul.