1 Wajcaw, ntin te'ju' na incolwit wib.

Cha'stzun te bne'u' pawor, quil chin tilcyenu'.

2 Chin cole'u', na na waj ne'l liwr ẍchik'ab incontr.

Chin cole'u', na yi ilu' teru' chin tz'aknak cu'n ilu'.

Tbite'u' yi intzi' inkul, na na cu' inwutz teru' tan toque'nu' tan incolche'n.

3 Oku' tetz colol wetz chi na ban jun ama'l kale na chicolwit quib yi e' wunak ẍchik'ab chicontr.

Oku' tetz jun ama'l kale tzincolwit wib wetz.

4 Ilu' inRyosil, chin cole'u' ẍchik'ab yi e' mal nak.

Chin cole'u' ẍchik'ab yi e' biyol nak, yi e' yi jalcu'n na cho'c tan kabiyle'n.

5 Chin cole'u' Ta', ilu' Wajcaw. Na jetz yi inxiquil tzaj, cho'n k'uklij inc'u'l te'ju' yi tz'ocoponu' tan wuch'eye'n.

Nin ya'tz nin ntuleju'-tz.

6 Wajcaw, te yi ntaxk nitz'ij, te yi atin twankil intxu', sken ocu' tan wuch'eye'n.

Na ntin tan yi teru' poreru' ja nitz'ij.

Swak'e' tzun ink'ajsbil teru'.

7 Yi nchintx'acon, ja che'l yab wunak swe'j.

Poro i'tz tan tu' yi mmo'cu' tan wuch'eye'n.

8 Cha'stzun te cyakil nin k'ej, na chintzan tan tak'le'n ink'ajsbil teru', nin na chintzan tan tak'le'n k'eju'.

9 Qui'k chin tilcyenu' yil tijin inc'u'l.

Qui'k tz'el ink'ej.

Qui'k chin tak' cyenu' inchuc, yil baj inwalor.

10 Na cyakil yi e' incontr, nternin na chitzan tan joyle'n puntil tan imbiyle'n cu'n.

Nin junit mban chitxumu'n tan imbiyle'n cu'n.

Je chiyole'j:

11 “Or, kajoye' puntil tan stz'amle'n cu'n.

Nin yil tx'amxij ka'n, ba'n kabiy cu'n, na qui'ct Ryos at tan colche'n i',” che'ch.

12 Ilu' inRyosil, qui bin chin tilcyenu'.

Sajku' lajke'l tan wuch'eye'n. Chin cole'u'.

13 Ma yi e' incontra'tz, lok tz'el cyetz chitx'ix, lok che'l cu'n tanu' swutz.

Bne'u' pawor, che' xit cunu'.

Na yi cyetz cyajbil, i'tz yil chinquim cya'n.

14 Poro yi in wetz, quil chinquim.

Nin ilenin k'uklij inc'u'l yi tz'ocoponu' tan incolche'n.

Cha'stzun te ilenin swak'e' ink'ajsbil teru'.

15 Cyakil nin k'ej, swale' yi ja ocu' tan incolche'n ẍchik'ab yi e' incontr.

Swale' yi balajilu'.

Qui na pujx wa'n yi mbi tzuntz yi ja chinclax tanu'.

Poro ilenin swak'e' ink'ajsbil teru'.

16 Ncha'tz tzintxole' cyakil yi e'chk takle'n balaj yi na banu'.

Swale' cyakil yi xtxolbila'tz, na ntin ilu' teru', chin tz'aknak cu'n ilu'.

17 Ilu' inRyosil, jetz yi injuyil tzaj, ja ẍchaju' yi balaj ajtza'kl swetz.

Nin quinin chink'e'xij tan talche'n yi mbi mbanu' swe'j.

18 Qui bin chin tilcyenu'.

Ja nin chimbi'ẍin, nin ja nin sakin xi'il inwi', poro qui nin nchin tilcyenu'.

Tajwe'n bin tan intxolil yi balajilu' tu yi poreru', scyetz cyakil yi wunake'j, scyuch' yi e' yi txe'n chitz'ij.

19 Na yi balajilu', chumam nin, na na jepon cu'n jalen tcya'j.

Qui'c junt yi cho'nk chi ilu' teru' Ta'.

Na wi'nin e'chk takle'n balaj na bnix tanu'.

20 Ilenin ja ul sotzaj c'u'lal tzinwutz.

Ja tak'u' ama'l tan imbisune'n.

Poro tyoẍtu' teru', itz'ine't jalu'.

Ej nin mpe nink chinquim, nitz'ok junt tir tanu'.

21 Poro jalu', ja jal junt tir ink'ej tanu', na ja ocu' tan inmayse'n tk'ab sotzaj c'u'lal.

22 Cha'stzun te ilenin swak'e' ink'ajsbil teru'.

Swak'e' k'eju'. Chimbitzink tu inarpa tu insalterio, na ilu' kaRyosil yi o' xonl Israel.

23 Chintzatzink, yil wak' ink'ajsbil teru'.

Tetz cu'n walma' yil wak', na ja chinclax tanu'.

24 Ej nin cyakil tkuj swale', yi chumbalaj ninu', nin yi chin tz'aknak cuninu', na yi e', yi ja cho'c tan joyle'n puntil tan inquime'n, e' te'n me'l chitx'ix.

Na e' te'n nchibaj tul yi cyajtza'kl yi nchitxum swe'j.