80
Yi cyoque'n yi e' xonl Israel tan cu'swutzil tan cyoque'n junt tir chi chisajle'n
1 Wajcaw, yi ilu' pstor ketz yi o' xonl Israel, tbitzaju' yi cobox inyole'j:
Yi ilu' teru', ni'cu'n ilu' tu jun pstor cne'r, yi na tzan tan kapstore'n yi o' xonl Ẍep.
Nin cho'n c'olchiju' ẍchixo'l yi e' querubim* Yi e' “querub”, nka “querubim” le hebrey, yi “-im” le hebrey na ẍchaj “plural”. Ni'cu'n mu'ẍ e' scyuch' yi e' ángel, poro at len chixicy'. Poro apart chimunl. E' q'uicy'lom te e'chk takle'n cwent Ryos. Gn 3:24; Ex 25:22; Is 37:16. tan cawu'n.
2 Je wajbile'j Ta':
Tak'e'u' banlu' skibaj yi o' xonl Efraín, scyuch' yi e' xonl Benjamín tu Manasés.
Elk k'ajabu' ske'j. Sajku' tan kacolpe'n tan yi teru' poreru'.
3 Ilu' kaRyosil, lok tak'u' ama'l tan koque'n junt tir chi kasajle'n.
Elk k'ajabu' ske'j, bantz kele'n liwr.
4 Kataj, cya'l na xcye' quen te'ju'.
¿Tona' tz'el ẍchi'chbe'n c'u'lu' ske'j?
¿Tona' ltzatzinu' te yi ka'oracion? na o' tanumu'.
5 Jatix nin lo' bis o'kl tak'u' sketz.
Bis o'kl cuntunin na baj jun waj ka'n.
6 Ja ko'c tetz chiyolbe'tz yi e' kawisin.
Ja ko'c tetz chitze'lbe'tz yi e' kacontr.
7 Ilu' kaRyosil. Cya'l na xcye' quen te'ju', na wi'nin ẍchamilu'.
Lok tak'u' ama'l tan koque'n junt tir chi kasajle'n.
Elk k'ajabu' ske'j, bantz kele'n liwr.
8 Tan yi poreru', e' eltzaj tcy'alu' yi e' kamam kate' le ama'l Egipto.
Ja che'l tzaj tcy'alu', chi na saj buk'ij jun wi' uva tan tawle'n le junt ama'l.
Nin yi cyule'n Canaán, ja che'l lajulu' cyakil yi e' awer nak, nin ja tak'u' yi chi'ama'l scyetz kamam kate'a'tz tan chinajewe'n swutz.
9 Ja chicu' tawalu' chi jun wi' uva.
Ja ocu' tan banle'n ba'n te e'chk ama'la'tz nin ja chicu' tawalu'.
Ja chinaje' swutz, nin ja puc'un chiwutz.
Cho'n cunin nchiban yi puc'un chiwutz chi na ban jun wi' uva yi na ben lo'on.
10 Yi jun wi' uvaja'tz ja ch'uy, nin ja icy' cu'n swutz cyakil jilwutz tze'.
Nin tan yi e'chk k'ab, ja xcye' tan jople'n cyakil e'chk tze'.
11 Nin ja opon cu'n yi e'chk k'ab jalen tzi mar.
Nin ja opon yi e'chk xlumil jalen tzi tzanla' yi na bi'aj Eufrates.
12 Ta' ¿mbi xac ntak'u' ama'l tan cwe'n xit yi pe'm?
Na ja cho'c pok' yi e' wunak yi na chixon tbe' tan talk'e'n yi wutz yi jun wi' uvaja'tz.
13 Ncha'tz yi smaron txuc, chi tane'n stze'laj boch, na chitzan tan bajse'n yi jun wi' uvaja'tz.
14 Ilu' kaRyosil yi cya'l na xcye' quen te'ju', nin yi atu' tzi'n tcya'j, elk tzaj to'kl c'u'lu' te yi jun wi' uvaja'tz yi tzan tele'n cu'n swutz.
15 Na ilu' bin awal tetz.
Nin ja tak'u' ama'l tan ẍch'uye'n yi xlumil.
16 Cha'stzun te, che'lk cu'n tanu' swutz, cyakil yi e' yi na chitzan tan tamle'n nin tan stz'e'se'n yi jun wi' uvaja'tz.
17 Poro ẍch'eyaju' yi jun yi je'nak xtxa'olu', yi jun yi ja xlumin tanu', nin yi ilu' mbixban.
18 Qui't kajatxlen kib te'ju', ma na tak' tzaju' kabanl.
Na ntin cu'n teru' na kajak wit ẍch'eybil ketz.
19 Ilu' Kataj, ilu' kaRyosil yi cya'l na xcye' quen te'ju'.
Lok tak'u' ama'l tan koque'n junt tir chi kasajle'n.
Elk k'ajabu' ske'j, bantz kele'n liwr.
*80:1 Yi e' “querub”, nka “querubim” le hebrey, yi “-im” le hebrey na ẍchaj “plural”. Ni'cu'n mu'ẍ e' scyuch' yi e' ángel, poro at len chixicy'. Poro apart chimunl. E' q'uicy'lom te e'chk takle'n cwent Ryos. Gn 3:24; Ex 25:22; Is 37:16.