1 Wajcaw, ilu' inRyosil, ilu' colol wetz. Sk'ejl nin lak'bal na injak ẍch'eybil wetz teru'.

2 Elk k'ajabu' swe'j. Tbite'u' intzi' inkul.

3 Na wi'nin e'chk bis o'kl ja ul tzinwutz. Nin txant tan inquime'n tan paj.

4 At na bant cu'n na intxum yi ja wi't chinquim, na qui'ct inwalor at.

5 Ja wi't no'c cyajlal yi e' alma'. Ni'cu'n wutane'n chi na lo'on jun sanlar tul oyintzi'. Ni'cu'n wutane'n chi jun yi qui't xomiju' tan q'uicy'le'n.

6 Wajcaw, ja wi't chinlo'on.

Ja wi't chincu' tul jun chin wutzile'n jul tane'n, jun jul yi chin xe' nin, nin yi chin tz'o'tz nin tul.

7 Ja saj colp wi'u' swe'j.

Na ja tak'u' jun incaws yi chin xo'wbil nin.

8 Ncha'tz cyakil yi e' wamiw, ja chin cyaj cyen quilol, na qui't na chitx'aj yi atin ẍchixo'l.

Ni'cu'n wutane'n chi tane'n jun pres yi qui'c rmeril tan tele'n liwr.

9 Nin tan paj yi o'kl yi na imban, or no'c cyen moyi'ẍ.

Wajcaw, cyakil k'ej na injak ẍch'eybil wetz teru', nin na je' ink'ab swutzu' tan jakle'n ẍch'eybil wetz.

10 ¿Mbi'tz tajbilu' swe'j Ta'?

¿Jalen pe' lchinquim, kalena'tz tzun tz'ocu' tan wuch'eye'n?

¿Tyoẍink ptzun jun alma' teru'?

11 ¿Tz'ocopon ptzun jun alma' tan talche'n:

“Chumbalaj nin Kataj Ryos, chin aj bintzi nin i'?”

¿Sjilonk ptzun jun alma' yi mukxnak jak' tx'otx'?

Qui', Ta'.

12 Na yi na quim jun, qui'ct xac. Junawes na tzaj.

Qui'c rmeril tan tule'nu' tx'akx tc'u'l jun alma'.

13 Poro yi in wetz, cho'n na cu' inwutz teru'.

Cyakil jalchan na no'c tan jakle'n ẍch'eybil wetz teru'.

14 ¿Mbi tzuntz yi qui't na pek'u' swe'j?

¿Mbi xac na tew tibu' tzinwutz?

15 Na juyil cunin in, yi woque'n swutz yi q'uixc'uje'j yi atin tk'ab jalu'.

Nin or nin chinquim ta'n.

Nimix cunin e'chk takle'n yi ntak'u' ama'l tan tule'n tzinwutz.

Poro qui't tzintx'aj mas.

16 Ja saj colp wi'u' swe'j.

Nin ja icy'pon yi ẍchi'chbe'n c'u'lu' wa'n.

Nin ja ne'l cu'n swutz.

17 Cyakil nin tkuj na tzanu' tan inxuxe'n.

Cho'n cunin na banu' chi na ban yi na juchun jun chin wutzile'n tzanla' yi na elu'l.

18 Na ja chin cyaj cyen quilol yi e' wamiw scyuch' e' mas wuch'.

Inchuc atin tul jun chin tz'o'tz Ta'.