1 Chumbalaj nin yi na katyoẍin teru'.

Chumbalaj nin yi na kabitzij e'chk bitz tan tak'le'n k'eju'.

Na ilu' yi wi'tz Ajcaw tcya'j tu wuxtx'otx'.

2 Chumbalaj nin yi na ko'c tan na'wse'n yi bi'u' lakak jalchan, nin lakak akale'n.

3 Chumbalaj nin yil kak' kak'ajsbil teru' tan kabitz, yil xom kawi' te yi kulil yi e'chk

ma'cl chi tane'n arpa tu salterio yi toque'n cu'n kulil wi'.

4 Na wi'nin na tak'u' tzatzin sketz tan tu' cyakil yi e'chk takle'n balaj yi na bnix tanu' Ta'.

5 Chin wutzile'n nin yi ak'un yi na bnix tanu' Ta'.

Qui'c jopbil wi' yi xtxumu'nu'.

6 Poro qui'c rmeril tan pujxe'n cyak'un yi e' yi tze'tzuj te cyajtza'kl.

7 Na yi e' mal nak ẍch'uyok tajlal chixone'n chi na ban xtze' yi jalcu'n na jal buchil.

Poro sotzel chiwutz cyera'tz sbne' opon tunintz.

8 Ma yi ilu' teru' Ta', iẍnin atu'-tz tzi'n tcya'j.

9 Poro at jun xtxolbil yi stz'elk cu'n te'j, i'tz yi e' contru' Ta', ẍche'lk cu'n tanu' swutz.

Nin cyakil yi e' mal nak ẍche' cawse'u'.

10 Tak' tzaju' mas inchamil Ta', chi tane'n ẍchamil jun mam tor.

Nin tak'e'nu' mu'ẍ aceit xo'l inwi', tan ẍchajle'n yi at ink'ej.

11 Na ja wil yi ẍe'n cu'n nchilo'on yi e' incontr, nin ja wit yi nchibaj ẍch'in yi chilo'one'n.

12 Poro yi e' balaj ẍchich'uyok cyera'tz chi na ban jun wi' mop.

Nin mben ẍkon chitiemp chi na ban e'chk cedro yi at wi'wtz Líbano.

13 Cho'n ẍchibne' cyera'tz chi tane'n yi e' balaj wi' tze' yi awij wutzk'anil yi ca'l Ryos.

Chin xkatzkuj nin yi xak.

14 Mpe skenk tijin chic'u'l yi e' balaj naka'tz ilenin ac'aj cun tunin e'-tz.

Ilenin at chichamil na iẍnin at chiẍc'atnakil.

15 Nin scyale' yi chin jicyuch nin te yi tajtza'kl yi Kataj yi q'uicy'lom ketz, na qui'c mu'ẍ tal paltil i'.