1 Chibitziju' jun ac'aj bitz tetz Kataj.

Chibitzinku' cyakil yi e'u' yi najlche'u' bene'n tzi'n wi munt.

2 Cyak'e'u' chik'ajsbilu' tetz tan tak'le'n k'ej i'.

Ilenin chitxole'u' yi at rmeril yil kaclax ta'n.

3 Cyale'u' scyetz cyakil wunak yi at k'ej i'.

Cyale'u' yi ba'n na bnix e'chk milawr ta'n.

4 Na yi ketz Kataj, wi'nin tetz k'ej, nin tajwe'n tan kak'ol kak'ajsbil tetz.

Ncha'tz tajwe'n tan kekal ẍchi' i', na ntin i' Ryos.

5 Ẍchiwutz yi e' mas wunak at mas ryos, poro qui'c chixac, na banij cuntu' quitane'n.

Ma yi ketz Kataj i' bnol tetz yi tcya'j.

6 Ej nin solte'j i', wi'nin pak'puchaxe'n tan yi tetz porer.

Ncha'tz tane'n yi ama'l yi chin xan nin.

Chin yube'n nin tan yi tetz porer.

7 Cha'stzun te, cyakil yi e'u' yi najlche'u' bene'n tzi'n wi munt, cyak'u' k'ej i'.

8 Cyak'e'u' k'ej, na chumbalaj nin i'.

Quicy'aj tzaju' e'chk oy tan toye'n tetz.

9 Chimejeku' swutz, yil quilu' yi pak'puchal tu yi xanil i'.

Chixoboku' tetz, cyakil yi e'u' yi najlche'u' bene'n tzi'n wi munt.

10 Cyale'u' scyetz cyakil jilwutz wunak:

“Yi ketz Kataj i' yi wi'tz rey.”

I' bnol tetz yi munt, nin qui'c rmeril tan xcyewe'n junt tan yuque'n.

Nin tz'ocopon tan cawu'n squibaj cyakil wunak, nin quil je' k'ab twi' jun.

11 Chitzatzink cyakil yi at tcya'j.

Ncha'tz cyakil yi at wuxtx'otx', scyuch' cyakil yi at xe mar.

12 Nin tzatzink cyakil yi e'chk cojbil bene'n tzi'n.

Ej nin cyakil e'chk jilwutz tze' chitzatzink.

13 Na ẍchitzatzink swutz Kataj yil tz'ul tzaj i' tan cawu'n tzone'j wuxtx'otx'.

Na scawunk i' squibaj cyakil jilwutz tnum yi at bene'n tzi'n wi munt.

Nin yil cawun i' chin tz'aknak cu'n sbne', nin quil je' k'ab twi' jun.