1 Na chimpek' te yi lok' ib tu yi ajtza'kl yi jicyuch te'j.

Nin tan yi xtxolbile'j swak'e' ink'ajsbil teru' Wajcaw.

2 Na na waj chinxom te yi ajtza'kl yi jicyuch te'j.

Ta', sajk binu' tan wuch'eye'n.

Tzinq'uicy'lej wib tan woque'n tetz tz'aknak cu'n.

Mpe ik xe wetz inca'l kale na chincawune't, tzinq'uicy'lej wib.

3 Quil xom inwi' te e'chk ajtza'kl cachi'.

Qui na chimpek' scye'j yi e' yi qui na chixom te tajbilu'.

Nin quil wak' ama'l scyetz tan cya'te'n tzinxlaj.

4 Swile' cyen cyakil yi e'chk yab ajtza'kl, na qui na waj tzimban e'chk takle'n cachi'.

5 Tzinmake' chiwutz yi e' yi ewun cuntu' na cho'c tan yolche'n chiwisin.

Nin qui't na waj yi cyajtza'kl yi e' yi na cyocsaj quib nim, yi e' yi na cyaj yi cuk quenin kawutz scyetz.

6 Poro ẍchimpek'ok scye'j yi e' yi jicyuch te cyajtza'kl.

Swak'e' ama'l scyetz tan cya'te'n tzinxlaj.

Nin swak'e' ama'l scyetz tan chixcone'n swetz.

7 Quil wak' ama'l tetz jun subul nak nka jun la'j tan cawune'n tzinxlaj.

8 Chebele'n cuntu' nocopon tan makle'n chiwutz cyakil yi e' mal nak yi ate' skaxo'l.

Nin chelepon inlajul cyakil yi e' yi na chitzan tan juchle'n quil yi ate' skaxo'l yi o' tanum Ryos.