1 Chityoẍinku' tetz Kataj Ryos, na chumbalaj nin i'. Na yi banl talma' i', quil sotz tera'tz.

2 Tajwe'n yil cyalu', cyakil yi e'u' xonl Israel:

3 Tajwe'n yil cyal cyakil yi e' pale':

4 Tajwe'n yil cyal yi e' yi na cyek ẍchi' i':

5 Te yi atin tul sotzaj c'u'lal, ja injak ẍch'eybil wetz tetz Kataj Ryos.

Ja tbit i' intzi' inkul, nin ja ne'l liwr ta'n.

6 Xomij Wajcaw swe'j, cha'stzun te qui't chinxob tetz alchok takle'nil yi na chitzan wunak tan xtxumle'n swe'j.* Sal 56:4, 11; Heb 13:6.

7 Xomij swe'j, nin na tzan i' tan wuch'eye'n.

Swile' yil che'l cu'n swutz yi e' yi na chi'ch chic'u'l swe'j jalu'.

8 Mas balaj yil k'uke' kac'u'l te Kataj Ryos, swutz yi cho'nk k'uke' kac'u'l scye'j wunak.

9 Mas balaj yil k'uke' kac'u'l te Kataj Ryos swutz yi cho'nk k'uke' kac'u'l scye'j yi e' bajxom yi at chik'ej.

10 Cyakil yi e'chk nación ja chu'l tan oyintzi' swe'j, poro tan porer Kataj Ryos ja chinxcye' scye'j.

11 Nsken chincyaj chinicy'al poro tan porer Kataj Ryos ja chinxcye' scye'j.

12 Ja chisaj nil swe'j chi na chiban yi e' akak. Poro jalcunin nxit chiwalor, chi na ban yi na oc k'a'kl tx'i'x yi jalcunin na el cu'n swutz. Tan porer Kataj Ryos ja chinxcye' scye'j.

13 Ja cho'c tan impitle'n nin tan inje'n trimp, poro list mmu'l Kataj Ryos tan incolche'n.

14 Cha'stzun te na wak' ink'ajsbil tetz Wajcaw na i' na ak'on inwalor. I' colol wetz.

15 Yi e' balaj wunak na chitzan len tan bitz xe'ak chica'l, na ja chixcye' te chicontr. Je na tal chibitze'j: “Tan porer Kataj Ryos ja katx'acon scye'j.

16 Chin xo'wbil nin yi porer Kataj Ryos, nin tan yi tetz porera'tz, ja kaxcye' scye'j kacontra'tz.”

17 Quil chinquim, ma na tzintxole' yi e'chk takle'n balaj yi mban Kajcaw swe'j.

18 Ja chincawsaj Ryos poro qui nin chinquim ta'n.

19 Jakwoke'n bin yi sawanil yi templo kale choque't yi e' balaj wunak. Na nocopontz tc'u'l tan tak'le'n ink'ajsbil tetz Kataj.

20 Yi jun sawanila'tz, i'tz yi sawan yi xconk tan Kajcaw. Nin ntin yi e' balaj chocopon tul.

21 Chintyoẍink teru' Ta', na ja tbitu' intzi' inkul, na ilu' colol wetz.

22 Na yi c'ub yi qui'c xak ẍchiwutz yi e' bnol ca'l, ya'stzun yi c'ub yi mas tajwe'n tan xcone'n.† Lc 20:17; Hch 4:11; 1P 2:7.

23 Kataj Ryos i' txumul tetz yi xtxolbila'se'j. Ej nin chumbalaj nin yi tetz xtxumu'n.

24 Jalu', ya'stzun yi k'ejlalil yi ja oc Ryos tan banle'n yi tetz tajbil.

25 Ta', na cu' kawutz teru'. Ko' cole'u'.

Nink tak'u' kabanl.

26 “At banl Kataj tibaj yi june'j, na Kataj Ryos nchakon tzaj,” che'ch wunak sbne'.

Ncha'tz yi o' ketz yi o' pale', skale': “At banl Kataj tzitibaj.”

27 Yi ketz Kajcaw, i' yi kaRyosil, i' ak'ol kajtza'kl.

Kaweke' bin cyakil yi ama'l tan katzatzine'n.

Kacy'aje' nin e'chk buch jalen te yi tuc' yi altar, bantz yube'n.

28 Chintyoẍink teru' Ta', na at wi'nin k'eju'.

Swak'e' ink'ajsbil teru', na ilu' inRyosil.

29 Chityoẍinklenu' tetz Kajcaw, na chumbalaj nin i'.

Chityoẍinku' tetz, na qui bajsbe'n tetz yi banl talma' i' skibaj.