1 ¡Uchuchih, mina chichameg umikta,

mina chichameg umiktin agagbauwa nunú

shiig aneaku ata!

2 Mina chichameg umiktin

agagbau aina nunú umikta;

dutikakum amina jiim kuitamainaitam imatiksam kuitamkata,

nuniakum iwaku pujuttame.

3 Amina tsajam uwegmin jigka nenau ata,

anentaimin kajimatmainchau, aneaku ata.

4 Unuimata duka amina umaimijai betek emata,

tuja yachameta nunú amina kumpajum emata.

5 Tuja nuwa aishin pegkegchaun takamjin,

pegkegchin chichagtamak,

tsanuja pegkegchaun takamtiksai tusa,

unuimata nunú ayamjutpaktatui.

6 Makichik tsawantai jeganum

niimtai ujaimunum wi niimkun wajayajai.

7 Nunika niimku wajai,

uchi datsa imanik jintiag

anentaimkachu aidau yujainamunum,

nuwi makichik datsauch nuni nagkaemas

shiig esegag anentaimkachun wainkabiajai.

8 Nunú uchik jinta aintug juwaki,

jinta tuniakbaunum jeganta

nunú nuwa jeega nuni wemayi.

9 Nuniaig etsa akaemayi,

nuniak suwe wemayi.

10 Nuniai nuwa akika dutiktai iwagmamin

aina nujai betek, makichik nuwa iwagmamjau,

pegkegchaun takamin asa

nunú anentaiyai jiinkibi uchin igkugtatus.

11 Nunú nuwak setakchau datsantainkachu,

tuja emetnag jeen titu pujuchu,

12 jinta ain wekayin, tuja plazanum,

jinta tuniakunum aents nagkaebaun igkug,

pegkegchau takamtiksatatus wekayin.

13 Nunin asa nunú uchi wetatman

pagkuk saukua ajantsuk chichajak:

14 “Wi mina apajuímtaiju

emematkun kuntinun maamua

nuna nejen ajamsatjame.

Wi dutikatjai tibaugnak yamai betek umikjai.

15 Nuadui amina igkugtasan jiinkijai,

amina wainkatasan shiig senchi

egamjam nuna yamai igkugjame.

16 Mina pegakjui,

colcha egiptunmaya lino

pegkeg najanamun ainkamjai,

17 dutikan kugkuin pegkeg mirra,

áloe, canela aidauwai ukatkamjai.

18 Wayata nunikamin ii wakegamu a aniakua tuke tsawampagmi.

19 Mina aishjuk atsawai;

tikich nugkanum wemayi.

20 Kuichkin aimak juki wemayi,

nuadui wamkek tashtatui,

nantu antumai taattawai”, tau.

21 Tusa pegkegchin ima

imatjakua wakemitkakmayi,

22 dutikam buey maatasa

juki ematiama numamtuk,

tuja kuntin maatasa dakamtikamunum

japa egkemkamtai,

23 flechayai anentai ijutim

jama numamtuk wajaktatus,

tuja pishak achiktasa

detua ukukbaunum awimpap

jakattaja tusa dekachu asa,

wemaina numamtuk nuwan pataetuk megkaekabi.

24 Nunika megkaekatag tachakmek

uchuchih, mina chichameg antukam umikta.

25 Amek nunú nuwa duka

anentaimtusmek diisaipa.

Wagki nunú wekaetakum,

amina pujutjumin megkaekaim.

26 Nunú nuwa duka kuashat aentsun

pegkegchaun takamtikas emegkawai.

¡Nii emegkagbau aidauk shiig kuashtai!

27 Tuja niina jeen wayamua duka

jaka megkaemaina nujai betekai.