1 Ashí nugkanmaya aidautijum

shiig aneasjum Apajuí kantamjuatajum.

2 Apajuí daaji pegkegma nunú pachisjum

kantamtai kantamatajum.

Tuja niina imanjiya nunú pachisjumshakam

kantamtai kantamatajum.

3 Apajuí chichagkujum:

“Amina takatjumek shiig pegkeg ainawai.

Ame ima senchigtin asamin,

amina shiwaajum aidauk

ishamjamainak aminí yunumainawai.

4 Nuninak ashí amina etsagtamainawai,

nuninak amina daagmin pachisag

kantamtain kantamainawai”, titajum.

5 Apajuí aents aidautin ayamjutpak

ishamain wainchatai aidaun iwainajua

nunú anentaimtustajum.

6 Nigki nayantsanash ukuya buku emauwai,

dutikamtai ii muunji aajaku aidau bukunum katiajajui.

Nuadui ¡ima Apajuíyaig shiig aneasagmi!

7 Apajuí niina senchijiya duwi

aents aidaunak tuke inawai;

untsu niina umigtan dakitin aidaunak

niijai shiwagmagawainum tusa tuke diyakui.

8 ¡Ashí aents aidautijum,

iina Apajuíjiya nunú

pegkegnum chichagtajum!

¡Dutikakjum kantamtai kantamjuatajum!

9 Wagki nii iinak kuitamjamui.

Pegkegchaun takastinme tusag idaikagtatsui.

10 Iina Apajuíjiyah,

amek ima aminigkiash

kajinas anentaima tusam

dekapkagtusuitme,

nuadui plata jinum jiyamu

pegkejama iman ekagtiuwaitme.

11 Tuja kuntin achiktinun

dakamtikak, kuntinun achiyajama numamtuk,

shiwaaji achiktinme tusam

tsagkamkagtukume.

Nuigtush shiig kuashat waitkagkagtusume.

12 Nuadui aents pegkegchau aidau

waitkastinme tusam

agkan idaisabiume,

tuja jutiik yuminmash tuja

jiinmashkam nagkaemakmaiji.

Dutika ashí dekapkagtusam,

juju nugka pegkeja imagnum

pujustinme tusam apujkagtusmayume.

13-14 Nuadui wi yaunchuk

ishamainnum pujusan amina chichagkun:

Ame yaintsamin juna nagkaikinuk,

amina emematkun anentag amastinaitjame

tiuwaitjam, nuna imatiksanuk amina jem

pegkegma nuwi wayan kuntinu maan,

nuna nejen ashí apeakun ememattatjame.

15 Tuja kuntin duwejam aidaun

uwija wiyaji aidaujai

amina eme anentsan ashí apeattajai.

Nuigtushkam toro aidaun, chivo aidaun,

amina emematkun apeattajai.

16 ¡Ashí atum Apajuí umijin

aidautigmek minitajum!

Nunikjum antuktajum

Apajuí mina yainka nuna pachisan ujaktajime.

17 Apajuín untsukmaijai,

dutikan niina emematkun kantamjuamiajai.

18 Wi ayatak pegkegchaunmak

anentaimsan pujutaik,

Apajuík antugtukchatnuyi.

19 Tujash minak antugtuku asa,

wi segamunash yainkabi.

20 ¡Apajuík wi segamunak dakitjachmayi,

tuja niina anenkenash sujitjukchabi,

nuadui tuke ememattai atin ati!