Jueces.
5.
Nunú tsawantin Débora, Baracjai juna aatus kantamau ainawai: 
“Tuke Pujuu ashí ememattajum, wagki Israel aents aidaunmak aents maaniatatus wakeyin aidaush ayawai. Tuja nuigtushkam ditá apuji aidau maaniawagmi tusa tamak utujimkas, ayu tinu aidau batsatui. 
¡Apu aidauwah, yamai wi taja nunú antuktajum! ¡Apu atuwe aidauwah, antugtuktajum! ¡Wi yamai Tuke Pujuun kantamjuattajai! ¡Israel aents aidau Tuke Pujuun emematin aina nuna kantamjuattajai! 
“Tuke Pujuuwah, Seír Edom nugkanum aajakua nuwi ame kuitamkagtusamin yujajin, nugka uugmayi, tuja yumishkam senchi yutujabi. 
Tuke Pujuu Israel aents aidaun Apajuíji ememattayah, ame wainmin muja aidau uujiagmayi. Tuja muja Sinaíshkam senchi uugkauwai. 
Samgar Anatan uchiji pujujakua nuaduik, tuja Jael pujujakua duishkam, jinta aidaunmak ishamain wekaemainchau asamtai, ditá shiwaaji aidau mantuawainum tau asag, yaja menantag jintachunum yujajaku ainawai. 
Nunidau asag Israel aents aidauk kanajag batsamas apugtuchu kajimatkim batsatun, wi Déboran ditá ayamjuktasan, makichik nuwa uchijin ayamjuwama numamtuk wejibiajai. 
Ashí Israel aents aidauk wainka apajuímtai aidaun emematiagmayi, nuniau asamtai, ame ditá maaniatnume tusam dita shiwaaji aidau ishitkabiume. Tujash ditak cuarenta mil suntag nagkigtin, tantaajintin ainakush sapigmaidau asag, maanimainji atsugbau wajukmaina nuniagmayi. 
See tajame amina Tuke Pujuuwah, tuja Israel aents aidaun apuji aina nunashkam shiig anentuinajai, wagki ujumak wajiu aina nunú maaniawaju asagmatai. ¡Nuadui Tuke Pujuu ashí ememattajum! 
Atum wiakuch aidautijum burro nuwa pujunum entsamka yujau aidautigmesh, tuja ujudauch dawenum yujau aidautigmesh, Apajuí kantamjuatajum, wagki nii depetmatan amasu asamtai. 
¡Tagku kuitamin aidautigmesh, tuja ujudauch yaaktanum batsamchau aidautigmesh, Tuke Pujuu, Israel aents aidaun ayamjuk agkanmitkau asamtai, platillo aidau awatkujum Tuke Pujuu kantamjuatajum! 
“¡Débora mijaakaipa! ¡Wajiu wajasta! ¡Nuniakum kantamata! ¡Barac Abinoáma uchijiyah, ameshkam mijamtsuk, aents maaniaku achigbau aidau yajuakam chimpiata! 
“Tusa kantaman inagnai, Israel aents aidauk wi ipaamu asag, shiwag maanitan yacha aidaujai, maaniawagtatus shiyakajui. 
Tuja Efraín wegantu ujumak aents Amalec aents aidaun nugkenia juwakiag akaejabi. Untsu Benjamín wegantu aidau nuna ukuujin shiyakagmayi. Tuja Maquir wegantun- mayashkam apu aidau shimutkabi. Tuja Sabulón wegantu aidaushkam apu aidau shimutkabi. 
Nuninai Déboranashkam apu Isacar wegantu aidau uyuniagmayi. Nuigtushkam Barakan Isacar wegantu aidau uyuniagmayi. Untsu Rubén wegantu aidauk apu wajiu ainayatak, 
ditá uwigji aidaun puyatjuinak batsamas: ¿Maaniatjiash, atsa maaniashtajiash? waja batsatui. Rubén wegantu aidauk múun ainayatak sapig ainawai. 
Tuja Galaad wegantu aidauk Jordágka amain yaaktamak batsamsaje. Untsu Dan wegantu aidauk Asher wegantu aidaujai, nayantsa pakaji wegajunum lanchagtin waigkag batsamsaje. 
Untsu Sabulón wegantu aidau, Neftalí wegantu aidaujai maaninak ishamainnum yujasu ainawai. 
“Tuja Canaán nugkanmaya apu aidau yaakat Meguidon ijus namak awa nuwi yaakat Taanac kaunawajui, nunikag nuwi maaniawajui, tujash depetmakchajui. Nunikaju asag makichik wajinakesh jutsuk waketkiajui. 
Israel aents aidau Sísarajai maaninakug, yaya nayaimpinum ayá nujai ijunjas maaninatai tumainun maaniawagmayi. 
Iina shiwaaji aidau entsa Quisónkan katitkatag titatman, yumi yutug dujajak tajaka utsagke. ¡Ame shiwag senchigtin aidau depetkam, iikmak chichakchamin awajsattame! 
¡Caballo aidau ishamkagtukag shiig senchi pisainak tutugtau antuewai! 
Apajuí ángeltsukaita tumain chichaman etsejak: ‘¡Yaakat Meroznum aents batsata nuwi suwimak iyagti tajai!’ tiuwai. Nunak tiuwai wagki dita aidauk wajiu ainayatak, Israel aents aidau maaniagtai yaigchaju asagmatai. 
“¡Heberan nuwe Jael quenita nuwa duka, tikich nuwa Israel aents aina nuna nagkaesau pegkegnum chichagtai atinai! Tuja nuigtushkam nii pujamunum nuwa aidau pujuina nuna nagkaesau shiig anentam atinai. 
Sísara kitamak yumi segam, Jael lechen juki susauwai. ¡Leche kanteku shiig pegkejan pinignum yajaa juki susauwai! 
Dutikam nuna uwag kanag tepesmatai, numi etsakamun juki martillowai kajashkinum iju nugkajai ijumag achia maabi. 
Dutika ijum tadae tadaekawa nuwig jaka tepesmayi. 
“Tuja Sísara dukujig uchiji megkaekamtai puyatki, jeganum niimtai ujaimunum tsapui niimas atsutai chichaak: ‘¿Wagka mina uchijush imanikash megkaekae? ¿Wagka mina uchiju carroji maanitai agma dusha megkaejae?’ timayi. 
Tuja niina inake nuwa yacha aidau chichagtai, Sísara dukujishkam dutiksag chichaak: 
‘Maaniawag depetmakajas, nuwa inak aidau achigbaun, suntag aidau maki makichik, atsa nuniachkush jimagnakesh akantunikag yajumainak megkaejatai. Tuja Sísaranun jáanch pegkeg agatkamu aidaun: makichik jáanchin, tuja nuigtu jimag jáanch agatka apijamu aents depetmakun kuntujen anugtai aidaun aatus yajumainakus batsatatai’, tuidau. 
“Tuke Pujuuwah, amina shiwaajum aina duka ame ashí ijinata. ¡Untsu amina anempaina duka etsa tajiag etsantama iman atinme!” aatus tusa Débora Baracjai kantama inagnakui. Nuna maaniau aina duwi nagkamas cuarenta mijan maanitsuk batsamsau ainawai.