Job.
41.
“Amek semagkauk agseayaik makichkish maumaitsume, tuja wenigkesh jigkatmaitsume. 
Amek makichkish semagkau nujig jigkatmaitsume, tuja jagkenum awagkekmesh emetmaitsume. 
“Aminak semagkauk wait anenjugta tusa segapakug waitkagmamaitsui. 
Tuja nuigtushkam, amina inakem wajasan, tuke amina taka takagkawan jakatin atajai tusag makichkish tujamaitsui. 
“Amek uchi pishakjai wasugkamama numamtukek, makichkish semagkaujaig wasugkamaitsume. Amek makichkish semagkauk amina nawanjum aidaun wasugkamtai ati tusamkesh anaamek apugmaitsume. 
Namaka sujin aidauk semagkaun sujuktasag namak sujutainmak ejemainchau ainawai. 
“Amek semagkauk flechayai ijumek duwapeg chigkagmaitsume, Tuja arpónkai buuknum ijuakmesh maumaitsume. 
Ame achika emetuatag tukamamek, nii depetamkui maa maaniakuam pimpikim, awake anentaimjam atakek aikchau atajai tusam idaimainaitme. 
Amek itugkanuk semagkaun depetkag tusamek tiipa. ¡Ayatak wainmawaik ishamkam jaka iyaumainaitme! 
Makichik aentskesh umuchiamak kajeak ishamain wajawai, tuja niijai maanimainuk makichkish atsawai. 
Ashí nugkanmak makichkish niijai maania depetmainuk atsawai. 
“Tuja semagkaun naweg shiig senchi ainawai, niig tikich kuntin aina nuna nagkaesau senchigtinai. 
Niina duwape dupajam wajakin katsugma nuna iju chigká emestumainuk makichkish atsawai. 
Makichik aentskesh semagkaun achika emetua iwaag nai ishamain tsakaskatu aina nuna diigmainuk atsawai. 
“Niina duwapeg shiig achimjau dasegkesh waimainchau kayajai betek katsugmai. Iman asamtai nuna chigkamainuk makichkish atsawai. Nuadui niig ememawai. 
Nii jachitbaujig peemjai betek jiinui. Tuja niina jiig tsawak etsa kapantun etsantug jiinama imanai. 
“Niina nujinia jii keeka jiinui, tuja nunú jii kega nuwiya yantsagtuk jiinainawai. 
Niina nujinia bukuiti jiina duka olla jinum ekenkam kuwaak bukuiti jiinama imaniawai. 
Tuja nii mayatbaujiya nunú jiin ekemawai, tuja niina weniin jii kegaun jiyawai. 
Niina kuntujeg shiig kampujam senchi wajaknai. Iman asamtai aents aidau nuna diinakug ishamainawai. 
Tuja niina nejeshkam katsujam jiju hierro ukuijamu nanaju katsugmama imanai, nuadui makichkish tsupimaitsui. 
Tuja niina anentaishkam kaya katsugma imanai. 
Nunú nantaun wainainakug, tikich senchigtin aidaush niina ishamainak pisainawai. 
“Niinak nagkiikesh, puyajaikish, flechayaikish, makichkish maumainchau ainawai. 
Nii diismak jiju hierrok dupa kagajujai betekai, tuja jiju bronceshkam numi mamujujai betekai. Nuadui niinak nunú jiju aina nujai maanitai najanamu aina duwik makichkish maumainchau ainawai. 
Niig flechan ishamakug tupikatsui, kayai nagkiamua duka nii diismak dupa kagajuwai nagkimaina nuninai. 
Tuja numi kijinai awatmawa duka nagkushpi awatmaina numamtinai. Tuja nagki aketmashkam niig dushikis diyawai. 
“Tuja japiinak weakug, nugkanak numi etsakamui taumaina imatika taumi jintama weawai. 
Tuja nayantsa kunajin tepeakug, nayantsanak yumi kuwaak wajukeama imatikawai. 
Nunik wegak yuminak tsakigmitkak, puju winchamtinun saugmitkak ukuawai. 
Tuja semagkaun niimega nuninuk tikichik juju nugka juwig makichkish atsawai, Wi niinak najanauwaitjai makichkish ishamkagtuchu atinun. 
Niig tikich kuntin múun senchigtin aidaunash ishamatsui. Niiyai ashí tikich kuntin aina nuna apujig”, tiuwai Apajuí.