Salmos.
19.
David kantamamu Apajuí imanjiya nunak nayaimpia nunú ujajatui, nayaim wigkaya nunú wainku, dekas Apajuíyap najanauwaita taji. 
Tsawaiya nunú, kashia nujai, Apajuí imanjinak tuke etsejuinawai. 
Chichainachiatak, makichik chichamnakesh tuinachiatak, tuja chichamujigkesh antugchatayaitak, 
ashí nugka nagkatkamunum dita chichainamuk antugainawai. Tuja nayaimpinum etsa ekemsatnunak Apajuí umikui. 
Etsag nuwi eketu makichik aents yama nuwan nuwatuk nii kanutaijin pujau jiinama numamtuk kashikmas jiinui. Nunik jiinki aents tupikain uminas shiig aneas wemaina numamtuk weawai. 
Nunik nayaim tikich yantamnumia etsa jiinki, tentea wea weakua, yaja tikich yantamnum jegaa kintamui. Nuadui etsa etsantun uwemtumainuk makichkish atsawai. 
Tuke Pujuun chichamega duka yamajam pujutan sukagtau asa, shiig pegkejai. Tuke Pujuun chichamega duka waitchauwai, shiig dekaske, wagki nunú aents kakagchauchin unuidau asa. 
Tuke Pujuun chichame umiktina duka pegkejai, anentainum dakujutan sukagtau asa. Tuke Pujuun chichame umiktina duka dekas shiig pegkeg tsaaptinun anentaimtikagtinai. 
Tuke Pujuu puyatjusa umigbauwa duka shiig pegkejai, tuja nii chichamega dusha tuke megkaekashtinai. Tuke Pujuun chichame umiktina duka waitchauwai, dekaskenum ashí pegkejai. 
¡Nunú chichamak oro tsuwatjinchau shiig pegkeg akika nuna nagkaesauwai, tuja dapa yumiji yumimitu pegkejama nuna nagkaesau shiig pegkejai! 
Wika amina inakmetag duwi pegkegchaun takasai tujutu asa, amina chichamjumea nunú jintinjawai. Nunú chichaman umiauk shiig pujustinai. 
Makichik aentsuk niina tudaujinak nigki anentaimsag dekagmamaitsui. Nuadui, Tuke Pujuuwah, ¡wi pegkegchaun takamsatjai tusan wakegachiatkun takamsamug aidaush tsagkugtugta! 
Tuja mina ememataijush emegkatjukta. Mina emematug wagagtuki, idaitusaipa. Aatsan wisha ibau tudau ajuta nuna agkanmagatjai. 
Tuke Pujuuwah, mina chichamjush mina anentaimtagjai, ame diismash pegkeg, wakemain ati. Chah, Tuke Pujuuwah, ametme mina ayamjutkam uwemtijinmek.