Salmos.
22.
David kantamamu ¡Apajuíjuh, Apajuíjuh! ¿Wagka minash idaitusume? ¿Wagka taamesh uwemtijatsme? ¿Wagka wi imanikan amina segaakun buutaish pachittsume? 
Mina Apajuíjuh, tsawaish, kashish untsuajame, imatjamash aigtsume. ¡Wi ayabaujuk atsugtawai! 
Tujash ametme pegkegmamek, ametme apumek, iman asamin Israel wegantu aidau emematjamainawai. 
Iina apachji aajaku aina duka aminí kajinmamsag anentaimajaku ainawai; aminí kajinmamsag anentaimaidau asamtai, agkanmitkauwaitme. 
Yainkata tusa segapainakuish, ame agkanmitkauwaitme, tuja aminí kajitmamsag anentaimaidau asagmatai, tsanugmek idaisachuitme. 
Tuja wika aents tamak amaitsujai, wika bagajai betekaitjai. ¡Wika aents aidaun dushiktaiyaitjai! 
Mina waituidauk dushijuinawai, nuninak buuken pegainawai. 
Nuninak: “¡Tuke Pujuuwai kajinmamas anentaima pujuuwe nuadui, nii taa uwemtikjati! ¡Imatika aneau asa, nii uwemtijati!” tuinawai. 
Tuu yujatnume: Ame minak akiinati tujutiu asamin, mina dukuju waken egkemkan akiinawaitjai. Tuja ame minak mina dukuju kuntujin patattsam kuitamjukmayume. 
Duwik nagkamsam wi akiintsaig, ame minak kuitamjukuitme. Tuja mina dukuju wakeen pujubiag duwi nagkamsamek mina Apajuíg aayume. 
Ima minakek idaitusaipa, wika waittanum jegantan pujajai. Tuja mina yainmainuk atsugtawai. 
Mina shiwag aidauk, baságnumia toro kajen aina iman tententuawaje. 
Dutijuawag ikamyawa kajen shinuwama imatuinak esattatus tsekenjuinawai. 
Tuja wika yumi ukagag megkagama numamtinaitjai; mina ukunchig aidauk akaejaujai betek wajase. Tuja mina anentaijuk wiya yumimeaujai betek wajase. 
Mina wenujuk ichinak yama inajuamu bukuama nunin wajase. Mina idaijush kayakmataijui nujamjutkae. ¡Jakaujai betek minak nugka yukukuntunum aepjukiume! 
Aents pegkegchaun takau aidau yawajai betek tuwagtukaje; tuja mina dawegnak, mina uwejujai ichinjujaje. 
Mina ukunchig aidaunash pan wainmain dekapeajai; tuja mina shiwag aidauk ayatak diiju batsatui. 
Mina jáanchjun jujutkiag, yana daajig jiinkiti, nunú jukiti tusag, nunú dutika dekatain wasugkamainawai. 
Tujash Tuke Pujuuwah, ametme mina senchimtijinmek. ¡Tupanjutsuk, wamak taam yainkata! 
Puyajai ijutiag mantuawainum minash agkanmitkajuata. Yawajai betek aina nunú maatnume tusamek idaitusaipa. 
Leónjai betek kajen aina nunú mantuawainum ayamjutkata. ¡Toro kajen kachujin magkagtina iman aina nunú mantuawainum ayamjutkata! 
Ame ayamjutkamin, wi amina pachisan mina yatsug aidaun ujaktajai; dutikan ditajai ijunjan amina emematkun kantamatjai. 
¡Atum Israel aents aidautijum, Tuke Pujuu eme anentin aidautigmek, Niina senchiji anentaimtusjum ememattajum! 
Apajuík ujudauch aidau waitiamun wainiatkug waittsatnume tusag pachitskek idaitsui. Tuja uumjutnakesh uumjuchui. Yainkata tusa segamak antujui, nunik betek yayawai. 
Apajuíjuh, ima aminak ememattagme, amina aentsjum eme anenjamin aidau kuashat tuwakbaunum nunak umiktatjai. 
Ujunauch aidautigmek yutai yuwajum shiig ejemagtajum. Tuja Apajuí wainkatasa egautigmek nii ememattajum, nuniakjum kuashat mijan pujustajum. 
Ashí aents tikich nugkanmaya ditash niimtin aidau, chichamnash tikich chichaman chichaaku aidauwah, Tuke Pujuu kajimatkigpajum. Niiyai jeganjum, ¡tikishmaja pujusjum ememattajum! 
Tuke Pujuuwai apua duka, iman asa ashí nugkanum inamui. 
Shiig atsumkas pujautigmesh, tuja ashí jaka pujautigmeshkam, ima Apajuíya duke tsuntsumjuajum etsagjatajum, wagki ima atumkek pujutak jukichu asajum. 
Wi wegantu aidauk Tuke Pujuun emematuinak, tuké niina pachisag etsejiagtin ainawai. 
Nuninak atakea duwi akiinawagtina nunashkam Apajuín takatji pegkeja nuna, kuashat wainchatai aidaun iwainajua nujai pachisag ujakagtinai.