Salmos. 34. David Abimelec maatag tama mantuawai tusa tsanumak imaanjaujai betek wajatai, jiiki awemam pujus agagbau Wika Tuke Pujuunak kashi kashinig pegkegnum chichagkun, tuke ememattinaitjai. Wika Tuke Pujuuwai eme anenmamjai; nunú antukjum ememachu aidautigmek, shiig aneastajum. Tuke Pujuu daaji múunta nunú ashí ijuntusaja emematiagmi. Wika Tuke Pujuun segabiajai yainkati tusan, dutika ai sapigmamujun agkanmitkajuabi. Tuke Pujuuwai anentaimas pujuidauk, shiig aneasag pujuinawai, nuadui datsan ipatmak achagtinai. Wika wainkauchitjai, nuniau asan Tuke Pujuun segabiajai. Tusa segai nii antugtuk, wi waitiamujun agkanmitkajuabi. Aents Apajuín eme anentus umijin aidaunak Tuke Pujuu aentsji ángel awemamua nunú kuitamui. Tuja Tuke Pujuush dekas pegkejashit tusajum dekaatasa wakegakjumek dekapsatajum: ¡Aents Apajuíyai kajinmamas anentaimaidauk, shiig aneas pujusagtinai! Tuke Pujuunu atajai tumamiu aidautigmek, nii eme anentsajum ememattajum; wagki niina umijuidauk makichkish atsumchagtinai. Wiakuch aina duka ujudauch wajasag nujantai waituinawai. Untsu aents Tuke Pujuun egau aina duka tuke waittsachagtinai. Mina uchig aidauwah, minai minitajum, nunikjum antugtuktajum, Tuke Pujuu umigtan wi jintituatjime. ¿Kuashat tsawan pujustasamesh wakegamek? Iwaku pujusam shiig takakum dakujustasamesh ¿wakegamek? Nuniakmek, pegkegchau chichamak chichatsuk pujusta, tuja wait aina duka makichkish chichakaipa. Pegkegchau takat aina duka idaisata, nunikam pegkeja duke takasta; nuniakum kakanmamsata maak agkan pujutnum. Tuke Pujuuk aents niina shiig umijin aina nuna kuitamui, dutikak nii sumamunash antujuk yayawai. Untsu tudaun takau aidaunak Tuke Pujuu kajejawai, dutikak ijina atakesh adeagchatnun emegkagtatui. Tuke Pujuuk niina umijin aidau sumamun betek antujui; dutikak nii waitiamujinash agkanmitkawai. Aents wika uwemjashtinapitja tusa anentaimak waitiaun uwemtijatatus Tuke Pujuuk tikijuch pujawai. Tuke Pujuun umigna duka kuashat utugchatan igkuawai, tujash niinak Apajuí depetmatnak suwawai. Tuja niina ukunchi aidaunashkam nii kuitamjawai; nuadui makichik ukunchinakesh kupigkachagtinai. Aents pegkegchau aina duka ditá tudau takamsamujin waituinawai, tuja Apajuí umijin aidaun kajejuina dushakam suwimkan jukiagtinai. Tujash Tuke Pujuuk niina inake aidaun uwemtikawai. Nuadui ¡Tuke Pujuuwai kajinmamas anentaimaidauk suwimak suwamak achagtinai!