Salmos.
65.
David kantamamu Apajuíyah, muja Siógnum pujuuwah, ¡ametme eme anentsa kantamjam amainmek! Amina takagsatjame tusa anagtabau aidauk betek umigtamain ainawai. 
Amek ii segamash antugkagtame; tuja ashí nugkanmaya aidauk aminí mininawai. 
Iina tudauji aidau wagagkagtakuish, ame tsagkugkagtame. 
Ame aents aidau etegjam, ame jem pegkegma nuwi amejai pujustinme tiuwaitam duka shiig aneasagtinai. ¡Tuja ame jem pegkegma nuwi pujusa amina pegkegmagmea nunú wainkau asaja shiig aneastatji! 
Apajuíyah, ametme jutiin uwemtikagtinmek, nuadui aents pegkegchau aidau suwimak suwakum amina umigtamaidauk shiig anennaitme. Nuadui ashí nugkanum pujuidauk tuja nayantsa amain atushat batsamin aidaushkam ima aminig kajinmamas anentaimainawai. 
Muja aidauk amina senchigmijai najanauwaitme, dutikam buchittsuk asatnume tusam kuitame. 
Amek nayants tsukatbaujish imignaitme, tuja aents aidau pampaidaush, bitat asatajum tusam itatmitkauwaitme. 
Tuja atushat batsamin aidaushkam ame amina senchigmin wainchatai aidau iwainamun wainkag kujainawai. Tuja ashí nugkanum batsamin aidaush aminí shiig aneenak untsumainawai. 
Ametme nugka kuitamnumek; tuja yumishkam yutumtikame, dutikam ajak aidaush tsapapitkame. Ame yumi yutumtikjamu betsaka akagak nugkan uchupjamtai, trigo aidaush shiig tsapainiag nejenawai. 
Ajak ajakmatasa nugka taimu aidaush yumi yutumtikjam uchupiame, wagki ajak aidau tsapainiag senchi nejektinme tusam. 
Ajak aidau mijadai kuashat nejektinme tusamesh nejemtiknaitme. Tuja yumi kuashat yutau asamtai, yumi atsumakuish waitnatsui. 
Nuadui uwegshunmash dupa tsapaka samekbau pegkeg wajas awai. Tuja muja aidaushkam samekbau pegkejan iwagmamainawai. 
Tuja nugka nain pegkeg aidaunmak, tagku aidau piyake, tuja nugka paka aidaunmak kuashat trigo ayawai. ¡Ashí nunú aidau shiig anenawai!